NAI TALA OTOOTO MAI LE LALOLAGI

Ua Faamamalu e le Koluse Mumu le Ekalesia i Bogotá

Sa faamamaluina e le Koluse Mumu a Bogotá, Colombia le Ekalesia ia Novema 2007 mo le faatulagaina o se matatia o le foai atu o toto lea na foai atu ai e volenitia e 879 ni iunite se 605 o toto, e toetoe lava a faatoluina le aofai o iunite e masani ona maua i le tele o taumafaiga faapea i Bogotá. Na fetaui lelei ia foai i lena vaitau o le tausaga ma le tau leai o ni foai na i ai ma na iloa ai le matuai manaomia o toto e foai atu.

Ua Faapotopoto Talavou mai Siteki e Fa i Auvaemauga o Suitiselani

E lata i le 150 alii talavou ma tamaitai talavou ma le 50 o o latou taitai mai siteki e fa i le tuaoi o Suitiselani ma Farani sa fiafia i se konafesi a le autalavou a siteki tuufaatasi na faia i Schwarzsee (Vaituloto Uliuli), i Suitiselani, i le faaiuga o le 2007. O galuega faalemalumalu, aoaoga, gaoioiga, o se siva, ma molimau na aumaia uma ai i auvaemauga o Suitiselani ia talavou mai Siteki a Sineva Suitiselani, Lausanne Suitiselani, Lyon Farani, ma Nancy Farani.

Ua Faamanatu e le Au Paia i Sepania le Talafaasolopito o le Ekalesia

O le a faataunuuina e tagata o le Ekalesia i Sepania se fuafuaga umi e faamanatu ai mai ia Oketopa 2008 e oo ia Me 2009 le Tulafono o le Saolotoga o Talitonuga Faalelotu i Sepania (na pasia ia Iuni 1967), o le faalauiloaina aloaia o le Ekalesia ia Oketopa 1968, ma le faapaiaina o Sepania mo le folafolaina atu o le talalelei i le aso 20 o Me 1969. O uluai faifeautalai e toafa na tofi atu i Sepania ia Iuni o le 1969.

Ua Fesoasoani le FamilySearch e Tuu i Luga o le Initoneti ia Faamaumauga Tusitusia sa Teuina a le Atunuu

O le National Archives ma le Records Administration (NARA) a le Iunaite Setete ma le FamilySearch o le a liliuina faakomepiuta, faasolo i le faasinoupu, ma tuu ni vaega autu o le anoanoai o faamaumauga a NARA i luga o le initoneti. O le silia ma le 1.28 miliona faila o loo aofia ai faamaumauga a le faamasinoga, militeli, fanua, ma isi faamaumauga a le malo mai le 1754 e oo mai i le taufaaiuiuga o le vaitau o le 1990. O le FamilySearch o le a faia ia faasinoupu ia maua i luga o le Uepi e aunoa ma se totogi.