Manatu Faaopoopo mo Taimi o Fetufaaiga, Iuni 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Iuni 2008. Mo le lesona, faatonuga, ma gaoioiga e o faatasi ma nei manatu, tagai i le “O Le A Ou Saunia Au Lava Ao Ou Laitiiti” i itulau U4 ma le U5 o le vaega a tamaiti i le lomiga lenei.

1. Faaali atu ni aitema o talafaasolopito o le aiga e pei o ni tusi talaaga, ata, tusi o mea e manatuaina, ma isi. Talanoa le taua o le tausia o faamaumauga a o tatou aiga. Fesoasoani i tamaiti e sue le MFF 138:47–48, ma faitau faatasi. Talanoa le taua o le faia o galuega faalemalumalu ina ia mafai ona faamauina faatasi aiga e faavavau.

   Ia faamatala faapuupuu atu le faiga o le sailia ma le sauniaina o igoa o tagata o le aiga mo galuega faalemalumalu. Ia faasoa atu se tala lelei a le tagata lava ia i le tuuina atu o se igoa mo galuega faalemalumalu, ma usu se pese po o se viiga e uiga i aiga.

   Ia saunia se pepa o le faasologa o gafa ma se talafaamaumau o le vaega faaleaiga mo tamaiti taitoatasi, ma ia lava se taimi mo i latou e faatumu ai vaega latou te iloa. Faaali atu le tusi taiala o le Faatuatua i le Atua, ma faamanatu atu i tamaiti e faapea o le faatumuina o nei faamaumauga o se gaoioiga lea o loo i le tusi taiala. Ia uunaia i latou e faamaea lenei gaoioiga faatasi ma o latou aiga. Ia valaaulia tamaiti e toe aumai ia fomu ua faatumuina i le Peraimeri ma faasoa atu mea na latou aoaoina e uiga i o latou aiga. Ia tuuina atu le molimau i le taua o galuega o talafaasolopito o aiga ma faamanuiaga o le malumalu, lea e mafai ona faamauina faatasi ai i tatou o ni aiga.

   Mo tamaiti laiti: Aumai ni nai teuga faigofie, ma faaoofu tamaiti e faapei o matua, matua o matua, ma matua o matua o matua ina ia fesoasoani ia i latou ia latou vaai faalemafaufau i tagata o le latou aiga i luga o se pepa o faasologa o gafa.

2. Fai atu i tamaiti e faalogo mo le upu e tasi lea o loo faamatalaina ai le malumalu. Usu le laina, “E paia le malumalu,” mai le “Ou Te Fia Vaai i le Malumalu” (Tusipese a Tamaiti, 99). Faaali atu ni ata o malumalu eseese, ma fai i tamaiti e faamatala atu po o a amioga e talafeagai i lena nofoaga paia.

   Ia valaaulia se tasi o le au epikopo po o le peresitene o le paranesi e talanoa atu e uiga i faatalanoaga o le pepa malumalu. (O nisi o vaega e mafai ona tautalagia: o laei talafeagai mo le faatalanoaga, o fesili o le a fesiligia, ae o ai o loo avea le taitai perisitua ma sui i le taimi o le faatalanoaga.) A maea lana saunoaga, ia talanoaina pe faapefea ona avea le migao, laei tauagafau, ma le tautala ma le agalelei o se vaega o le agavaa e ulu atu i le malumalu. Usu le “Ou Te Fia Vaai i le Malumalu,” ma molimau atu i faamanuiaga o le auai atu i le malumalu.

3. Faatinoga o le pese: “Ou Te Fia Vaai i le Malumalu.” Faailoa atu le pese i le fesili, “O le a le mea e te fia vaai i ai?” Ia maua mai tali, ma fai atu i tamaiti e faalogo mo se mea e te fia vaai i ai. Usu le laina “Ou te fia vaai i le malumalu.” Ia valaaulia se tamaitiiti e uu se ata o le malumalu, ma usu faatasi le laina muamua o le pese. Fai i tamaiti e faalogo mo le taimi o le a latou o atu ai i le malumalu. Usu le laina “Ou te ulu i ai i se aso.” A maea ona mate e tamaiti le tali, ona usu faatasi uma lea o laina.

   Fai i tamaiti e faalogo mo mea e tolu o le a latou faia pe a latou o atu i le malumalu. Usu le laina “E lagona ai le Agaga, faalogo ma tatalo ai.” Usu faatasi le laina. Fai atu ia i latou e faalogo mo mea e tolu na o loo faamatala ai le malumalu a o outou usuina le laina “O le maota o le Atua, e i ai o le alofa.” Usu faatasi le laina. Ia valaaulia se tamaitiiti e faitau le MFF 88:119, ma faamalamalama mai o lenei fuaiupu o loo faamatalaina ai se malumalu. Fai atu ia i latou e faalogo ma sii o latou lima pe a faalogo atu i upu “maota o le Atua.”

   Usu le laina mulimuli o le pese, ma fai atu i tamaiti e toe usu atu ia te oe. Usu faatasi le fuaiupu muamua. Ia molimau atu i le taua o le saunia e auai atu i le malumalu e ala lea i le ola i faatulagaga o le talalelei.

   Ia faaauau ona fesili atu, ma fai i tamaiti e faalogo mo tali a o e usuina le fuaiupu e lua i tamaiti. Ia faamamafa atu le upu feagaiga, faauiga i ni faaupuga faigofie, ma talanoaina le feagaiga na osia i le papatisoga. Fesoasoani i tamaiti ia malamalama o le osia ma le tausia o feagaiga paia o se vaega o tapuaiga i le malumalu.

   E aoao tamaiti ia iloa ona usu se pese i le faalogo soo i ai. Faataitai ia fautuaga nei a o outou iloiloina le pese lenei: (1) Faaopoopo ni nai taga faigofie i upu autu. Mo se faataitaiga: “vaai”—tago i mata; “faalogo”—tago i taliga; “tatalo”—piilima. (2) Fai i tamaiti e tusi o latou lima ia i latou lava i taimi uma latou te usuina ai le “Ou” po o le “O le a ou.” (3) Vaelua le potu, ma valaaulia tamaiti e usu le pese i le isi, ma felafoai ia fuaiupu o le pese.