O Mai e Faalogo i le Siufofoga o se Perofeta
Fesoasoani e Faamalolo
Mai se saunoaga i le konafesi aoao ia Aperila 2007
Na molimau mai Peresitene Monson e faapea, ua ia i tatou le aia tatau mo le fesoasoani a le Alii.
I le taimi o le Taua Lona II o le Lalolagi, sa faauuina au o se toeaina—i le toe tasi le vaiaso ae ou malaga ese mo tiute i le neivi. Sa i ai se uso o le au epikopo o le matou uarota i le nofoaga o nofoaafi e faamavae atu ia te au. A o lei oo i le taimi e aluese ai le nofoaafi, sa ia tuuina mai i lou lima se tusi: O Le Tusitaulima a Faifeautalai. Sa ou ata ma faapea atu, “O lea ou te alu i le neivi—ae le o se misiona.” Sa ia tali mai, “Ave pea. Atonu lava e aoga.”
Sa aoga. I le faagasologa o a matou aoaoga amata na faatonuina ai i matou e lo matou taitai e faatatau i le auala sili e teu ai o matou lavalava i se ato tele e faaaoga i le sami. Sa ia fautua mai, “Afai e i ai se mea malo laumiumi faatafafa e mafai ona e tuuina i le pito i lalo o le ato, o le a matuai maopoopo lelei ai ou lavalava.” Sa ou mafaufau, “O fea a ou maua ai se mea malo laumiumi faatafafa?” Na faafuasei ona ou manatuaina Le Tusitaulima a Faifeautalai. Ma sa faapena ona tautua ai mo le 12 vaiaso i le pito i lalo o le ato i le sami.
I le po a o lumanai le aso matou te malolo ai i aiga mo le Kerisimasi, sa filemu le nofoaga atoa. E lei leva ae ou iloaina o lau uo i le isi moega ma te sosoo—o se tagata o le Ekalesia, o Leland Merrill—sa oi i le tiga. Sa ou fesili atu, “O le a le mea ua tupu, Merrill?”
Sa ia tali mai, “Ua ou ma’i. Ua ou matua ma’i lava.”
Ua alu lava le taimi; ua faateteleina lona oi. I le naunautai, sa ia musumusu mai ai, “Monson, e le o oe o se toeaina?” Sa ou faailoa atu o lea lava, o lea sa ia aioi mai ai, “Tuu mai so’u faamanuiaga.”
Na ou matua malamalama lelei ou te le’i tuuina atu lava se faamanuiaga. O la’u tatalo i le Atua sa o se augani mo se fesoasoani. Na oo mai le tali: “Vaai i le pito i lalo o lau ato mo le sami.” O lea, i le 2:00 i le vaveao, sa ou sasaaina ai i fafo mea uma o le ato. Ona ou aveina lea O Le Tusitaulima a Faifeautalai i le malamalama o le po ma faitau ai i le ala e faamanuia ai le mai. Tusa ma le 120 seila sa vaavaai mai ma le fia iloa, a o ou faatinoina le faamanuiaga. A o lei uma ona toe teu au mea i lau ato, ua matuai moegapepe ia Leland Merrill.
O le taeao na sosoo ai sa faliu mai ia te au Merrill ma ataata ma fai mai, “Monson, ou te faafetai ona o loo e umia le perisitua!” Sa faaalia lona fiafia ae sa sili atu ai lou loto faafetai—e faafetai e le gata mo le perisitua, ae mo le agavaa e maua le fesoasoani sa ou moomia i se taimi sa manaomia ai.
Afai o loo tatou i ai i le feau a le Alii, ua ia i tatou le aia tatau mo le fesoasoani a le Alii. Ua faafia ona oo mai Lana fesoasoani i lou olaga atoa.
Ata na pueina e David Newman; ata na tusia e Michael T. Malm