O Se Valaaulia i le Aso o Gaoioiga
“Ia faapotopotoina ia faatasi le fanau a le Atua” (Ioane 11:52).
“Manatua le aso o gaoioiga pe a tuua le a’oga nei,” na fai atu ai Tina i le taimi o le inugati i le taeao.
Na mapusela Clarissa. “Ua ou iloa.”
“O le a se mea ua tupu?” Na fesili ai Tina. “Faapea au e te fiafia i le aso o gaoioiga.”
“Na lelei a,” na fai atu ai Clarissa.
“E te manatua lou fiafia na i ai ina ua atoa lou valu tausaga?” Na fesili atu ai Tina. “Sa e fiafia foi ia Uso Cobian.”
“E lelei tele o ia,” o le tala lea a Clarissa. “E faigata tele ona na o ma’ua lava ma Ashley e o atu ai. Ou te fiafia ia Ashley, ma e agalelei o ia i taimi uma ia te au. Ae toeitiiti atoa lona 12, ae o lena faatoa 9 ou tausaga. Ou te le iloa lelei se tala e fai atu ia te ia. E le malie tele.”
Na fusi e Tina ia Clarissa. “Faamalie atu ona e faigata i nisi taimi. E toalaiti lava le tatou Peraimeri ma e tau leai ni teineiti, ae ou te iloa o le a e maua se taimi lelei i le aoauli nei.”
Ina ua tuua le aoga sa savali Clarissa i le vaifale e tasi i le falesa lea e fai ai a latou aso o gaoioiga. Sa faafeiloai fiafia o ia e Uso Cobian ma Ashley. Ina ua uma le tatalo amata, sa faapea atu loa Uso Cobian, “sa ou fesili i le peresitene o le Peraimeri e uiga i teineiti o loo i le tauvalaauga a le Peraimeri ae le o o mai i le aso o gaoioiga po o le Peraimeri. O loo ia te au le lisi lenei o teineiti ma numera o a latou telefoni. Ou te manatu, a tatou telefoni i ai a o lei oo i aso taitasi o gaoioiga, atonu o le a latou auai faatasi mai.”
“O se manatu manaia tele lena!” O le alaga lea a Clarissa. “O le a malie pe a o mai nisi teineiti se toatele.”
Na ataata Uso Cobian. “Ua ou fiafia i lou fiafia i lena manatu, aua ou te manao e te telefoni atu i teineiti a o lei oo i le isi a tatou aso o gaoioiga e sosoo ai.”
“O au?” O le tau mole atu lea a Clarissa. Sa le mautinoa e ia lena mea. Sa tuu atu e Uso Cobian le lisi ia te ia. Na te iloaina teineiti uma mai le aoga, ma o nisi o i latou e fai lava ma o mai i le lotu. Ae atonu o le a taufaafefe le telefoni atu e valaaulia i latou.
“Pe mafai ona e faia?” O le fesili lea a Uso Cobian.
Sa toe tilotilo Clarissa i le lisi. O nisi o nei teineiti latou te tupulaga. O le a sili atu le malie o aso o gaoioiga pe latou o mai foi. “Ua lelei,” sa ia fai atu ai.
A o lei oo i le isi aso o gaoioiga e sosoo ai, sa telefoni atu Clarissa i teineiti o loo i le lisi. Sa ia tuua ni feau pe talanoa foi ia i latou uma lava. Sa le faigata foi.
O le aso na sosoo ai i le aoga, sa fesili atu se tasi o teineiti lea na telefoni i ai Clarissa, o Olevia, pe mafai ona la o faatasi i le aso o gaoioiga. Sa matuai fiafia lava Clarissa! Ina ua tuua le aoga, sa o faatasi Clarissa ma Olevia i le falelotu. Ina ua la ulu atu i le potu Peraimeri, sa faafeiloai i laua e Uso Cobian i se ataata tele lava.
A o lei oo i le isi aso o gaoioiga na sosoo ai, sa toe telefoni foi Clarissa i teineiti. Sa fiafia lava Olevia e toe sau. Na fai mai foi Telesia o le a sau foi. O le aoauli na sosoo ai, sa lagona e Clarissa lona fiafia tele a o latou savavali atu ma Olevia ma Telesia i le falelotu.
O lena po sa faamatala atu e Clarissa i lona tina le malie o le aso o gaoioiga i le i ai o ni teineiti se toatele. “Maimau lava pe a na mafai ona sau Madison,” o le tala lea a Clarissa. “O ia o la’u uo sili lava.”
“Ae aisea e le mafai ai ona sau?” O le fesili lea a Tina.
“Tina, e le o i ai lona igoa i le lisi. E le auai o ia i le Ekalesia.”
“E le afaina lena mea,” o le tala lea a Tina. “O le a e faia le galuega faafaifeautalai pe a e valaauliaina o ia. O lena lava ua avea oe ma se faifeautalai i le faamalosiauina o Olevia ma Telesia.”
Sa mafaufau Clarissa i lena mea. Ina ua ia toe telefoni atu i teineiti o le aso o gaoioiga, sa ia telefoni ai foi ia Madison. Na fesili Madison i lona tina pe mafai ona alu, ma sa fai mai lona tina ioe. Sa le talitonu Clarissa i le faigofie tele. Sa mafaufau o ia pe aisea na ia le valaauliaina ai Madison i masina ua tea!
I le aso o gaoioiga i lena vaiaso, na fai ai e Uso Cobian se faasilasilaga manaia lava. I la latou aso o gaoioiga o le a sosoo ai, o le a i ai sa latou malo faapitoa lava e aoaoina i latou i le teuteuina o keke. Sa ataata Clarissa ma Madison o le tasi i le isi. E foliga mai o le a malie lena gaoioiga! Ina ua latou tuua i lena aoauli, sa faapea atu Madison, “Faafetai mo le valaauliaina o au. Ou te fia sau i le isi gaoioiga e teu ia keke.”
O le aso lava na sosoo ai, na amata talanoa ai Clarissa i ana uo uma i le aoga e uiga i le gaoioiga o le teuina o keke. Sa fesoasoani foi i ai Madison. O le toatele o a laua uo na mananao e o mai.
“Atonu o le a atoa le 15 o teineiti i le isi a matou aso o gaoioiga e sosoo ai,” o le tala atu lea a Clarissa i lona tina.
“Sefululima!” Na alaga ai Tina. “O fea na e maua ai na teineiti e toatele?”
“Ua ou valaauliaina uma teineiti o lau vasega,” o le tala lea a Clarissa.
“Matuai manaia tele!” Na fai atu ai Tina. “Ia ae e sili ai lou faailoa ia Uso Cobian ina ia saunia i ai o ia mo lena aofaiga toatele.”
Sa telefoni atu Clarissa ia Uso Cobian ma tau atu i ai le aofai o teineiti e ono auai i le aso o gaoioiga. I le aso o gaoioiga, sa tumu le potu Peraimeri i teineiti na talatalanoa ma talie a o latou teuina keke. Na faaivi atu le mata o Uso Cobian ia Clarissa ma se ataata tele lava.
Ina ua uma, sa fesoasoani atu Clarissa ia Uso Cobian i le tapenaga o mea. Na sau lana uo o Emeli e faatofa atu. “Faafetai lava,” sa ia fai atu ai ma le matamuli ia Uso Cobian. “E afaina pe a ou valaauliaina lou uso matua ma ou tausoga e toalua i le isi aso o gaoioiga e sosoo ai?”
Na ataata Uso Cobian. “Manaia tele lena, Emili,” o lana tala lea.
Sa le mafai ona faatali Clarissa mo le isi aso o gaoioiga e sosoo ai!
Ata na tusia e Jennifer Tolman