Avea ma Iosefa
Sa ou faalenaunau tele i le faatinoina o le tala ia Iosefa Samita. Ae na i ai se mea na tupu na suia ai lo’u olaga.
Sa aoao au i lou olaga atoa i le tala ia Iosefa Samita. Sa ou talitonu e moni aua sa ou faatuatuaina i latou o e na aoaoina au. Afai e i ai se tagata e talanoa le lelei e uiga i le Perofeta o Iosefa, sa ou puipuia o ia, e le faapea ona sa i ai sau molimau ia te ia, ae ona o se tulaga lelei lea, ma le iloa o le mea lea na tatau ona ou faia.
O na mea uma na suia ina ua tofia lau uarota e saunia se vaega faapitoa mo se polokalama faaleaganuu a le Siteki a San Salvador El Salvador Ilopango. Sa matou mafaufau ma au uo atonu o le a sili atu ona manaia se tala puupuu malie; sa le ioe i ai lo matou peresitene o Alii Talavou. Sa ia fautuaina ina ia matou faatinoina se tala i nisi o aafiaga o le Perofeta o Iosefa Samita.
Sa matou le fiafia i lea manatu. Sa matou iloaina ma au uo, o le a faatino e isi tagata uma se siva malie po o se tala puupuu, ma sa matou mama e fai se isi mea e ese ai. Na matou iloaina o le a talie mai tagata ia i matou pe a latou vaai ua matou oofu atu i ni ofu i aso la, ma faatinoina se tala mamalu. Sa ou vaai o tupu lena mea i isi mea na fai, ma ou te faapea atu o au foi le isi tagata sa ata ai. Ae peitai, na folafola mai e lo matou peresitene o Alii Talavou ia i matou, afai o le a matou galulue ma le filiga e saunia le matou tala ia Iosefa Samita, o le a leai se tasi e ata.
O lea la, mo le lua masina na sosoo ai, na matou aoaoina ai le tala ia Iosefa Samita. Na faafia ona matou matamata i le ata o le Uluai Faaaliga, ma na matou taulotoina upu uma ma faamatalaga uma o le ata. Na matou valiina se vaaiga tele lava na faaalia ai le Vao Paia ma le lagi avanoa. Na matou faia se faaputuga o papatusi auro ma sa matou maua mai se Tusi Paia lapoa lava, ma se nofoa faaluelue e faaaoga o ni mea faitino e faaaoga i le tala. Na pue e se tasi o au uo e tapiano le viiga “O Le Talosaga Muamua a Iosefa Samita” (Viiga, nu. 14). Sa matou pueina foi leo o manulele o loo pepese i le vao ma le pao o le savali a Iosefa a o ia savali i luga o laulaau. Ina ua matou seiina a matou vaega, na ou seia le vaega e fai ma Iosefa Samita.
I le aso o le faafiafiaga, na matou iloa ai, e pei ona sa faamoemoeina, sa na o i matou lava le vaega e faatinoina se mea mamalu. Ma a o lei oo i lo matou taimi, sa matou faapotopoto faatasi e tatalo ina ia lelei mea uma. Ona tupu ai lea o se mea na faapea ona suia ai lo’u olaga.
Na oo i le taimi ou te alu atu ai i luga o le tulaga. Na tu mai i ou luma le vaaiga o le togalaau. Na ou savali atu i ai ma faalogoina le viiga na pueina o loo tata mai tua. A o ou faia la’u vaega, na ou lagonaina se mea na mu i lou fatafata. Sa pei na ou iloaina o le vaaiga na ou toe faatinoina e moni lava sa tupu, o se tama talavou e laitiiti teisi ifo nai lo au, na tupu moni ai lenei aafiaga. Ina ua ou tootuli i lalo mo le vaaiga o le tatalo, na le matala ou laugutu—ae e le ona o se uunaiga a le tiapolo. Ae, na ou iloaina sa le mafai ona ou tautala e aunoa ma lo’u tagi. Na molimau mai i lo’u loto se malosiaga mamana e faapea, e moni le tala a Iosefa! Na ou lagona se agaga faafetai tele i le Alii mo Iosefa Samita, ma na faapea ona aliae i lou loto se alofa tele mo ia.
Ina ua pupula o’u mata, na ou iloaina ai, na fetagisi foi nisi tagata o le au maimoa. Ou te lei masalosalo na molimau atu le Agaga ia i latou i le paia moni o le mea na matou faaalia.
Ina ua ou faia se misiona i se taimi mulimuli ane, sa ou puipuia lava le Ekalesia ma le Perofeta o Iosefa Samita ae sa le na ona faia ona o se mataupu faavae. Sa ou molimau atu ia te ia, aua e pei ona saunoa mai le Perofeta lava ia, “sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia” (Iosefa Samita—Talafaasolopito 2:25).