Taimi o Fetufaaiga

O Le A Avea Au ma se Sooga Malosi

Saunia e Cheryl Esplin

“O Le aiga ua faauuina e le Atua” (“O Le Aiga: O Se Folafolaga i le Lalolagi”).

A o talavou Peresitene Gordon B. Hinckley (1910–2008) sa nonofo lo latou aiga i se faatoaga i le taimi o le taumafanafana. Sa tupu ai lenei aafiaga ia te ia iina:

“Sa i ai se laau mago sa ou manao e toso i lalo. Sa ou faamauina le tasi itu o le filifili i le palau a o le isi tulimanu i le laau. A o amata ona minoi le palau, sa maluelue laitiiti le laau, ona motu lea o le filifili.

“Sa ou tilotilo atu i le sooga lea na motu ma mafaufau pe na faapefea ona motu. Sa ou alu atu i le faleoloa e faatau ai meafaigaluega ma faatau mai ai se sooga ua uma ona lipea. Sa ou toe tuufaatasia, ae o se sooga e le fetaui toe mataga. E lei toe tutusa le filifili [ma le mea sa i ai].”¹

Mafaufau o oe o se vaega o le filifili—o se filifili faaleaiga. Na saunoa Peresitene Hinckley e le tatau ona avea i tatou ma sooga vaivai i le filifili a lo tatou aiga.

O Atamu ma Eva o le uluai aiga lea i luga o le fogaeleele. Sa la amataina le filifili o le aiga. Na poloaiina i laua e le Atua ia fanafanau. Ina ua maua le fanau a Atamu ma Eva sa la aoaoina i latou i le talalelei.

E pei foi ona aoaoina e le fanau a Atamu ma Eva mai o latou matua, ona aoao ai lea o a latou lava fanau, e finagalo foi le Tama Faalelagi ina ia e aoao mai ou matua. Ma a oo ina maua sau fanau, e finagalo o Ia e te aoaoina i latou. E mafai ona e vaai atu ia Atamu ma Eva ma isi aiga amiotonu i tusitusiga paia e aoao mai ai pe faapefea ona e fesoasoani i lou aiga ia avea o ni sooga malolosi i le filifili faaleaiga.

Gaoioiga

Aveese itulau U4, ma faapipii i se pepa malo. Oti ese ia sooga taitasi i luga o laina uliuli mafiafia. Oti ese pito i totonu o sooga, oti le sooga i luga o laina motumotu. Tusi lou igoa i luga o se tasi o sooga ma igoa o ou matua, tuagane, uso, ma matua matutua, uso ma tuagane o lou tina, uso ma tuafafine o lou tama, tausoga, ma isi tagata o le aiga i luga o isi sooga. Ia faafesootai ia sooga. Tautau lau filifili i se mea e faamanatu atu ai ia te oe, o oe o se vaega o se aiga ma e mafai ona avea oe ma se sooga malosi. I se afiafi faaleaiga, tuu atu i tagata o lou aiga e filifili se igoa o loo i luga o sooga ma faamatala se mea se tasi sa latou aoaoina mai i lena tagata na faapea ona fesoasoani ia i latou ia malolosi ai.

Manatu mo Taimi o Fetufaaiga

Tusi mau nei i tua o teutusi taitasi e ono, e tasi le mau i le teutusi: Mose 3:24; Mose 5:1; Mose 5:2; Mose 5:4; Mose 5:5; Mose 5:12. Ia saunia ni pepa se ono ua tusi ai upu nei: faaipoipoga, galulue faatasi, maua fanau, tatalo, usitai i poloaiga, aoao fanau. Oti ese mataitusi, faapipii i se kilipi pepa ia upu taitasi, ma tuu i totonu o se teutusi. Sue ata o aiga o loo faaalia ai upu taitasi. Faaali atu Taga Ata o le Talalelei 119 (Atamu ma Eva o loo Aoaoina le La Fanau). Faamatala faapuupuu le tala ia Atamu ma Eva, ia faamamafa atu o i laua na ala mai ai le faatuina o le mamanu a le Tama Faalelagi mo aiga. Vaevae i ni vaega se ono, ma tuu atu i vaega taitasi se teutusi. Tuu atu i tamaiti e faitau le mau, faasa’o mataitusi, ma faapipii faatasi ia upu. Amata atu i le Mose 3:24 ma faasolo i le faasologa, ia tuu atu i vaega taitasi e faaali atu le latou upu ma filifili se ata e fetaui i ai. Faapipii ata faataamilo i le ata o Atamu ma Eva. Ia faamalamalama atu o le aiga o le nofoaga sili lea e aoao ma ola ai i le talalelei.
Ina ia aoao atu e faamanuiaina e le Tama Faalelagi aiga amiotonu, ia fai ni tala faatino e uiga i atalii o Helamana sa puipuia i se taua. Ia aofia ai vaega mo se faamatala upu, Helamana, ma atalii o Helamana (tagai Alema 53:10–23; 56; 57). Faaaoga ni pine o igoa po o ni teuga faigofie pe a mananao ai. Sa faamanuiaina foi isi aiga amiotonu e le Tama Faalelagi. Vaevae i ni vaega se lua. Tuu atu i vaega taitasi se tasi o tala nei: Aiga o Nifae (1 Nifae 17:7–13; 18:1–6) ma aiga o sa Iareto (Kenese 11:1–9; Eteru 1:33–43). Tuu atu i vaega taitasi e faitau le tala. Faafoliga o oe o se failipoti (faaaoga se faaleotele leo pe a maua), ma faatalanoa vaega taitasi i le fesiligia o ni fesili e aumaia ai faamatalaga o tala taitasi. Tuuina atu le molimau e faamanuiaina e le Tama Faalelagi aiga amiotonu.

Ata na tusia e Thomas S. Child