Savali a le Au Peresitene Sili
O Fua Taua o le Uluai Faaaliga
I tausaga o lou tuputupu ae i Siamani, sa ou auai atu ai le lotu i le tele o nofoaga ma tulaga eseese—i nai tamai potu faatauvaa i le pito i tua, i ni fale taugata, faapea ma ni faletapuai faaonaponei ua sili ona lelei. O nei fale uma e tasi lava le mea taua na tutusa ai: sa i ai le Agaga o le Atua. Sa mafai ona lagonaina ai le alofa o le Faaola a o matou potopoto o se paranesi po o se uarota faaleaiga.
O le falelotu o Zwickau sa i ai se okeni pamu tuai lava. O Aso Sa uma lava e tofi ai se alii talavou e tuleiina i luga ma lalo le vae ina ia faaaoga ai le okeni. E oo lava i le taimi ae lei avea au ma Perisitua Arona, sa ou maua lava le faamanuiaga silisili i nisi taimi e lagolago atu ai i lena galuega taua.
A o usuina e le aofia a matou viiga faapelepele o le Toefuataiga, ou te pamuina ma lou malosi atoa ina ia aua lava nei leai se ea i le okeni. E le mafai ona sese le vaaiga i mata o le ta okeni e faailoa mai ai pe o lelei la’u galuega pe moomia foi ona faatopetope au taumafaiga. Sa masani ona ou lagonaina le faamamaluina ona o le taua o lenei tiute ma le faatuatuaga na tuuina mai e le ta okeni ia te au. O se lagona manaia o le faataunuuina, le i ai o se tiutetauave ma le avea ma se itutino o lenei galuega tele.
Sa i ai se isi aoga faaopoopo na maua mai i lenei tofiga: o le tagata e pamuina le ea e nofo i se nofoa faapitoa e maua ai se vaaiga maoae i tioata lanu lea e faamatagofie ai le vaega i luma o le faletapuai. O le tioata lanu o loo i ai le ata o le Uluai Faaaliga, faatasi ai ma Iosefa Samita o loo tootuli i le Vao Paia ma vaai ae i le lagi i se malamalama faaniutu.
I le taimi o viiga a le faapotopotoga faapea ma le taimi o lauga ma molimau e faia e o matou tagata, e masani ona ou vaai atu ai i lenei ata o se taimi sili ona paia i le talafaasolopito o le lalolagi. I la’u vaaiga faalemafaufau, sa ou vaaia ai Iosefa o mauaina le malamalama, molimau, ma faatonuga paia a o avea o ia ma meafaigaluega faapaiaina i le aao o lo tatou Tama Faalelagi.
Sa ou lagonaina se agaga tulagaese a o ou vaavaai atu i le vaaiga matagofie i lenei ata o loo i le tioata, o se taulealea ua talitonu i totonu o se togavao paia o le na faia se faaiuga lototoa e tatalo atu ma le faamaoni i lo tatou Tama Faalelagi—o se Tama o le na faafofoga ma tali mai ma le alofa ia te ia.
O Le Molimau a le Agaga
Sa ou i ai iina, o se alii talavou–ina ua maea le Taua Lona Lua o le Lalolagi i Siamani, ma sa ou nofo i se aai ua faatafunaina, e fiaafe maila le mamao ese mai Palamaira, Niu Ioka, i Amerika i Matu, ma ua silia ma le selau tausaga talu ona tupu lena mea. O le mana silisiliese o le Agaga Paia, na ou lagona ai i lo’u loto ma lo’u mafaufau e moni lava, na vaai Iosefa Samita i le Atua ma Iesu Keriso, ma na faalogo foi i o Laua siufofoga. Na faamafanafanaina e le Agaga o le Atua lo’u tagata i lea vaitau o le talavou faatasi ma se faamautinoaga i le moni o lenei taimi paia lea na mafua ai le amataga o se taumafaiga i le lalolagi atoa na fuafua ina ia “taavalevale atu seia tumu ai le lalolagi atoa” (MFF 65:2). Sa ou talitonu i le molimau a Iosefa Samita e uiga i lena aafiaga mamalu i le Vao Paia, ma ua ou iloa i le taimi nei. Na toe fetalai mai le Atua i le tagata!
Pe a toe tepa i tua, ou te faafetai ai i le tele o uo o e na fesoasoani ia te au i lo’u talavou ina ia maua se molimau i le Ekalesia toefuataiina a Iesu Keriso. Na muamua ona ou faatinoina se faatuatua faigofie i a latou molimau, ona ou mauaina ai lea o se molimau paia a le Agaga i lo’u mafaufau ma lo’u loto. Ou te faitaulia Iosefa Samita faatasi ma e o a latou molimau ia Keriso na fesoasoani ia te au ina ia atiina ae ai la’u lava molimau i le Faaola. Ae ou te lei iloaina le aoaoga a le Agaga na molimau mai ia te au e faapea o Iosefa Samita o se perofeta a le Atua, ae na lagona i lou loto talavou o ia o se uo a le Atua ma o lea, ua tatau ai lava, ona avea foi o ia ma sa’u uo. Na ou iloa na mafai ona ou faatuatuaina Iosefa Samita.
O loo aoao mai e tusitusiga paia ia i tatou, o meaalofa faaleagaga e tuuina atu ia i latou o e ole atu i le Atua, o e alolofa ia te Ia, ma i latou o e tausia Ana poloaiga (tagai MFF 46:9).
“Aua e le tuuina atu meaalofa uma ia te i latou taitoatasi; aua e i ai meaalofa e tele, ae tuuina atu e le Agaga o le Atua se meaalofa i tagata taitoatasi.
“Ua tuuina atu i nisi le tasi, a o isi ua tuuina atu i ai se isi, ina ia manuia ai i latou uma” (MFF 46:11–12).
O le taimi nei ua ou iloaina ai o la’u molimau talavou na matuai faamanuiaina lava mai le molimau a le Perofeta o Iosefa Samita ma le toatele o uo i totonu o le Ekalesia o e iloaina “e ala i le Agaga Paia … o Iesu Keriso o le Alo o le Atua, ma sa faasatauroina o ia mo agasala a le lalolagi” (MFF 46:13). O a latou faataitaiga lelei, alolofa, lima fesoasoani, na faamanuiaina ai au ina ia mauaina se isi meaalofa faapitoa a le Agaga o loo ta’ua i tusitusiga paia a o o’u naunau mo se isi malamalama ma le upumoni: “Ua foaiina atu i isi ia talitonu i a latou upu, ina ia latou maua foi le olaga faavavau pe afai latou te tumau pea i le faatuatua” (MFF 46:14). E maeu le manaia ma le taua o se meaalofa faapenei!
O Le Meaalofa o le Faatuatua
A o tatou faamaualalo faamaoni i tatou lava, o le a faamanuiaina i tatou i lenei meaalofa ina ia faatuatua ma faamoemoe mo mea e le o vaaia ae moni (tagai Alema 32:21). A o tatou fiafia ai i afioga ua tuuina mai ia i tatou i tusitusiga paia ma perofeta soifua—e tusa lava pe na ona tatou mananao ia talitonu—ma aua nei teenaina le Agaga o le Alii, o le a faateleina o tatou loto ma o le a faamalamalamaina o tatou mafaufau (tagai Alema 32:26–28).
Na faamalamalamaina e le Faaola lava Ia lenei mataupu faavae o le alofa mutimutivale i le lalolagi atoa i Lana tatalo maoae faapuluvaga, na tuuina atu e le gata mo Ana Aposetolo ae mo le Au Paia uma foi, e oo lava ia i tatou i aso nei, po o fea lava tatou te ola ai. Na Ia fetalai:
“E le faapito lau tatalo mo i latou nei, a o i latou foi e faatuatua ia te au ona o la latou upu;
“Ina ia tasi i latou uma; faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua: ina ia talitonu le lalolagi ua e auina mai au” (Ioane 17:20–21; ua faatusilima mea e faamamafa).
O le auala lenei na faamanuiaina ai e le Uluai Faaaliga a Iosefa Samita o tatou lava olaga patino, o olaga o aiga, ma faapea ai ma le aiga atoa o tagata soifua—ua tatou talitonu ia Iesu Keriso e ala i le molimau a le Perofeta o Iosefa Samita. Na maua e perofeta ma aposetolo mai lava i le talafaasolopito o tagata soifua ia faaaliga paia e talitutusa ma le faaaliga a Iosefa. Na vaai Mose i fofoga o le Atua ma sa ia aoaoina ai o ia o se atalii o le Atua “ua faatusa lava oe i [Lona] Atalii e Toatasi na Fanaua” (Mose 1:6). Na molimau mai le Aposetolo o Paulo e faapea, na faaali atu le Iesu Keriso toetu ia te ia i le ala i Tamaseko (tagai Galuega 26:9–23). O lenei aafiaga na taitaiina atu ai Paulo e avea ma se tasi o faifeautalai maoae a le Alii. O le faalogoina o le molimau a Paulo e uiga i lana faaaliga faalelagi i le taimi o le faamasinoga i Kaisareia, na tautino atu ai e le Tupu malosi o Akeripa, “Toeitiiti ona e faaliliuina lea o au e fai ma Kerisiano” (Galuega 26:28).
Ma na toatele isi perofeta anamua o e na tuuina mai foi ni molimau mamana e uiga ia Keriso. O nei faaaliga uma, i aso anamua ma ona po nei, na taitaiina atu ai i latou o e na talitonu i le pogai paia o le amiotonu uma ma le faamoemoe—i le Atua, lo tatou Tama Faalelagi, ma i Lona Alo o Iesu Keriso.
Ua fetalai mai le Atua ia Iosefa Samita mo le faamoemoega o le faamanuiaina o fanau uma a le Atua i Lona alofa tunoa ma le alofa, e oo lava i taimi o le le mautonu ma le le saogalemu, o taua ma tala i taua, o faalavelave faalenatura ma faaletagata lava ia. Na fetalai le Faaola, “Faauta, ua faaloaloa atu lou lima alofa ia te outou, ai se sau, ou te talia o ia” (3 Nifae 9:14). Ma o i latou uma o e talia lenei valaaulia o le a “siomia i latou i lona alofa tele e le mafaatusaina” (Alema 26:15).
E ala i lo tatou faatuatua i le molimau patino a le Perofeta o Iosefa, ma le moni o le Uluai Faaaliga, e ala i le suesue ma tatalo, loloto ma le faamaoni, o le a faamanuiaina ai i tatou i se faatuatua mausali i le Faaola o le lalolagi, o le na fetalai ia Iosefa “i le taeao lava o se aso matagofie ma le manino, i le amataga o le tau totogo ae o laau i le tausaga e afe valu selau lua sefulu” (Iosefa Samita—Talafaasolopito 2:14).
O le faatuatua ia Iesu Keriso ma se molimau ia te Ia ma Lana Togiola mo le lalolagi atoa, ua le na o se aoaoga faavae e i ai se taua tele faalelotu. O se faatuatua faapena o se meaalofa i le atulaulau, e mamalu i itu uma faaleaganuu o lenei lalolagi, e le afaina po o le a le ituaiga, lanu, gagana, atunuu, po o le tulaga faalevafealoai ma faaletamaoaiga. O mana o le mafaufau toto’a e mafai ona faaaoga e taumafai ai ia malamalama i lenei meaalofa, ae o i latou o e sili ona lagonaina ona aafiaga loloto o i latou ia o e naunau e talia ona faamanuiaga, lea e oo mai i se olaga atoatoa ma mama o le mulimuli i le ala o le salamo moni ma le ola i poloaiga a le Atua.
Agaga Faafetai mo se Perofeta
A o tatou manatuaina ma faamamaluina le Perofeta o Iosefa Samita, e oo atu lo’u loto ia te ia ma le agaga faafetai. O ia o se alii talavou lelei, faamaoni, lotomaualalo, atamai, ma le toa, o lona loto e maoae ma se faatuatua e le maluelue i le Atua. Sa amiosa’o. I le tali i lana tatalo faamaualalo, na toe tatala mai ai le lagi. Na vaai moni Iosefa Samita i se faaaliga vaaia. Na ia iloaina, ma na ia iloaina na silafia e le Atua, ma e le mafai ona ia faafitia (tagai Iosefa Samita—Talafaasolopito 2:25).
E ala i lana galuega ma lana osigataulaga, ua ou maua ai nei se malamalamaaga moni i lo tatou Tama Faalelagi ma Lona Alo, lo tatou Togiola ma le Faaola, o Iesu Keriso, ma ua mafai ona ou lagonaina le mana o le Agaga Paia ma iloa le fuafuaga a le Tama Faalelagi mo i tatou, o Lana fanau. Ia te au lava ia, o fua moni nei o le Uluai Faaaliga.
Ou te faafetai lava ona i le amataga mai o lou olaga na faamanuiaina ai au i se faatuatua faatauvaa e faapea, o Iosefa Samita o se perofeta a le Atua, ma sa vaai o ia i se faaaliga i le Atua le Tama ma Lona Alo, o Iesu Keriso. O Iosefa Samita na faaliliuina le Tusi a Mamona e ala i le meaalofa ma le mana o le Atua. O lena molimau ua faafia ma fia ona faamautuina mai ia te au.
Ou te molimau atu o loo soifua Iesu Keriso, ma o Ia o le Mesia. E i ai sau molimau patino o Ia o le Faaola ma le Togiola o tagata uma. Na ou maua lenei malamalama e ala i le [meaalofa] le mafaamatalaina le filemu ma le mana o le Agaga o le Atua, ma o le faanaunauga o lou loto ma lou mafaufau ia ou mama ma faamaoni i le tautuaina o Ia i le taimi nei ma le faavavau.
O le auala lenei na faamanuiaina ai e le Uluai Faaaliga a Iosefa Samita o tatou lava olaga patino, o olaga o aiga, ma faapea ai ma le aiga atoa o tagata soifua—ua tatou talitonu ia Iesu Keriso e ala i le molimau a le Perofeta o Iosefa Samita.
O le faatuatua ia Iesu Keriso ma se molimau ia te Ia ma Lana Togiola mo le lalolagi atoa, ua le na o se aoaoga faavae e i ai se taua tele faalelotu. O se faatuatua faapena o se meaalofa i le atulaulau, e mamalu i itu uma faaleaganuu o lenei lalolagi, e le afaina po o le a le ituaiga, lanu, gagana, atunuu, po o le tulaga faalevafealoai ma faaletamaoaiga.
O Manaoga o Lo’u Loto, saunia e Walter Rane, mai faaaloaloga a le Falemataaga o Talafaasolopito ma Faatufugaga a le Ekalesia
Ata na saunia e Matthew Reier; Ua Toetu o Ia, saunia e Del Parson