O Vaega Faaleagaga o le Faamalologa
O faamaumauga i tusitusiga paia o le soifuaga ma aoaoga a Iesu ua tumu i faamatalaga e uiga i Lona mana le mafaatusalia e faamalolo ai ituaiga uma o mafatiaga. Ua tusia i Tusi e silia i le 20 tulaga faapitoa na faamalolo ai e Iesu tagata mama’i: mai le faamalologa o le atalii o se alii i Kapanaumi (tagai Ioane 4:46–53) i le toe faapipiina o le taliga na tipiesea o Maliko, le auauna a le faitaulaga sili (tagai Luka 22:50–57; Ioane 18:10).
O mana faamalolo o Keriso na faalautele atu ia i latou sa aafia i mafatiaga o le tino e aofia ai “ma ma’i tiga uma o le nuu” (Mataio 4:23; ua faatusilima mea e faamamafa; tagai foi Mosaea 3:5; 3 Nifae 17:5–10). O Iesu, i Lona alofa le faatuaoia, na faamaloloina ai e le gata ia i latou sa i ai mafatiaga i le tino, ae faapea foi ia i latou sa gasegase o latou mafaufau po o lagona.
O nei faamalologa o ni vaega taua o le Togiola a Iesu Keriso. E matua mamana—e matua atoatoa i lona tele ma le mamao—ona, e le gata ina totogi ai le tau mo le agasala ae e mafai foi ona faamaloloina ai mafatiaga uma o le olaga nei. “O Ia o le na maliu, e onosai i mea tiga, ma puapuaga uiga eseese ina ia silafia e Ia le ala e tausi ai Lona nuu. (tagai Alema 7:11–12), o Lē na tauaveina le mamafa le mafaamatalaina o agasala a tagata uma o le aiga o Atamu (tagai 2 Nifae 9: 21) i lea lava auala e tasi na faalautele atu ai Lona mana faamalolo i tagata uma, e tusa lava po o le a le mafuaaga o o latou mafatiaga. “O ona faalavalava foi ua malolo ai tatou” (Isaia 53:5).
O Le Matafaioi a le Perisitua
O le Faaola, e ala i Lona mana paia, e mafai ona faamalolo ai tagata uma, peitai o alii i le lalolagi e faaaogaina le pule paia o le Perisitua Mekisateko e faalagolago i Lona finagalo. Talu ai o nisi taimi ua le tusa ai ma le finagalo o le Atua, e le mafai ai ona faamaloloina nisi latou te faamanuiaina. Mo se faataitaiga, o le Aposetolo o Paulo, “na aioi faatolu atu i le Alii’ ina ia aveese le “mea matuitui i le tino” sa tigaina ai o ia (2 Korinito 12:7–8). Peitai sa le’i faia e le Alii, ma fetalai mai, “O lo’u nei alofa tunoa e lava lea e fesoasoani ia te oe; aua o le vaivai e faaatoaina ai lo’u mana” (2 Korinito 12:9). Sa sili atu ona malamalama Paulo nai lo le tele o isi tagata e faapea, o puapuaga ma mafatiaga o ni vaega e manaomia ma e le maalofia o le olaga.
Sa malamalama Peresitene Spencer W. Kimball (1895–1985) i le atamai o le faatapulaaina ua i ai i mana faamalolo o e umia le perisitua. Sa ia taua “O le mana o le perisitua e leai sona tapulaa, peitai o le Atua i lona atamai ua tuuina mai ai i tagata taitoatasi ni tapulaa faapitoa… . ua ia te au le faafetai ona e ui lava ona o loo ia te au le perisitua, ae e le mafai ona ou faamaloloina ai ma’i uma lava. Atonu e mafai ona ou faamaloloina ai ni tagata ua tatau ona maliliu… . Ou te fefe ina nei ou taofia fuafuaga paia a le Atua.”1
I le tele o tausaga ua mavae, ao avea au ma peresitene talavaou o se paranesi ma sa leai so’u poto masani, sa talosagaina a’u e se tasi tagata o lau paranesi ina ia ou auai atu i le faamanuiaina o lona toalua sa matuā ma’i tigaina. Na iloa lelei lava le manao o le tama ina ia ou faamanuiaina lona toalua ia matua malosi mai lona ma’i. O le mea foi lena sa ou faamoemoe i ai; aua o lenei ulugalii o ni poutu sa manaomia tele i la matou paranesi tau atiae.
Na faauuina e le tane lona toalua i le suauu paia i le auala sa’o, ma sa ou faaauauina i le faamauina o le faauuga. (tagai Iakopo 5:14). Sa ou te’i, ina ua ou fai atu ni upu ou te lei faamoemoeina; sa “filifilia ia oti” lea tamaitai (MFF 42:48). O le a le toe manuia lona gasegase ae o le a agai malie ese atu mai ia i matou ma le filemu, e sapasapaia i aao alofa o le Faaola.
Na maliu le tamaitai i le aso na sosoo ai, ma sa ou pulefaamalumalu ai i ona toe sauniga, o se tagata faanoanoa ae ua atamai. Na ou aoaoina se lesona sili: a tatou faia sauniga mo e mama’i, o la tatou anavatau e tatau ona i ai o le “aua le faia lo’u loto, a o lou finagalo” (Luka 22:42).
O le mea lea, o le meaalofa paia o le faamalologa, e faaalia mai i auala eseese, ia fetaui ma manaoga taitasi o i latou o e mauaina e ala mai ia te Ia, o lē ua silafiaina lelei i latou, aua e sili atu Lona alofa ia i latou. Atonu e aumaia e le mana faamalolo o Keriso le mapusaga tumau i le tulaga e faapea, o se vaega se tasi pe sili atu o le tino e le masani ona gaioi lelei ua faaleleia ma o le avega mamafa o puapuaga ua siitia ese mai loto mafatia. Ae peitai o le toafilemu, malologa, ma le mapu mai puapuaga o loo pulunaunau i ai i latou o a latou avega e foliga mai i le tele o taimi, ua le lavatia ona tauave, e ono oo mai, e le mai faamalologa i tulaga faafomai, ae mai le meaalofa o le malosi faafualoa, malamalama, onosai ma galuega alofa, lea e mafai ai e tagata mafatia ona tauave a latou avega. E pei o Alema ma ona uso, o le a mafai ona “faigofie ona latou tauave a latou avega” ma “gauai ma le loto fiafia ma le onosai i le finagalo atoa o le Atua” (Mosaea 24:15).
O Le Matafaioi a Vailaau Faafomai
E le tatau ona tatou talitonu e faapea o i latou uma e pagatia i ma’i, po o le a lava le pogai, ua na o le mauaina o se faamanuiaga faaleperisitua e aveesea atoa ai o latou mafatiaga. O au o se fautua sili ma lagolago malosi o faamanuiaga o le perisitua. Ua ou iloa mai i le tele o aafiaga patino, o Iesu Keriso, ma ua na o Ia lava, e pule i le “pulu pasama o Kiliata” (Ieremia 8:22) e manaomia mo le faamalologa atoatoa mulimuli. Ae ua ou iloa foi ua tuuina mai e le Atua ia i tatou le poto uiga ese lea e mafai ona avea ma fesoasoani taua i le taulimaina o mafatiaga. Ou te talitonu, e tatau ona tatou faaaoga tatauina soo se faamatalaga faapena e tuuina mai e le Atua.
O nisi o e mama’i ua maua se faamanuiaga faaleperisitua ma sa tatalo faatauanau ina ia faamamaina a latou avega, e ono manatu ua latou puapuagatia ona o le leai o se faatuatua pe afai latou te saili i fesoasoani faapolofesa mo o latou puapuaga. Atonu e oo lava ina taofia le inuina o fualaau ma vai faatonuina, ona o le manatu sese e faapea, o o latou faatuatua o le a suitulaga i ia mea. O manatu faapena e fai lava si sese. O le maua ma le mulimulitaia o fautuaga poto faatasi ai ma le faaaoga o le faatuatua e le o feteena’i. O le mea moni, o le faaaogaina o le faatuatua e ono manaomia ai le mulimuli i fautuaga a fomai atamamai ma poto masani.
O fomai atamamai—po o a lava o latou tomai aoaoina po o tulimataiga, e tusa pe faapitoa i togafitiga faafomai pe faalemafaufau—ua tele ina latou silafia o le faaleagaga o se vaega taua o a latou punaoa o le manuia [o gasegase]. E lata mai nei lava, pe tusa ua 10 tausaga talu ai, ua na o se vaega itiiti o aoga faafomai i le Iunaite Setete na ofoina aoaoga i le faaleagaga ma faamalologa, ae o le taimi nei ua sili atu i le afa aoga ua latou faia. Ae maise lava i gasegase e malolosi i lotu, ua amata ona iloa i faamaoniga e faapea, o metotia faaleagaga i togafitiga faalemafaufau o le gasegase o le faanoanoa ma le leai o se faamoemoe, mo se faataitaiga, ua tutusa lava le aoga e pei foi o i latou e matua le lolotu lava. Ua toatele fomai o le tino ma fomai o le mafaufau ua faaaogaina nei ia metotia e matele i le faaleagaga ma faiga e puipuia ai i le togafitia o gasegase o le tino ma le mafaufau.
O Le Matafaioi o le Faatuatua
O le faatuatua o le tagata e tuu atu i ai [togafitiga] o se tulaga manaomia tele lea o le faamalologa (tagai 2 Nifae 26:13; Mosaea 8:18; MFF 35:9) O le faatuatua—“o le faalagolago lea i mea ua faamoemoe i ai, o le mautinoa lea o mea e le o vaaia” (Eperu 11:1)—o se meaalofa o le Agaga, ua faaeeina o se taui o le amiotonu o le tagata lava ia (tagai 1 Korinito 12:9; MFF 46:19–20). A leai se faatuatua, e le mafai ona tupu le vavega o le faamaloloina. “Aua afai e leai se faatuatua i le fanauga a tagata, e le mafai e le Atua ona faia se vavega ia te i latou; o lea na ia le faaalia ai o ia lava ia te i latou ina seia muamua ona latou faatuatua” (Eteru 12:12).
O le faamaloloina atoatoa, e aofia ai lona vaega faaleagaga, e manaomia ai foi se malamalamaaga o lo tatou natura o fanau a le Atua ma la tatou faiā ia te Ia. Ua aoao mai tusitusiga paia ma faamaonia e perofeta o aso nei e faapea, o le tagata, o le tino faatasi ma le agaga—o le vaega na taua muamua [tino] e le tumau, o le vaega mulimuli [agaga] e faavavau—ma o le faatasia o le lua lea e maua ai se tagata ola. O le fuafuaga sili o le fiafia a le Tama, ua tatou aoao ai, o le tino ma le agaga e tuueseeseina e le oti lea e oo i tagata soifua uma, o le a toe faatasia i le taimi atofaina a le Atua, “[o le a] avea foi tagata uma ma tagata ola pea ma le le oti, ma [o le a] tagata ola pea i latou, ina ua ia te i latou le malamalama atoatoa” (2 Nifae 9:13; tagai foi Alema 11:42–45).
O le faatuatua i se Tama Faalelagi alofa ma Lona Alo, o lo tatou Faaola—faatasi ai ma le malamalamaaga o i tatou o fanau moni a le Atua, ua i ai se avanoa paia e taumafai ai ia avea e pei o Ia, ma se iloa lelei o Lona alofa mo i tatou e faavavau ma e le masuia—e aumaia ai le filemu i o tatou olaga. O lena filemu e tumau, e tusa lava pe tumau ona avea tulaga o gasegase o le tino, mafaufau, po o gasegase masani—pe o afuaga e faaletino pe faalemafaufau o se—“mea matuitui i le tino.”
O Le Matafaioi o Puapuaga
Ou te talitonu o lo tatou malosi faaleagaga e talafeagai tonu lava ma le maualuga e faapea ona tofotofoina ai o tatou agaga. Peitai e le tatau ona tatou saili mo ni puapuaga po o viiga i tofotofoga. E leai se taua moni o puapuaga po o le puapuagatia lava ia. O puapuaga e mafai ona faamanualia ma faaonoono i le tagata e pei foi ona mafai ona faamalosia ma faamama. O nisi tagata e malolosi atili ai i le tali atu i mafatiaga, a o isi e faavaivaiina ma toilalo ai. E pei ona tusia ma le poto e tusitala Anne Morrow Lindbergh, “Afai o puapuaga lava ia e aoao ai, o le a popoto uma le lalolagi, aua e puapuagatia uma lava tagata.”2 Afai o le a tatou talia le “faatasi i tiga o [Keriso]” (Filipi 3:10), e tatau ona tatou totogia le tau o le taumafai ma o tatou loto atoa ia iloa ma mulimuli ia te Ia. E moni, o lena tau atonu e aofia ai le puapuagatia, ae e ao ona tatou faaopoopo atu i puapuaga le agaalofa, loto malamalama, onosai, agamalu, ma le naunau e tuu atu o tatou loto i le finagalo o le Atua.
O le faaalia ofoofogia o le alofa o Keriso mo tagata uma ua aumaia ai le faamoemoe ma faamalosiauga ia i latou o e puapuagatia i soo se gasegase. O Lona alofa e tumau pea e le mavae. E pei ona molimau Paulo:
“O ai se na te faateaeseina mai i tatou i le alofa o Keriso? …
“Aua ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali,
“Po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii” (Roma 8:35, 38–39).
O Iesu i Lona alofa ma le agalelei e le mavae, na te silafia o tatou tofotofoga ma faanoanoaga, aua “ua manatua e [Ia] nuu uma i atunuu uma latou te i ai; ioe, ua faitauina e ia lona nuu, ma ua liuliualo alofa mai i le lalolagi uma” (Alema 26:37).