O Le A Le Iloa Lava e se Isi
Sa ou fanau ma ola ae i Burley, Idaho, ISA. Sa i ai se faatoaga a lou tama ma sana lafu solofanua iina, o lea sa ou faaaluina ai lou taimi e galue ai i fafo. Ua leva ona avea lou aiga ma tagata o le Ekalesia, ma sa ou ola ae i se aiga faamaoni. Ae a o ou i ai i le aoga maualuga, sa tofotofoina ai lau molimau e se avanoa sa ou sailia.
Sa ou iloaina se tagata mai le matou aoga maualuga o le sa avea o se tagata aoga faafesuiai. Sa ou faapea e foliga mai o se aafiaga manaia, o lea sa ou sailia ai le manatu o le avea ma se tamaitiiti aoga faafesuiai, maua se tamaitusi o faamatalaga, ma [ou] talosaga loa. Sa taliaina au. O le taimi lena o 16 ou tausaga. E tasi le tausaga na ou aveina ai le mataupu o le faaSiamani, ma o lea na ou manatu ai, e pei foi o lou faufautua, o le a tofia ai i Siamani. O lenei polokalama autu o le faafesuiai, e tusia uma ou faamatalaga, ma faafetaui i aiga e mananao e talia oe, ona tofi lea o oe i se atunuu.
Ina ua talia au, sa tofia au i Pasila, ma sa ou taliaina loa le tofiga. Sa ou nofo i se aiga lelei lava i São Paulo. E toaono le fanau tama ae toatasi le teine, na pei lava o lou aiga. O le mea na lelei ai, sa tautatala i le faaPeretania. Sa avea o se aafiaga matagofie tele, e ui ina sa na o le taumafanafana sa ou i ai.
A o ou i ai i Pasila, sa ou maua ai ni uo sa i ai foi i lena vaitau o le olaga o le fiailoa o mea uma. Sa amata ona latou valaaulia au matou te o e tafafao ma nisi o teineiti na latou fetaui.
E faitau afe maila na ou mamao ese ai mai lou aiga i se atunuu e leai se isi na te iloaina au vagana ai lou aiga na ou nofo ai. Sa faaaoga e uo e valaauliaina au matou te o e tafafao le faaupuga e faapea “O le a le iloa lava e se isi.” I le tele o itu sa sa’o lava. E moni, o le a le iloa lava e se isi o lo’u aiga i Amerika. O au o se talavou, mamao ese mai le aiga, ma se valaaulia e faia se mea sese, ma o le a le iloa lava e se isi.
Ae na ou iloaina o le a ou iloa. Na ou iloaina o le a silafia e le Alii, o lea sa ou fai atu ai leai i a latou valaaulia ma faaauau pea ona fai atu leai. Na faafia ona latou fai mai, ma le manatu e mafai ona latou tauanauina au. Sa le o se luitau na faatasi ona tupu, ae o taimi uma lava sa ou teena ai, sa atili ai lou naunau ia le suia lau tali.
O Le ’Alofaga a Satani
“O le a le iloa lava e se isi” o le ’alofaga lea e faaaoga e Satani mo i tatou i o tatou olaga. E pepelo. Na ou iloaina lena mea mo au lava i le taimi o le taumafanafana sa ou i ai i Pasila. O le gauai atu i le pepelo a Satani, o le mea moni, e toafia ni tagata ua aafia i mea e pei o ponokarafi i le Initoneti. Latou te manatu e mafai ona latou faia i se faiga o le a le iloa lava e se isi. Ae o soo se mea lava, latou te iloaina ma e silafia foi e le Atua.
Faamolemole aua lava nei e talitonu i lena pepelo i soo se tulaga o lou olaga. Ou te faafetai lava ona sa mafai ona ou iloa le uiga pepelo mo le mea sa i ai ma lē gauai atu ai. Sa fesoasoani le Agaga ou te lagona ai le mea moni. Sa ou faalagolago foi i le mea moni e faapea, ona o mea sa ou aoaoina i lou aiga, na ou iloa ai le mea sao. Sa aoaoina au e ou matua i le upu moni. Sa ou aoaoina le upu moni i le Peraimeri, i le Aoga Sa, i le Perisitua Arona, ma i le seminare. O lena faavae o le talalelei sa faia i lou aiga, i le tausiga na ou maua, ma i lesona a le Ekalesia.
O lou aafiaga i le faaosoosoga i le avea ai ma se tamaitiiti aoga faafesuiai na oo mai mai fafo, mai uo faatauanau. O se luitau i fafo o mea na ou talitonu i ai, ma sa mafai ona ou tulai mausali. Ae ina ua oo mai aafiaga faaopoopo ia te au, sa ou iloa ai o le a tofotofoina i tatou mai itu uma. O nisi o luitau aupito faigata o luitau o le itu i totonu [o o tatou loto], pe afai o faaosoosoga ia e tatau ona teenaina e tutupu lea i nofoaga filemu o o tatou loto ma mafaufau.
Tofotofoina o le Alii
O se tasi o nei luitau na oo mai ina ua ou filifili e totogi se sefuluai faamaoni, a o ou nofo ese mai lou aiga. O tausaga uma lava e ave ai i matou e lou tama mo le faatalanoaga o le sefuluai. E fesoasoani o ia i le faaopoopoina o a matou sefuluai, ma matou totogiina ai. O le taimi atoa lava na ou ola ae ai, sa ou atiina ae ai lenei masani o le totogiina o le sefuluai. Ana fai e te fesili mai i lena taimi, semanu ou te fai atu sa i ai sau molimau e uiga i le sefuluai.
Ina ua uma lau aoga maualuga, sa taliaina au i le Iunivesite a Harvard, o lea na ou faigaluega ai i le taumafanafana lena ma maua se tupe e totogi ai mea na ou manaomia sa le aofia i lau sikolasipi. E oo ane i le faaiuga o le semesa muamua, ua ou faaaluina uma ma le faavalevalea le tupe na ou maua ou te ola ai i le tausaga atoa.
I le amataga o le semesa lona lua, sa ou maua ai se galuega. Sa le tele ni ou aso faigaluega aua sa avea au ma se tagata aoga faasoloatoa, ae sa ou faigaluega i ni nai itula o le vaiaso ma maua ai lou totogi muamua lava. Ioe, sa le tele, ae sa lava lea ou te ola ai seia oo i le isi aso totogi.
Ona aliae ai lea o se fesili i lou mafaufau, “Ae faapefea le sefuluai?” Sa ou masani e totogi lau sefuluai ae sa lava i taimi uma le tupe e totogi ai le sefuluai. Ae o lenei ua ou fetaiai ma le luitau: pe e totogi lau sefuluai ae ou te le iloaina pe lava se tupe ou te ola ai i le isi lua vaiaso e sosoo ai?
A o ou mafaufau i ai, sa ou manatuaina le mau i le Malaki 3:10, lea o loo folafola mai ai e le Alii, “Ia outou tofotofo mai ai ia te au i lenei mea, ua fetalai mai ai Ieova o au, pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.
O lea na ou iloa ai o lau tali lena. O le a ou tuu atu lava i le Alii. Sa ou totogiina lau sefuluai, ma le le mautinoa pe lava lau tupe ou te ola ai seia oo i le isi aso totogi. Ma sa tupu se vavega. Na ou aulia lava i le isi lua vaiaso.
Sa mamana lava le oo mai o le lagona ia te au, e tausia e le Alii Ana folafolaga. Na oo mai le Alii e pei ona Ia folafola mai. Pei lava ona fai mai tusitusiga paia, afai e totogi a tatou sefuluai, o le a Ia faamanuia mai i tatou. O lena lava vavega na tupu i vaiaso tailua uma seia oo i le faaiuga o le semesa. O le taimi muamua, sa ou manatu sa i ai sau molimau i le sefuluai, ae o le taimi nei, ona o lau filifiliga sao, ua ou maua ai se molimau mamana e uiga i le sefuluai. E fai e le Alii mea uma na te fetalai mai ai, ma o loo faaauau pea ona tuputupu ae lau molimau mai lea laasaga i lea laasaga.
Talitonu i le Alii
Ou te uunaia outou, a o outou i ai i tausaga o lo outou talavou ma a o e atiina ae lau lava molimau, e tatau ona e talitonu i le Alii i Ana folafolaga. A folafola mai e le Alii se mea, e mafai ona tatou talitonu i ai, aua ua aoao mai e tusitusiga paia, e le pepelo le Atua. E tausia e le Alii Ana folafolaga. Soo se taimi lava e tuuina mai ai e le Alii se folafolaga pe ala mai i Ana perofeta pe tuusao mai foi i Ana tusitusiga paia, ia tatou talitonu i ai.
I tusitusiga paia o loo uunaia ai i tatou e liliu atu i le Alii. “Ia outou ole atu ona outou maua ai lea, ia outou tuitui atu ona toina ai lea ia te outou; aua o le ole atu e maua e ia, e toina foi i le tuitui atu” (3 Nifae 27:29)
Sa ou aoao e ala i nei aafiaga ma isi aafiaga e moni lenei mau. E i ai lava iina i taimi uma le Tama Faalelagi mo i tatou. E tusa pe o o tatou luitau o le itu i fafo po o totonu, o Lana fuafuaga, o Ana tusitusiga paia, o Lona alofa, ma Lana meaalofa o le Agaga Paia o le a fesoasoani ia i tatou.
Sa ou iloaina o le a tofotofoina i tatou mai itu uma. O nisi o luitau aupito faigata o luitau o le itu i totonu i nofoaga filemu o o tatou loto ma mafaufau.
Sa ou totogiina lau sefuluai, ma le le mautinoa pe lava lau tupe ou te ola ai seia oo i le isi aso totogi. Ma sa tupu se vavega. Na ou aulia lava le isi lua vaiaso.
Ata na tusia e Dan Burr