Elders, E Manaomia se Lifi?
Ina ua uma se aso o le aveina o la’u pasi i Vitoria, Ausetalia, sa ou faia la’u malaga mulimuli o le afiafi, e agai atu i le fale. I le ala, sa ou vaaia ai ni alii talavou laei lelei o savavali atu. Sa tonu ia te au e faatu i ai le pasi ma fesili pe la te mananao i se lifi.
Sa ou fesiligia i laua pe aisea ua la faia ai ni pine o o la igoa, ofutino pape, ma ni fusiua. Na faamatala mai e se tasi o i laua o faifeautalai mo le Ekalesia a Iesu Keriso o le Au Paia o Aso e Gata Ai. Sa ou fesili foi e uiga i le la galuega, ma sa ou lagonaina na i ai se mea na faatumulia ai le pasi, lea sa ou iloaina mulimuli, o le Agaga Paia. Ina ua ou fai atu ia i laua e faamatala mai nisi mea e uiga ia Iesu Keriso, sa le mafai ona taofiofi lo’u fiafia i a laua tali.
O le mea na leaga ai, ua fai si leva o le afiafi, o lea na ou tuua ai faifeautalai i Dandenong. Mulimuli ane, sa ou faanoanoa ina ua ou iloaina ou te lei maua se numera o le la telefoni. Sa ou tatalo mo ni vaiaso ina ia ou toe feiloai ia i laua. A ui atu lau pasi i le auala, ou te autiloa i laua. Na mavae atu masina, ona tupu ai lea o se mea na le talitonuina i lou aso fanau, 19 o Aokuso, 2002.
A o ma aai i le aoauli ma lou toalua o Camelia, sa tuitui mai le faitotoa. Ina ua ia tatalaina, sa ou faalogoina ni leo ou te masani ai. O faifeautalai ia sa ou feiloai i ai i luga o le pasi! Na tutusa lava foi lo la tetei i le vaai mai o au, ma lou vaaia foi o i laua. Sa la tala’i tuitui i lo matou auala, ma na taitai mai i laua i le matou fale. Na tali mai au talosaga.
Na vave lava ona amata aoaoina i matou e Elder Jason Frandsen ma James Thieler. Sa fou ia i matou le Tusi a Mamona ma le Perofeta o Iosefa Samita, ae sa faigofie ona matou malamalama i le talalelei ona sa i ai so matou talaaga faaKerisiano. Sa talosaga mai faifeautalai ina ia matou tatalo e uiga i ai ma mafaufau loloto i mea sa matou aoaoina. A o matou faia, sa matou lagonaina le Agaga, o se manao e auai i le ekalesia, ma se musumusuga ina ia papatisoina. Ua faamanuiaina lava i matou talu mai lena taimi.
O le taimi nei, i le mavae ai o nai tausaga o loo ou avepasi lava, ma faatietie foi faifeautalai i lau pasi. Ae o le taimi lenei, o loo ou fesoasoani i le galuega faafaifeautalai e ala i le faailoa atu o tagata ia i latou ma fetufaai atu le Tusi a Mamona ma isi tusi a le Ekalesia i au pasese.
E le misi lava le vaaia o lo’u fiafia e tagata i luga o lau pasi. Ma a latou fesili mai pe aisea, na o lo’u fai lava i ai, “Ua faia e le Alii lenei mea mo au. E mafai foi ona Ia suia lou olaga.”