Faiaoga i le Vasega Pepe, Faiaoga i le Aiga
E tele mea ua faapitoa ai le tusi lesona fou o le vasega pepe a le Peraimeri, e aofia ai gaoioiga e fesoasoani ai i tamaiti o le vaitausaga o le vasega pepe e aoao upu moni o le talalelei e ala i le vaaia, faalogoina, ma le faia.
Ua 20 masina o Siale, ma e naunau lava e tali atu i aoaoga o le talalelei i le fale. E mafai ona ia tusi atu i le ata o le Faaola ma fai mai, “Iesu.” Ae peitai, a alu o ia i le vasega pepe a le Peraimeri, lea foi e aoao ai ia Iesu, e fai lava si ona matamuli laitiiti.
O Samu ua toeitiiti atoa lona tolu tausaga ma e fiafia lava i le vasega pepe. Ua ia aoaoina i le vasega nisi o pese a le Peraimeri ma e fiafia lava e usu i taimi o afiafi faaleaiga. O le mea moni, ina ua la pepese faatasi ma lona tinamatua, sa faateia o ia i le mafai e Samu ona usu tauloto le tele o pese.
O loo auai Siale ma Samu i le la aafiaga muamua ua faatulagaina e le Ekalesia—o le vasega pepe. O i e faalautele ai e tamaiti o le vaitausaga 18 masina e oo i le tolu tausaga lo latou aoaoina i le talalelei. O le tusi lesona fou a le vasega pepe o le Peraimeri, Vaai ia i O Outou Tamaiti, o se punaoa matagofie mo faiaoga o le vasega pepe faapea ma matua i le fale e aoao ai tamaiti i upumoni autu o le talalelei.
O Se Meafaigaluega Fetuutuunai Faafaiaoga
E mafai e tamaiti o le vaitausaga lenei ona amata malamalama i mataupu faavae faigofie, ae loloto o le talalelei e pei o le moni ma le alofa o le Tama Faalelagi ma Iesu, o le alofa o le aiga, o le mana o le tatalo, o le moni o le Uluai Faaaliga, ma le matagofie o foafoaga a le Atua.
[O tamaiti] e tiotio, manaomia le alofa ma le vaaiga faapelepele, e le umi ona taulai atu i se mea, e manaomia le tomai e tautala, ma e fiafia i gaoioiga eseese. Latou te aoao i taimi uma. Na taua e Peresitene Thomas S. Monson se tamalii fomai iloga o le na saunoa e faapea “o le matua e sili ona maatiati ai le olaga o le tagata o le lua po o le tolu tausaga.”1
I le taimi o le vasega, e fiafia ai tamaiti i gaoioiga o musika, taimi e taaalo ai, taimi o meaai mama, ma se lesona lea e aoaoina ai i latou i aoaoga faavae autu o le talalelei. O lesona o le tusi lesona fou a le vaega pepe ua fuafuaina ina ia fetuutuunai ma fetaui ma manaoga o lenei vaitausaga. E amataina lesona taitasi i se folasaga mo le faiaoga. E faamalamalama faapuupuu ai le aoaoga faavae o le a aoaoina ma aofia ai mau e faatatau i ai. E aofia ai ni motugaafa faafaiaoga ina ia silafia e matua ma faiaoga le mea e faamoemoeina mai tamaiti o le vaitausaga o le vasega pepe ma fetuunai aafiaga faafaiaoga ina ia fetaui ma manaoga o tamaiti. O loo aofia ai i lesona ni gaoioiga eseese e aoao ai e fesoasoani i tamaiti e faalogo i le aoaoga faavae, vaai i se mea e faatatau i le aoaoga faavae, ma usu se pese, fai se gaoioiga faaletino, ma fai se faamatalaga e faatatau i le aoaoga faavae.
O le taitai o le vasega pepe po o le matua, e mafai ona aoaoina atu lesona i soo se faasologa, e pei ona taitaiina ai e musumusuga. Ina ia faamalosia le aoaoina, e mafai ona toe fai lesona ma gaoioiga i vaiaso e sosoo ai pe fai faalua i se taimi se tasi o le vasega pepe, e faalagolago lava i manaoga ma mea e fiafia i ai tamaiti.
O gaoioiga o loo lisiina e tuu i le faitalia pe fai, e mafai ona faaaoga i soo se taimi ma pe faafia foi i le taimi o le vasega pepe. Ua i ai uma fesoasoani vaaia ma gaoioiga i totonu o le tusi lesona.
Molimau i le Faamanuiaina
A o amata fuafuaina le tusi lesona a le vasega pepe, sa faataitai e taitai o vasega i Peraimeri i le lalolagi atoa ia lesona. Sa latou ofoina mai ni fautuaga lelei sa faapea ona tuuina i totonu o le tusi lesona.
Mai le Siteki a Cape Coast i Kana, sa tusia ai e se tasi taitai o le vasega pepe, “E tele ni mea na ou aoaoina a o ou faataitaia lesona. Sa fiafia tamaiti i tala, tali fesili, ma valivali ata. Sa matuai fiafia lava i latou.” Na tusia e se taitai Peraimeri mai Scranton, Penisilevania, ISA: “E toagaogao lava la matou paranesi, ma e le o taimi uma e i ai se matou faiaoga. O nei lesona e mafai ona tuufaatasi i se taimi puupuu ma o le a aoga lava mo tamaiti.”
I le Siteki a Caracas Venesuela Los Teques, ua talisapaia ai e se tasi taitai le mea moni e faapea, o lesona o le a tele ai se avanoa mo le faiaoga e faaaoga ai e pei ona taitaia ai e le Agaga.
“Sa fiafia lava tamaiti i papeti tamailima,” na tusi mai ai se taitai mai Jordan Sisifo, Iuta. “Sa ou tuuina atu i tamaiti se avanoa e faamatala mai ai se tala e faaaoga ai a latou lava papeti. Sa matuai manaia a latou taumafaiga o lea ou te talitonu ai e mafai ona fai lava e i latou mo le afiafi faaleaiga.” Sa ia faaopoopo mai, “O motugaafa faafaiaoga sa fesoasoani tele foi ia te au.”
Mo Matua ma Taitai o Vasega Pepe
O se faamanuiaga i matua po o taitai o le Peraimeri le faatuatuaina i le vaaiga ma le aoaoina o tamaiti o le vaitausaga o le vasega pepe. O nei tamaiti e agavaa lava ma tumu i le faatuatua. E vave ona latou talitonu, naunau e aoao, ma fiafia e auai i gaoioiga. E tupuolaola i latou i se siosiomaga o le alofa ma le malamalama o le talalelei.
O le tusi lesona fou a le vasega pepe o le Peraimeri, pe a faaaogaina e ala i musumusuga ma le molimau, o le a fesoasoani i matua ma taitai o le Peraimeri i le lalolagi atoa e aoao atu ai le talalelei a Iesu Keriso i tamaiti laiti, e pei o Siale ma Samu.
O faiaoga i le vasega pepe ma matua i le fale e mafai ona faaaogaina le Vaai ia i O Outou Tamaiti e aoao atu ai i tamaiti upumoni faavae o le talalelei.
O lesona taitasi o loo aofia ai ni itulau se lua o fesoasoani vaaia e faamamafaina ai le aoaoga faavae o loo aoaoina i le lesona.
Atamu ma Eva
Noa
Mose
O tamaiti o le vaitausaga o le vasega pepe e tupuolaola i se siosiomaga o le alofa ma le malamalama o le talalelei.
O motugaafa faafaiaoga e fesoasoani i matua ma faiaoga i auala e fetuunai ai le lesona ina ia fetaui ma manaoga o tamaiti.
Tauagavale: ata na saunia e le Busath Photography; taumatau: Taimi mo le Faitauina o Tala i Kalilaia, saunia e Del Parson; ata na saunia e Christina Smith; ata laina na saunia e Beth Whittaker
Tauagavale i luga: ata na tusia e Jerry Thompson; taumatau i le pito: Keriso ma Tamaiti o le Tusi a Mamona, saunia e Del Parson