O Fua o le Tusi a Mamona
Ina ua ou faitauina le Tusi a Mamona, sa i ai se mea moni lava na tupu ia te au. Ua mama a’u avega. Ua suia e le faatuatua ma le faamoemoe o’u popolega, o atugaluga, ma masalosaloga. Ua sili atu ona lagilelei mai le olaga.
A o avea au o se faifeautalai talavou i Siamani, faatoa tasi pe lua masina talu ona amata la’u galuega, e lua ni aafiaga talitutusa na aafia ai la’u molimau i le Tusi a Mamona i se ala maoae lava.
I se tasi taeao a o ma tala’i ma la’u soa, sa ou tuitui ai i se faitotoa o se faifeau o se ekalesia lauiloa. Sa ia valaaulia i maua i totonu, ma sa fai mai ma te nonofo i lana laulau, ma sa vave lava ona ia osofaia le Tusi a Mamona i se tulaga matuai faavevesi ma le malosi. Sa ou malamalama i le tele o mea sa ia fai mai ai, ma sa iloa lelei lava o le agaga finauvale sa ia fai mai ai, peitai o le le lava o lo’u tomai i le gagana Siamani na faigata ai ia te au ona ou tali atu i ai. Sa na ona tuuina atu lava e la’u soa sinia, o se faifeautalai malosi ma le tulaga ese, se molimau mamana e uiga i le tusi, ma sa ma faatulou loa i ai ma o ese. Sa tatavale lo’u fatu. Ou te talitonu sa fai lava si o’u gatete. Sa ou faaletonu.
Ina ua mavae se vaiaso pe lua, sa matou fetaiai ma se alii a o ma talai i le ala, ma sa ioe o ia matou te feiloai. Sa faatulaga se taimi, ma sa ia tuuina mai lona tuatusi i Bückeburg, o se aai matagofie e va i ni nai maila mai le aai sa tofia i ai i ma’ua o Minden, ae e i totonu lava o la matou eria.
O le taimi o le taumalulu, ma o le taeao foi o le Aso Sa na atofa matou te feiloai ai, sa ma tulioso i a ma’ua uila ma vili atu ai i lena mamao atoa, ma faataututu atu ai ma le matagi malosi, ma le malulu sa agi faasaga mai ia i ma’ua. I lo ma maalilili ma tau lē manava, sa ma oomiina ai le logo o le faitotoa o le fale o le tamaloa, ma sa ia tatalaina mai. Sa ma a’ea’e atu i faasitepu agai i lona potu na mautotogi ai, ma sa ia faaulufaleina i ma’ua i totonu. Sa vave ona ma iloaina se agaga finauvale i totonu le potu—o le agaga lava lea e tasi sa ma lagonaina i ni nai vaiaso ua tuanai i le fale o le faifeau.
E lei fai mai lea alii ma te nonofo i lalo. Ae, sa ia tuua le potu mo sina minute. Sa toe foi mai ma ni lomiga eseese o le Tusi Paia, faapauu i luga o le laulau, ma fai mai i se leo tele naua ma le le mafaufau, “O lona uiga lua te fia talanoa [i lotu], a ea?” Ona faasino lea o lona lima i le faamalama, ma avaavau mai, “Ua lelei, ae togi muamua lava la oulua Tusi a Mamona i le Weser [le Vaitafe]!”
Ua lua vaiaso ua mavae talu mai le mea na ma oo i ai ma le faifeau, ma o lea ua mafai ona ou faia se fuaiupu se tasi pe lua i le faaSiamani. Sa ou taumafai e fai. Ae sa na ona toe tuu atu foi e la’u soa sinia se molimau malosi, toafilemu e uiga i le Tusi a Mamona ma faafetai atu ma le faaaloalo i le tamaloa mo lona taimi. Ona ma faatulou atu foi lea i ai ma ma toe foi atu i Minden, ma o le taimi lenei, ua agi mai i o ma’ua tua le matagi.
Sa i ai sa’u molimau i le moni o le Tusi a Mamona, pe a i lo’u manatu i lena taimi. Peitai, sa matua manino mai ma le tiga ina ua mavae na aafiaga e lua, i na taimi matua vavalalata tele, e le’i loloto pe malosi la’u molimau. Sa ou le mautinoa e a’u lava ia ma lo’u tomai e molimau moni atu ai e uiga i le Tusi a Mamona, i se ala mamana ma le faatalitonuina.
Sa tonu ia te au, afai ou te manao ina ia manuia la’u misiona, ua tatau ona mautinoa e moni ma malosi la’u molimau i le Tusi a Mamona. Sa amata ona ou galue ai. Sa ou faitauina ma tatalo ma mafaufau ma manatunatu loloto i ai. Mulimuli ane, sa faamanuiaina e le Alii a’u taumafaiga. Sa oo mai se molimau ia te au ma e lei toe aluese lava; ae, na faatupulaia atili lona malosi i le gasologa o tausaga.
E tele taimi ou te mafaufau ai i na aafiaga e lua. Ou te matua faafetai lava i se soa atamai ma le maua’i, ma i se isi foi itu, ou te faafetai ona o se faifeau le malamalama ma se tamaloa soona naunau, sa foliga mai na mau i o’u tauau ma lulu ia te au. E oo mai i le aso, ua silia mamao ma le 40 tausaga mulimuli ane, ou te manatua pea o la’ua igoa ma auiliiliga o a matou feiloaiga. A ou mafaufau ia te i la’ua, e fafagu mai i lo’u mafaufau fuaitau nei mai le 3 Nifae:
“E pei ona ou poloai atu ia te outou, ia faapea lava ona outou papatiso. Aua foi ne’i i ai finauga ia te outou, e pei ona i ai i aso ua tuanai atu; pe i ai foi finauga ia te outou i le uiga o a’u mataupu, e pei ona i ai i aso ua mavae atu.
“Aua, e moni, e moni, ou te fai atu ia te outou, o le ua i ai le agaga o le finauga, e le mai ia te au lea, a e mai le tiapolo, o le tama lea o finauga, ua ia faaosoina foi loto o tagata e fefinauai ma le ita.
“Faauta, e le o la’u mataupu lea, e faaosoina loto o tagata i le feitagai; a o la’u mataupu lenei, ia mavae atu lava mea faapea” (3 Nifae 11:28–30).
Ou te mafaufau foi i upu maoae a Paulo i le nuu o Kalatia: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le lē gaoiā” (Kalatia 5:22–23).
O fua nei ua ou iloaina ina ua ou faitau i le Tusi a Mamona. O le faitauina o ona itulau, mafaufau i aoaoga faavae maoae a Keriso o loo i ai, ma taumafai e faaaoga nei mea i lo’u olaga—o nei mea uma ua avea o se “suiga tele” (Mosaea 5:2; Alema 5:14) i lo’u loto, o se suiga ua tonu ai ia te au ou te faia ia sili atu; ia ou agalelei atili, faaitiitia le faitio, ia sili atu ona agalelei; ma faasoa atu i isi faamanuiaga sili ua tuuina mai e le Alii ia te au.
O fua nei o le Agaga o le Atua. O fua nei o le Tusi a Mamona.