Savali a Faiaoga Asiasi

Ua Aoao Mai e le Talalelei a Iesu Keriso le Moni o le Muai Olaga

Ia aoao atu mau ma faamatalaga e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

O a Ni Mea ua Aoaoina Ai i Tatou e uiga i le Muai Olaga?

Elder Richard G. Scott o le Korama a Aposetolo e Toasefululua: “Sa tatou ola moni lava i le afioaga o le Atua lo tatou Tama Paia ma Lona Alo Pele, o Iesu Keriso, i se muai olaga… . Sa tau mai ia i tatou:

“‘O le a tatou faia se lalolagi e nonofo ai i latou nei;

“‘Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua;

“‘Ma o i latou o e e tausia lo latou uluai tofi [o lona uiga o le usiusitai i le muai olaga] e faaopoopoina ia i latou; … ma o i latou foi o e e tausia lo latou tofi lona lua [o lona uiga o le usiusitai lea i lenei olaga faitino] o le a faaopoopoina i luga o o latou ulu le mamalu e faavavau faavavau lava’ [Aperaamo 3:24–26]… .

“… Sa aoaoina ai oe ma saunia mo tulaga o le a oulua fetaiai i le olaga nei… . O le a taofia lo outou manatua o le muai olaga, ina ia mautinoa ai o se suega aoga, peitai o le a i ai se taiala e tuuina mai e faasino atu ai ia te oe le auala e ola ai. O le fuafuaga a lo tatou Tama mo le faaolataga i lenei olaga, faatasi ai ma le avanoa e toe foi atu ai ia te Ia, o le a ta’ua o le talalelei a Iesu Keriso” (“O Upumoni Ua Toefuatai Mai,” Liahona, Nov. 2005, 79).

Elder Joseph B. Wirthlin o le Korama a Aposetolo e Toasefululua: “I se fonotaga i le muai olaga lea sa tatou i ai uma iina, na taliaina ai e [Iesu Keriso] le fuafuaga sili o le fiafia a lo tatou Tama mo Lana fanau ma na filifilia e le Tama [Iesu Keriso] na te faatinoina lena fuafuaga. Na Ia taitaiina ‘au o le lelei e fetaiai ma ‘au a Satani ma e na mulimuli ai i se taua mo agaga o tagata lea na amataina ao lei foafoaina lenei lalolagi. O lena lava feeseeseaiga o loo faaauauina pea i aso nei. Sa tatou i ai uma lava i le itu a Iesu i lena taimi. O loo tatou i ai pea i le itu a Iesu i aso nei” (“Kerisiano i Talitonuga ma Mea e Fai,” Liahona, Ian. 1997, 84).

Aisea E Taua Ai le Malamalama i le Muai Olaga?

Julie B. Beck, peresitene aoao o le Aualofa: “Ua i ai i tamaitai ni tofiga tulaga ese na tuuina atu ia te i latou a o lei faavaeina le lalolagi… . Ua tatou iloa, o le taua tele i le muai olaga, sa tatou au ai ma lo tatou Faaola o Iesu Keriso, e puipui lo tatou tulaga gafatia e avea o ni aiga e faavavau. Ua tatou iloa o i tatou o afafine o le Atua, ma ua tatou iloa mea e tatau ona tatou faia… . Tatou te talitonu i le faatulagaina o aiga e faavavau… . Ua tatou iloa o le poloaiga o le fanafanau ma uluuluola ia faatumulia ai le lalolagi ua faamalosia ma faatumauina… . Ua tatou faatuatua, o le fesoasoani mai o le Alii e mafai ai ona tatou manuia i le tausiga ma le aoaoina o fanau. O tiutetauave taua nei i le fuafuaga o le fiafia, ma a oo ina opogi mai e tamaitai ma o latou loto atoa na matafaioi, e fiafia i latou!” (“O Le Mea Sili e Faia e Tamaitai o le Au Paia o Aso e Gata Ai: Tutu Malosi ma le Mausali,” Liahona, Nov. 2007, 110).

Peresitene Spencer W. Kimball (1895–1985): “Afai tatou te vaavaai atu i le olaga faaletino o se atoaga o le olaga, o lona uiga la, o le tiga, faanoanoa, toilalo, ma le puupuu o le olaga o le a avea ma mala. Ae afai tatou te vaavaai atu i le olaga o se mea e faavavau lea e oo atu i tua i le muai olaga ma oo atu ai i le faavavau i le lumanai pe a mavae le oti, ona mafai lea ona sagatonu la tatou vaai i mea e tutupu” (Aoaoga a Peresitene o le Ekalesia: Spencer W. Kimball [2006], 17).

Mo suesuega faaopoopo, tagai Ieremia 1:4–5; MFF 138:55–56.