Faatoilaloina o a Outou Koliata

“O le aso nei e tuuina mai ai oe e Ieova i lo’u lima … e iloa ai e le lalolagi uma, o i ai le Atua ia Isaraelu” (1 Samuelu 17:46).

O i tatou uma e tatau ona fetaiai ma Koliata i o tatou olaga: o tofotofoga, luitau, ma faaosoosoga e foliga e faigata ona faatoilalo. Peitai, e pei o Tavita, e mafai ona tatou faatoilaloina pe a tatou faalagolago i le Atua, ma faia la tatou vaega. Na aoao mai e Peresitene Gordon B. Hinckley (1910–2008), “Afai e oo mai faaosoosoga ia te oe, ia faaigoa lena sauai mimitavale, taufaasese o ‘Koliata!’ ma fai e pei ona faia e Tavita i le Filisitia o Kata.” (“Faatoilaloina o Koliata o loo i o Tatou Olaga,” Liahona, Fep. 2002, 5).

A o e faitau i le 1 Samuelu 17, o le a se mea e te aoaoina mai i le taua a Tavita ma Koliata? Na faapefea ona fesoasoani le faalagolago o Tavita i le Atua ia te ia? Na faapefea ona saunia o ia mo lea taua? O le a se aafiaga e mafai ona i ai i se talavou se toatasi i le fausia o le malo o le Alii?

O nisi nei o faamatalaga e faaopoopo atu i au suesuega o lenei tala iloga.

O se tagata togi maata na te uuina uma pito e lua o le maata i lona lima poto, o nisi taimi e nonoa faataamilo le tasi pito o le maata i ona tamailima ae taofi le isi pito e lona limamatua ma le limatusi. E le masani ona faataamilo e se tagata togi maata le maata i luga ae o lona ulu, ae na o le faataamilo tasi lava ona, liai malosi loa lea (a le o luga ae po o lalo ifo o le tauau), ma faamamulu le pito o loo taofi e le limamatua ma le limatusi ia lelea ese ai le maa.

O maata anamua sa masani ona fai i se [ie] pau mamoe umī se tasi e fili po o l e falesi [flax], e i ai se tamai taga ile ogatotonu e tuu ai le maa. O le umī lava o le maata, o le mamao foi lena o le alu a le maa. O se maata aupito umi e mafai ona togi ai se maa e sili atu i le 800 futu (tusa ma le 250m) [le mamao], i le masau e i le va o le 60 ma le 100 maila (100 i le 160km) i le itula.

O maa lapotopoto ma mamafa teisi e manaomia e le au togi maata ona e ono mafai ona alu sao. O maa e faaaoga mo togitogiga maata sa masani e pe a ma le lua inisi (5cm) le lapopoa (tai pei o le tele o le polo tapolo).

Atonu e le sili atu ma le 16 tausaga o Tavita i le taimi na fetaui ai ma Koliata, ma ua faamatalaina i tusitusiga paia e “enaena mumu,” o lona uiga e mumu lona lauulu pe alafau piniki foi (e talavou).

Sa osofaia le lafu a le tama o Tavita e se liona ma se urosa, ae sa tulieseina e Tavita, na maua ai lona lototele e faafetaiai i a Koliata.

O le ufifatafata faauna o i’a a Koliata e “limagaafe o sekeli,” le mamafa, e tusa lea ma le 125–200 pauna (57–90 kg).

O le fuata o le tao a Koliata sa “pei o le laau faalava o lē lalaga ie”—atonu e silia ma le 20 pauna (9kg) le mamafa; o lona matatao e “ono selau sekeli o uamea”—15–25 pauna (7–11kg) le mamafa.

O Le Au Filisitia atonu sa tupuga mai i le itu e lata i le Sami Aseane. O Koliata atonu na tupuga mai i se ituaiga o tagata e maualuluga, o sauai. (Tagai Teuteronome 2:10–11; Iosua 11:22).

O le pulou apamemea o Koliata atonu sa fausia mai i le apamemea, kopa, po o le uamea, masalo sa faamau i se tao apamemea lea sa faapea sa punitia ai le papatua ma le ua.