Manatu mo Afiafi Faaleaiga

O nei fautuaga faaleaoaoga e mafai ona faaaoga i potuaoga faapea foi i le aiga. E mafai ona e fetuunaia nei manatu i lou aiga po o le vasega.

“E Le Faigofie,” i. 16: Fai atu i tagata o le aiga e tusi i luga o se fasipepa ni auala na fesoasoani pe na faamanuiaina ai i latou e le Alii. Fai se fagu o le loto faafetai, ma tuu i ai i totonu fasipepa. Ia uunaia tagata o le aiga e faaauau ona faaopoopo i le fagu (pe tusi e uiga i ai i a latou api o talaaga) soo se taimi lava latou te maua ai se aafiaga na faapea ona fesoasoani ai le Alii ia i latou.

“Faamanuiaina i le avea ai ma se Tagata Fou Liliu Mai,” i. 22: E tusa pe o oe o se tagata fou o le ekalesia pe leai, o le atiina ae o faauoga ma tagata o le Ekalesia e taua. I le avea ai o se aiga, ia talanoa i auala e mafai ona e aapa atu ai i tagata o la outou uarota po o le paranesi. Ia faamatala atu o le faamalolosia o nei sootaga e mafai ona fatuina ai ni faauoga tumau, ma e mafai ona fesoasoani ia i tatou ia o mai ia Keriso e ala i le auauna atu i isi.

“O Le A Le Iloa Lava e se Isi,” i. 28: O le a le uiga o le faamatalaga a tagata pe a latou fai mai o le a le iloa lava e se isi? Ia talanoaina pe aisea e sese ai lenei manatu ma pe mafai faapefea e tagata o le aiga ona tetee atu i faaosoosoga. Lisi nisi o faaosoosoga, ma tuu atu i tagata o le aiga e faataitai pe o le a faapefea ona latou tali atu pe afai e tulai mai lena faaosoosoga. Faitau le 1 Korinito 10:13.

“Augatupulaga,” i. 40: Faamatala atu au tala e uiga i lou liua, po o tala e uiga i tuaa o e na mauaina le talalelei. Valaaulia tagata o le aiga e fetufaai atu pe aisea e taua ai le talalelei i o latou olaga.

“O Se Valaaulia i le Aso o Gaoioiga,” i. U10, ma le “E Mafai Ona Avea Au ma Faifeautalai i le Taimi Nei,” i. U14: A uma ona faitau tala nei, ia mafaufau i tagata e mafai ona e valaaulia i se sauniga po o se gaoioiga a le Ekalesia. Lisi tuaoi, uo, ma tagata o aiga. E tusa lava pe e te manatu atonu o le a le fiafia i ai se tagata, ia aofia ai pea o ia i le lisi. E te le iloa lava po o ai o le a taliaina lau valaaulia. A o lei oo i le sauniga po o le gaoioiga, ia filifli ma le agaga tatalo ni tagata o lau lisi, ma valaaulia i latou tou te o faatasi. Ia ofo atu tou te savavali atu faatasi pe tou te o faatasi foi i se taavale pe a mafai. Afai latou te filifili e le auai mai, ia faaauau pea la outou faauoga.