Aoaoga a le Perofeta o Iosefa Samita

Lotogatasi

Aoaoga a Peresitene o le Ekalesia: Iosefa Samita (kosi aoao a le Perisitua Mekisateko ma le Aualofa, 2007), 274, 276, 278.

Na malamalama Iosefa Samita i le mana lea e sau mai le lotogatasi.

I aso popofou o le Ekalesia, na poloaiina ai e le Alii le Au Paia o Aso e Gata Ai ina ia tasi (tagai MFF 38:27). I lona soifuaga atoa, na faatulagaina ai ma tuufaatasia e le Perofeta o Iosefa Samita le Au Paia ina ia ausia le galuega a le Atua. Sa ia aoaoina i latou, taitai i latou, ma uunaia i latou e ositaulaga o latou taimi, taleni, ma meatotino mo le faamoemoe o Siona. O nisi nei o ana aoaoga e uiga i le lotogatasi.

O Le Ala e Fai Ai le Galuega a le Alii

“Ua matou fiafia lava i le iloa ai o loo i ai se agaga o le faatasia o loo i ai i le ekalesia iinei ma le lautele i fafo atu … ; ona o lenei mataupu faavae, ma faapea foi le tulimatai i le galulue faatasi, o le a mafai ai ona tatou tauaveina le faatinoina o faamoemoega o lo tatou Atua.”

“O le lotogatasi o le malosiaga lea. … Ia tuu atu i le Au Paia a le Silisili Ese ia latou atiina ae lenei mataupu faavae, ma o faamanuiaga mamalu o le a fai ma taui, e le gata mo i latou taitoatasi, ae o le Ekalesia atoa.”

Aveeseina o Lagona Manatu Faapito

“Ia manatua e le Au Paia o mea tetele e faalagolago ia latou taumafaiga taitoatasi, ma ua valaauina i latou ia galulue faatasi ma i tatou ma le Agaga Paia i le faataunuuina o le galuega tele o aso gataaga; ma … ia le gata ia tanumia uma manatu faapito, ae ia matua aveesea.”

“Ia tatou iloa tatou te le ola mo i tatou lava, ae mo le Atua; i le faia ai o lena mea, o le a i o tatou luga le faamanuiaga sili i le taimi nei ma le faavavau.”

O Faamanuiaga o le Lotogatasi

“E ala i le faaatoatoaina o le galue, ma le tutu faatasi i taumafaiga, ua na ona tatou faataunuuina ai le galuega tele o aso gataaga … , ae o mea tatou te fiafia i ai, i le faaletino ma le faaleagaga, o le a tele lona alualu i luma, ma o faamanuiaga o le lagi e tatau ona tafe ifo ia i tatou i se tafe e le faalavelaveina.”

Iosefa Samita Laitiiti, saunia e Brad Teare