Fesili ma Tali
“O le a le leaga pe a na o le faa-tasi lava ona faataitai se meainu malosi po o le tapaa?”
Ua aoao mai tusitusiga paia e faapea, ina ia mafai ona faaaoga lo tatou saolotoga e filifili ai, e tatau ona i ai le faafeagai—lelei ma le leaga—i le lalolagi, ma e tatau ona “faaosoina [tatou] e le tasi po o le isi” (2 Nifae 2:16; ua faatusilima mea e faamamafa). E le manaomia ona tatou gauai atu i taimi uma i faatosinaga a filifiliga sese ina ia aoga ai lou saolotoga. O le mafai ona iloa o le sao mai le sese o le mea lena e taua. E le manaomia ona e iloa uma le lelei ma le leaga; e manaomia lou iloa o le lelei mai le leaga—ona filifili lea o le lelei.
Atonu e te manatu o le faataitai i le ava malosi po o le tapaa i se taimi se tasi, o le a e le afaina ai, peitai e te afaina ai. O ni mea faataumaoi, ma e le mafai ona e lagonaina ai le Agaga pe a e faaaogaina. Mo nisi, o lena taimi e tasi e iu ina avea ma mausa i le olaga atoa.
E Leai Se “Na o le Faatasi Lava“
Leai, e le tatau ona e faataitaia; tusa lava pe na o le tasi! Atonu e te faapea mai o le a e le toe faia lava, peitai, o le ava malosi ma le tapaa e mafai ona avea ma mausa. E i ai sa’u uo sa “na o le faatasi’ lava ona faataitaia le ava malosi. O le isi taimi na tafao ai, tou te iloa la? Sa toe inu o ia. Sa iloa uma e tagata sa “na o le faatasi,” lava na inu, ae na avea ma “toe tasi lava.” O i tatou o tagata o le ekalesia, o loo matauina pea e tagata e le auai i le Ekalesia. E le o se mea lelei lo tatou le usitaia o o tatou lava tulaga faatauaina—ae le taulia ai le matua le fiafia o le a i ai i ou matua.
Kaila W., 17, Niu Saute Uelese, Ausetalia
O Tulafono e Puipuia Ai Oe:
O lo tatou Tama alofa i le Lagi e silafia soo se mea e tupu i le olaga ma ona aafiaga. O le ala lea na Ia tuuina mai ai le Upu o le Poto. E alofa tele o Ia ia te oe ma e finagalo ia puipui oe mai le tiapolo. O se tasi lea o auala o loo Ia taumafai ai e te tumau i le saogalemu—e ala i poloaiga. Ua e iloa o se poloaiga le aua le tagofia o fualaau faasaina, o lea ia tausisi pea i le itu saogalemu. Tatalo mo Lana taitaiga ia puipui ma faasao oe mai manatu o le fia faataitai o mea ua e iloa e le sa’o.
Asenaca V., 18, Suva, Fiti
Tausi le Upu o le Poto:
Manatua, o le Upu o le Poto o se poloaiga mai le Atua, ma o lea e manaomia ai lo tatou matua usiusitai i ai. A le o lea ua tatou agasala, ma o le agasala o le agasala lava, e tusa pe na o le faatasi lava ona tatou faia. Aua nei galo o se agasala mamafa e tupu mai ona ua tatou gauai muamua i faaosoosoga laiti, e pei o le faataitaia o le ava malosi po o le tapaa i le fia iloa pe faapeī ia mea.
Ana M., 20, Michoacán, Mekisiko.
Tetee i Faaosoosoga
O mea faataumaoi uma e tuuina ma le iloa i totonu o le tino, e faasagatau i le Upu o le Poto. Aua le faataitaia! O le faaaoga o nei mea, e tusa pe na o sina mea itiiti, e mafai ona oo atu ai i le faalagolago i mea e faaleagaina ai. O le solia o le Upu o le Poto, ua tatou tavavae ese ai i tatou lava mai faamanuiaga e tele na semanu tatou te mauaina. Ua tatou faaeleelea o tatou agaga. O auupega sili e tetee atu ai i faaosoosoga o le tatalo, anapogi, ma le suesue i tusitusiga paia.
Oleg P., 16, Crimea, Iukareane
Aua le Aoao i Ala Tiga:
E le fai mai o tatou taitai o le Ekalesia “na o le faatasi.” Latou te fai mai e leai. Pau le mea o le faatuatua ia aoao i tatou e taitai o le Ekalesia ina ia tatou le aoaoina le ala tiga mo i tatou lava. Ma le isi, manatua o le faatalanoaga mo le pepa malumalu, e fesili ai taitai perisitua pe o e usitai i le Upu o le Poto.
Lauren R., 15, Maryland, ISA
O Le Manatu Māmā e Mafai ona Oo Atu ina Avea ma Mausa:
O le mea e sese ai le fai mai, “Na o le faatasi lava,” o le mea moni e faapea, ua e faia.” Afai ua e faia, o le a faavaivaia ai lou tetee atu i le toe faia. O le manatu māmā e faapea “na o le faatasi lava” e taitaiese ai i tatou mai le ala sa’o ma le vaapiapi. O le taimi lava e te uia ai lena itu, atonu o le a le faigofie ona e toe fulitua i ai, aua o le a e faapea, “E toe tasi lava, ma le isi, e mafai ona ou tuua i soo se taimi ou te manao ai.” Atonu e iu ina oo i le, “E tatau lava ona toe inu se isi ipu pe ula se isi tapaa,” po o le “Ua leai se faamoemoe o i ai mo au.”
Atamu H., 16, British Columbia, Kanata