Faatuatua i le Atua
Luga (mai le tauagavale) Margaret S. Lifferth, fesoasoani muamua; Cheryl C. Lant, peresitene; ma Vicki F. Matsumori, fesoasoani lua.
O Shelby, e iva tausaga na faia le tatalo amata i le afiafi faaleaiga. “Shelby,” na fai atu ai Tina, “Ou te iloa toeitiiti ona uma lea o se tasi o au gaoioiga o le Faatuatua i le Atua. Sa e faia le tatalo faaiu mo le afiafi faaleaiga i nai vaiaso e lei mamao atu. Ua tatau nei ona e faasoa mai ou lagona pe faapefea ona puipui i tatou e le tatalo ma fesoasoani ia tatou latalata ai i le Tama Faalelagi ma le Faaola.”
Na tuua e Sehlby le potu ma sa toe foi ane ma lana tusi o talaaga. Sa ia faitau mai e uiga i nai aso e lei mamao, na tatalo ai i le nofoa pito i tua o le taavale mo se fesoasoani ina ua le ola le taavale. E lei umi ae taunuu ane so latou tuaoi ma fesoasoani e faalelei le faafitauli. Na manatua e Shelby e tatalo aua sa mafaufau o ia i le gaoioiga o le Faatuatua i le Atua.
E pei lava o tamaiti i le lalolagi atoa, na iloa e Shelby o le Faatuatua i le Atua e sili atu nai lo na o se polokalama. O se auala e faatupuina ai le faatuatua a o e aoao e ola i le talalelei a Iesu Keriso.
Ina ua faailoaina mai le polokalama o le Faatuatua i le Atua i le 2003, na saunoa mai ai Peresitene Gordon B. Hinckley, Peresitene Thomas S. Monson, ma Peresitene James E. Faust i se tusi e faapea, “Matou te naunau lava ia atiina ae e alii ma tamaitai se faatuatua sili atu ma le lototele e ala i le aoao ma ola i le talalelei, auauna atu i isi, ma le atiina ae o a latou taleni” (Tusi a le Au Peresitene Sili, 2 Aperila, 2003).
I le lalolagi i ona po nei, o le a outou manaomia le tele o le faatuatua ma le lototele. E mafai ona outou atiina ae nei uiga e ala i le tatalo i aso uma, faitau au tusitusiga paia e le aunoa, ma tausi poloaiga. O nei mea ma isi auala e ola ai i le talalelei o se vaega o manaoga faavae o loo lisiina i le tusitaiala. A atoa lou valu tausaga, o le a e maua loa se tusitaiala o le Faatuatua i le Atua.
I nisi vaega o le lalolagi, e faapotopoto faatasi tamaiti e faalua i le masina faatasi ma se taitai o aso o gaoioiga, e fausia faauoga, faataitai ona ola i le talalelei, ma fai ni mea malie. I nisi foi vaega o le lalolagi lea e toagaogao ai tagata o le Ekalesia pe vavamamao foi mea e nonofo ai tagata, e galulue ai tamaiti ma o latou aiga pe na o i latou foi i le Faatuatua i le Atua. O le a lava le tulaga o e i ai, o le mea aupito i taua ia e sailia se auala e faataitai ai le ola i le talalelei a Iesu Keriso.
E mafai ona fesoasoani atu taitai o le Peraimeri ia te oe. O le au peresitene o le Peraimeri e mafai ona faamalosiau atu ia te oe ma tuu atu ia te oe le avanoa e lipoti atu ai ni gaoioiga ua maea. E mafai ona fesoasoani atu faiaoga i le taulotoina o Mataupu Faavae o le Faatuatua. Mo tamaiti e nonofo i le Iunaite Setete ma Kanata, e mafai e taitai o le lafu ona faatulagaina gaoioiga faalesikauti faatasi ma sini o le Faatuatua i le Atua.
O le Faatuatua i le Atua o se auala foi lea e faamalosia ai lou aiga. O Lindsey ua faatoa atoa le valu o ona tausaga ma ua maua foi lana kopi o le tusitaiala o le Faatuatua i le Atua. Sa latou iloiloina faatasi ma ona matua le tusitaiala. Sa ofo atu Lindsey na te faia le lesona mo le afiafi faaleaiga. Sa ia filifilia se tasi o autu mai lana tusitaiala o le Faatuatua i le Atua. Faatasi ai ma le fesoasoani a lona aiga, sa faia ai e Lindsey le lesona mo le afiafi faaleaiga ma sa faapea foi ona faamaea ai se gaoioiga.
O nisi foi aiga ua latou faaaogaina le Faatuatua i le Atua e fesoasoani ia latou afiafi faaleaiga. O se tasi o aiga na filifilia se mataupu faavae o le faatuatua e aoao ma taulotoina i vaiaso taitasi. O le isi aiga sa tuu atu ia latou fanau e filifili se gaoioiga mai le tusitaiala pe a oo i le taimi o le tamaitiiti e fai ai le lesona.
Mo se gaoioiga mo se matua ma le tamaitiiti (tagai tusitaiala, i. 9), sa fuafua ai le aiga o Mikaele e fai ni pai apu e avatu e tagata taitoatasi o le aiga i se isi tagata. Na fesili Mikaele pe mafai ona ave lana pai i se aiga sa lei i ai le agaga faauo. E ui ina sa popole lona tina ae sa faatauanau pea Mikaele. Na tufa atu e le aiga o Mikaele le pai. Na latou iloa ai sa i ai ni taimi faalelelei i le aiga, ma e le o i latou na faasaga i ai lo latou le fia faauo. Na avea nei aiga ma ni uo mamae ona sa manao Mikaele e ola i le talalelei a Iesu Keriso.
A maea ona e faia mea e manaomia, o le a e maua le tusi faamaonia o loo i le itu i tua o le tusitaiala. O lou peresitene o le Peraimeri, ma le epikopo po o le peresitene o le paranesi o le a saini ai. Ae o le faamanuiaga sili o le a e faataitaia ai le faia o mea ia o le a fesoasoani ia te oe e te ola ai i le talalelei, ma e malosi ma lototele ai.
A maea ona e faataunuuina mea e manaomia mo le Faatuatua i le Atua, o le a sili atu foi ona e saunia mo le mauaina o le Perisitua Arona po o le avea ma se tamaitai talavou amiotonu. O le a e fausia ai ni mamanu mo le ola amiotonu ma maua avanoa e te ola ai i le talalelei, auauna atu i isi, ma atiina ae au taleni. Ae o le mea sili lava, o le a faamalosia ai lau molimau ia Iesu Keriso.