E Le Faigofie
… le avea ma se tagata e toatasi o le Ekalesia i totonu o lo’u aiga. Ae o le mea moni e le o na o au.
Sa ou ola ae i le Ekalesia Metotisi. E ui e masani na o le Kerisimasi ma le Eseta e o ai lo matou aiga i le lotu, ae na ou iloaina lava e i ai so’u Tama o loo i le Lagi. Sa masani ona matou tatalo faatasi ma lou uso ma lou tina. O mea na aoao mai e ou matua ia te au a o ou laitiiti na saunia ai au mo mea o le a ou aoaoina i le lumanai.
O le vasega ono na ou iloa ai o le a tetea ou matua. Sa ou lagona le loto nutimomoia ma le matuai tuua toatasi lava. Na mafai ona malamalama lau uo o Courtney ia te au aua na tetea lava ona matua a o laitiiti o ia. Na avea o ia ma au uo lelei lava.
Sa ma nofonofo ma Courtney i luga o lo’u moega ma ma talanoa ai, ma o le taimi muamua lea na ia faailoa mai ai le Ekalesia ia te au. Na te le’i auiliilia maia. Ae sa na ona fesili mai lava pe ou te manao ma te o i le lotu i le Aso Sa. Sa amata ona ma o i le lotu pe taitasi lava, ona sosoo ai lea ma lou alu i Aso Sa uma lava. Ina ua atoa lou 12, sa iu foi ina ou alu i le Mutuale. Sa i ai se mea iina. Ou te le’i iloaina pe o le a, ae sa ou fiafia i ai.
O le vasega fitu na faailoa atu ai au e Courtney ma se isi uo lelei o Aubrey, i faifeautalai. E lei leva ae ou malamalama i le uiga o saunoaga a faifeautalai pe a latou talanoa e uiga i le Agaga. Na ou iloaina e moni le Ekalesia ina ua uma lau lesona lona lua.
E ui lava i la’u molimau i le talalelei, ae sa ou matuai fefe lava e fai i ou matua pe mafai ona ou papatiso. Na faaauau ona ou alu i le lotu ma maua ni aafiaga matagofie e fausia ai la’u molimau, ae sa ou tolopoina lava le “fesili tele” mo le lua tausaga.
I lou tausaga muamua i le aoga maualuga, na ou lesitala ai i le seminare, ma e oo ane ia Novema ua ou iloaina e tatau lava ona ou fesili [i o’u matua]. Sa ma talanoa ma tina. Sa fai mai o ia, o le Ekalesia na te faia suiga ia te au mo lou lelei, ma afai o le papatisoina o le mea lea ua ou manao tele i ai, ona fai lea. O ou mafaufauga muamua lava o le, “Aisea ea na ou faatalitali umi ai?”
Ona ou telefoni lea i lou tama, ae sa faalefiafia tele o ia. Ina ua ou fesili i ai pe mafai ona ou papatiso, sa fai mai o ia e leai. Sa fai mai e manao ou te alu muamua i isi lotu. O lea na ou alu ai i isi lotu, ma na ou feiloai ai i nisi tagata lelei—o tagata na soifua i ni olaga amiotonu. Ae na leai se mea na mafai ona suia le lagona na ou lagonaina pe a ou tuvae i le falesa o le Au Paia o Aso e Gata Ai. O Fepuari na ou toe telefoni ai i lo’u tama ma faapea atu, “Ou te papatiso i le aso 7 o Mati. Ou te faamoemoe lava o le a e i ai.”
Na o mai lou aiga atoa, na aofia ai ma lo’u tama. O le i ai o lo’u aiga iina o se mea aupito taua lea ia te au. O le aso sili lea ona mataina i lou olaga.
O nisi taimi e fesili mai ai tagata: “E faapefea ona e faia? E faapefea ona tumau lou toaga i le Ekalesia ae ua na o oe lava? E leai se isi e fafaguina oe e te alu i le lotu po o le seminare. E na o oe lava.”
Ia, e faigofie lava le tali. Ou te le o na o au. O loo i ai ou luitau talu mai lou papatisoga—e le faigofie le avea ma se tagata e toatasi o le Ekalesia i totonu o lo’u aiga. Ae ua folafola mai e le Alii, na te le tuua lava na o i tatou (tagai Ioane 14:16–18). E alofa tele le Tama Faalelagi ia i tatou o lea na Ia auina mai ai Keriso e maliu mo i tatou. E mafai faapefea ona galo ia te Ia i tatou?
O le olaga e faigata, ma na tatou oo uma lava i taimi na faapea ona tatou lagonaina ai le leai o so tatou malosi ma vaivai o tatou faatuatua. Ae afai o le a tatou pipii pea i Le e sili ona alofa ia i tatou—o le Tama Faalelagi—ma faamalosia lo tatou faia ma Ia e ala i le suesue ma tatalo, o le a faamanuiaina i tatou. Ua folafola mai le Alii: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou” (MFF 84:88).
Faamatalaga mai le O Le Afio Mai Faalua, na saunia e Grant Romney Clawson; ata na tusia e Daniel Lewis