Taimi o Fetufaaiga

O Le A Ou Saunia Au Lava Ao Ou Laitiiti

SAUNIA E LINDA CHRISTENSEN

“Ia fausia lenei fale i lou igoa ina ia ou faaali atu ai a’u sauniga i lo’u nuu” (MFF 124:40).

O malumalu o se faamanuiaga ia te oe ma lou aiga. Ua silia i le 120 malumalu i le lalolagi atoa. E te iloa le igoa o le malumalu e aupito latalata atu ia te oe? O i ai se ata o se malumalu i lo outou fale? Ua i ai se tagata o lou aiga ua alu i le malumalu e osia ai feagaiga paia?

O le pese a le Peraimeri “Ou Te Fia Vaai i le Malumalu” (Tusipese a Tamaiti, 99) ua aoao mai ai o le malumalu o se “maota o le Atua, e i ai le alofa [ma le matagofie].” Ua aoao mai ai foi o se malumalu “e paia tatou te faamau ai.” O le isi taimi e te usuina ai lenei pese, faalogo i upu “Ou te ulu i ai i se aso.” O se tautinoga lenei ua e faia ia te oe lava ma i le Tama Faalelagi o le a e agavaa e ulu atu i Lona maota paia.

Gaoioiga

Aveese le itulau U4, ma faapipii i se pepa malo. Oti ese le malumalu i luga o laina soloatoa, gaugau i laina togitogi, ma faapipii pito i le itu i totonu o puipui e maua ai se atigipusa. Oti ese kata o O Ou Tulaga Faatalalelei (itulau U4), ma tuu i totonu o le atigipusa malumalu. Filifili se tulaga o le talalelei mai le pusa ma faitau, ma filifili po o le a se mea e mafai ona e faia e te ola ai i lea tulaga. I le afiafi faaleaiga, ia faasoa atu pe faapefea ona e saunia e ala i le ola ai i lea tulaga e te ulu atu i le malumalu i se aso.

Tuu le atigipusa malumalu ma kata O Ou Tulaga Faatalalelei i se vaega faapitoa, e faamanatu atu ai ia te oe e fai filifiliga lelei. Ao e faitauina se tulaga o le talalelei ma mafaufau pe faapefea ona e ola ai, manatua upu nei mai le “Ou te Fia Vaai i le Malumalu”: “O le a ou saunia nei, o lo’u tiute lea.”

Manatu mo Taimi o Fetufaaiga

1. Tusi se ata faigofie o se malumalu. Oti le ata i ni faatafafa e lē tutusa [rectangles] se 12 e faatusa i ni poloka faufale. Faanumera ia fasipepa mai le 1 e oo i le 12. Oti se pepa i ni vaega se 12, ma tusi ai i fasipepa taitasi se upu galue se tasi mai O Ou Tulaga Faatalalelei e 12. (Upu galue: mulimuli, manatua, filifili, avea, faaaoga, fai, ava, tausi, fai ofu, faitau ma vaai, faalogo, saili, ola.) Gaugau fasipepa ia le iloa atu ai le upu galue. Ia saunia ni kopi o le tusitaiala o le Faatuatua i le Atua. Fai le taaloga o le fausiaina o le malumalu. Amata i le faitauina o le MFF 124:40. Tusi le fasifuaiupu “ia fausia lenei fale” i luga o le laupapa. Valaaulia se tamaitiiti e filifili se fasipepa ma faitau le upu galue. Tuu i tamaiti e sue i totonu o le O Ou Tulaga Faatalalelei mo le upu. A maua, ia faitau faatasi le tulaga. Valaaulia le tamaitiiti po o le vasega e mafaufau i se auala e ola ai i lena tulaga. Ona valaaulia lea o le tamaitiiti po o le vasega e sue le poloka faufale 1 ma tuu i luga o le laupapa. Faaauau seia maea le malumalu. Ia faamamafa atu o tulaga uma faatalalelei o mea ia e mafai ona fai e tamaiti ia maua ai se aiga e faavavau.

2. Uu i luga se taga o i ai i totonu ni tusitusiga paia. Tuu atu ni nai faaataataga e fesoasoani ai i tamaiti e mate pe o a ia mea o loo i totonu o le taga. A latou mateiaina, ia susue tusitusiga paia i le Malaki 3:10, ma faitau le fasifuaiupu “ina aumaia mea e sefulu a’i a outou mea uma lava.” Fesili atu i tamaiti e mate mai pe o le a le tulafono o loo faamatala mai e lenei mau. Faitau faatasi le fuaiupu ma faalogo i le folafolaga: “sasaa atu le manuia mo outou.” Valaaulia tamaiti e tau mai nisi o faamanuiaga ua aumai e le Tama Faalelagi mo i latou, ma fai se lisi i luga o le laupapa. Tufa atu i tamaiti taitoatasi se laupepa. Fai atu ia i latou e tusi se ata po o se faaupuga o se faamanuiaga se tasi i luga o le laupepa. A uma ona fai lea i tamaiti, e taai a latou pepa ia pei o se polo. Tuu ia polo i totonu o le taga. Fai atu i se taitai perisitua e faaloloa i luma ona lima e sapo ai polo. Sasaa polo i luga o ona lima ma matau le tutumu o ona lima. Faitau le folafolaga: “sasaa atu le manuia mo outou, ina seia silisili ona tele.” Fesoasoani i tamaiti ia malamalama a tatou usiusitai i le tulafono o le sefuluai, o le a faamanuia i tatou e le Tama Faalelagi i manuia e silisili ona tele. Ia faamalamalama atu o tupe o le sefuluai e fesoasoani e fausia ai malumalu.