Fesoasoani i Tagata Fou Liliu Mai ia Tumau le Malolosi
O loo tatou galulue uma i le faagasologa o le faatumauina o tagata fou liliu mai. O le faagasologa faifai pea o le liuaina—o le liliu atu ma le foi atu e le aunoa i le Alii.
Ata pue o Sister Tanner saunia e le Busath Photography; ata na saunia e Henrik Als; ata na saunia e Steve Kropp
Ina ua ou asiasi atu i Pasila i saute i se taimi ua mavae, sa ma o faatasi ai ma lou toalua. O le eria lenei sa talai ai o ia i lana misiona. I se tasi afiafi ina ua ma taunuu atu i se fonotaga, sa faafeiloaia i maua i le faitotoa e se tina talavou o le na ia faailoa mai o ia o la’u faamatalaupu mo le fonotaga. Sa faliu atu o ia ma le fiafia i lo’u toalua ma faapea atu, “Elder Tanner, o lau susuga lea na aumaia le talalelei i lou aiga i le tele o tausaga ua mavae. Sa ou laitiiti lava i le taimi lena, ae sa ou ola ae o o’u faalogo lava i lou suafa e uiga i tagata muamua na papatiso o lo’u aiga.” Ona ia faamatala mai lea i le faamaoni o tagata taitoatasi o lona aiga i le Ekalesia i le aluga o tausaga. Oka se toe faatasiga ina a ootia!
I le taimi o le fonotaga, a o tilotilo atu lou toalua i le faapotopotoga, sa ia vaaia ai isi na toatele ai le aofia o e sa ia aoaoina i le talalelei ma o e sa tumau le faamaoni. Ina ua ia tuuina atu lana molimau, sa faailoa atu e lou toalua lona olioli i le iloaina o loo tumau pea lo latou faamaoni. Fai mai o ia, na te manatua ai le tala o le Tusi a Mamona lea na feiloai ai Alema ma ana uo pele, o atalii o Mosaea, a o alu malaga o ia:
“O lenei, o nei atalii o Mosaea sa faatasi ma Alema i le aso na muai faaalia mai ai le agelu ia te ia; o le mea lea na olioli tele ai Alema ina ua vaai atu o ia i ona uso; o le mea sili foi na faateleina ai lona fiafia, o ona uso i latou i la le Atua” (Alema 17:2; ua faatusilima mea e faamamafa).
O lena afiafi i Pasila, na faapena foi ona feiloai ai lou toalua i ana uo pele mai aso ua mavae, o e “o ona uso [ma tuafafine] i latou i la le Atua.”
O le manao lenei o faifeautalai faamaoni uma: ina ia tumau i le Ekalesia ia tagata fou liliu mai ma “[tumau] malolosi i latou i le malamalama o le upu moni” (Alema 17:2). O le manao lenei o matua faamaoni uma: ina ia tumau le faamaoni o a latou fanau i le faatuatua. O le manao foi lenei o taitai o le Ekalesia mo tagata o loo latou vaaia, ma o le finagalo moni foi lea o lo tatou Tama oi le Lagi mo Ana fanau (tagai Mose 1:39).
Sailia o i Latou O E Se Ese
Ua ootia lava au i le faafia ona o le faaali mai e le Alii o Lona alofa mo Lona nuu, e tusa lava pe latou te se ese—atonu e faapitoa lava i le taimi latou te se ese ai. Mafaufau i le faataoto na tuuina mai e le Faaola e uiga i mea e leiloloa: mamoe, tupe, ma se atalii faamaumauoa (tagai Luka 15). Sa saili e le leoleo mamoe le mamoe na leiloa; sa sue faatapito e le fafine lona fale mo lana tupe na leiloa; na tamoe atu le tama i lona atalii faalogogata ua “iloa mamao atu foi [o ia] … ua [fusi] ia te ia, ma [sogi] atu ia te ia” (Luka 15:20). E faapena foi, i le faataoto i le laau olive, tatou te vaaia ai le alofa faapalepale o le Alii mo i latou o e se ese (tagai Iakopo 5). Na faafia ona tutulu le Alii o le tovine, “E tigaina au pe afai e maumau lenei laau” (Iakopo 5:7, 11, 13, 32). I le tusi atoa a Isaia, na faamafanafana ai Isaraelu e le Alii e faapea, e le mafai ona Ia faagaloina i latou: “Faauta, ua ou taia lou faatusa i ou alofilima” (Isaia 49:16). I le tusi a Esekielu na fetalai mai ai le Alii, “Ou te sailia foi le ua se, ou te aumaia le ua tulia, ou te fusia le ua gau” (Esekielu 34:16).
A tatou faia le galuega o le toe faatumauina ma le toe faatoagaina mai, e avea i tatou ma sui o le Alii i le galuega alofa o le sailia o o tatou tuagane ma uso o e atonu o loo pei o mamoe leiloloa, le tupe na leiloa, po o le atalii faamaumauoa.
Ulufale Atu i se Lalolagi Fou
E mafai foi ona faigata le ala mo i latou o e e fou mai i le Ekalesia, a o latou taumafai e fetuunai i suiga tetele i o latou olaga. Na faamatalaina e se tasi tagata fou o le ekalesia lenei suiga faigata. Fai mai a ia: “Pe a avea i matou o tagata sailiili ma tagata o le Ekalesia, matou te tetei i le iloaina ua matou ulufale atu i se lalolagi e matuai ese lava, o se lalolagi e i ai ona lava aganuu, agaifanua, ma gagana. Matou te iloa ai e leai se tagata se tasi po o se nofoaga se tasi e faatatau i ai e mafai ona matou liliu atu i ai mo le taitaiga i la matou malaga atu i lenei lalolagi foi.”1
Ua faafia ona aoao mai Peresitene Gordon B. Hinckley (1910–2008) e faapea, e manaomia uma e o tatou tagata fou ma o tatou tagata ua se la tatou fesoasoani. Latou te manaomia se uo, se tiutetauave, ma le faafaileleina faaleagaga, e pei ona aoao mai i le tusi a Moronae: “Ina ua uma ona talia i latou i le papatisoga, … ua faitaulia i latou faatasi ma le ekalesia a Keriso; ma ua tusia o latou igoa, ina ia manatulia i latou ma tausia ma le afioga lelei a le Atua, ina ia faatumauina i latou i le ala tonu” (Moronae 6:4).
I lena lava malaga i Pasila sa ou asiaina ai le toatele o tamaitai talavou i o latou aiga, ma le manao e “manatua ma fafaga” i latou. O nisi sa matuai totoa i a latou molimau, a e o nisi sa le toe toaaga i le Ekalesia I ia tulaga taitasi sa ou talosagaina ai i latou pe mafai ona latou taulotoina le autu a Tamaitai Talavou. Sa mafai e i latou taitoatasi! Ona ou fesili lea ia i latou taitoatasi pe o le fea le tulaga faatonuina a Tamatai Talavou e sili ona taua ia te ia ma pe aisea. A o tali mai ia teineiti taitoatasi ia te au, sa ou lagonaina le Agaga ma iloa ai sa i ai si tamai aloiafi o le faatuatua o loo ola ai pea ia i latou o e sa lei toe o mai i le lotu. Na ou iloaina afai e manatua e se tasi i latou taitoatasi ma alofa ia i latou ma fafaga lena tamai aloiafi o le faatuatua, o le a mafai ona toe mumu tele lo latou sulu.
Tiutetauave Patino
Ina ia fafaga i le afioga lelei a le Atua, e aofia ai lo tatou nofouta i le ola faaleagaga ma le manuia o isi, e pei lava ona tatou fafagaina o tatou tino faaletino. E ui ina tatau ona fesoasoani ia matua, taitai, ma uo i lenei faagasologa, ae ua i ai foi se tiutetauave patino a tagata fou liliu mai, talavou suesue, ma tagata o le ekalesia o loo tauivi e fesoasoani ai ia i latou lava. O lenei mea e sili atu ona faataunuuina e ala i suesuega faaletagata lava ia o le talalelei.
Ou te manatua lelei lava le taumafanafana na ou faauu ai mai le aoga maualuga. Sa o se taimi le mautonu lea mo au i le faaleagaga, o se taimi sa ou sailia ai lou ala i le talalelei, e pei o le toatele o tagata fou liliu mai. O la’u fofo mo nei faafitauli o le faitau ma le suesue ma le filiga o le Tusi a Mamona i aso uma, mo se taimi umi lava. Ou te manatua lava nisi o na taimi faatumulia i le Agaga. O se vaitaimi faavae lea mo le faafaileleina ma le tuputupu ae o la’u molimau.
E faaopoopo atu i le manatuaina ma le faafaileleina o i latou o e ua leiloloa pe se ese, e tatau ona tatou tuuina atu ia i latou avanoa uma e auauna atu ai. Na apoapoai atu le Faaola i le Aposetolo o Peteru, “Pe a liua mai oe, ona e faamalosi ai lea i ou uso” (Luka 22:32). O valaauga i le Ekalesia e tuuina atu ai i tagata le avanoa e faamalosia ai isi ma e tupu ae foi lena lava auaunaga i totonu ia te i latou.
A o talavou lau fanau ma o nisi taimi sa le mananao ai e o i le Mutuale po o isi fonotaga, sa ou talanoa atu ai ia i latou e uiga i o latou tiutetauave. Sa ou fai atu ia i latou, e le o taimi uma tatou te o ai i se fonotaga mo ni mea e mafai ona tatou maua mai ai, ae o ni mea e mafai ona tatou tuuina atu. Sa masani ona ou faapea atu i ai, “Tou te manaomia le Ekalesia, ma e manaomia outou e le Ekalesia.” E manaomia e tagata fou liliu mai ma tagata le toaaga ona lagona e manaomia foi i latou.
O Se Galuega mo Tagata Uma
O loo tatou auai uma i le faagasologa o le faatumauina. O se faagasologa faifai pea o le liuaina—o le liliu atu ma faaauau ona toe foi atu i le Alii. Na taua e Alema lea tulaga o se suiga tele (tagai Alema 5:14). O le liuaina o le galuega lena o loo tatou faia, e tusa pe tatou te galulue ma ni tagata sailiili, autalavou, tagata e le toaaga, po o tagata toaaga foi o le ekalesia. E tatau ona tatou auai uma e fesoasoani i le galuega a le Alii, ia faataunuu le faaofuina o Ana fanau i le tino ola pea ma le ola faavavau (tagai Mose 1:39).
Na tusia e lou toalua i lana api o talaaga a o avea ma se faifeautalai: “O le liuaina o le vavega aupito maoae lea. E sili atu foi le matagofie nai lo le faamaloloina o e mamai po o le faatuina mai o e ua maliliu. Aua e ui o se tagata na faamaloloina e iu ina toe gasegase foi, ma iu ai ina maliu, ae o le vavega o le liuaina e mafai ona tumau e faavavau ma e aafia ai le faavavau mo le tagata liliu mai faapea ma ana fanau. Ua faamaloloina ma faaolaina augatupulaga atoa mai le oti e ala i le vavega o le liuaina.”
Ia tatou au faatasi ma le Alii i le sailia o le tagata na leiloa, toe aumai ai le tagata na tuliesea, ma toe fusifusia ai le tagata na gauia. Ma, i lena aso tele o le Alii, o le a tatou olioli e pei ona sa i ai lou toalua, i le iloaina o i latou o e sa tatou alofaina i le talalelei, o loo avea pea ma o tatou tuagane ma uso i le Alii.
E manaomia e tagata fou ma tagata ua se la tatou fesoasoani. Latou te manaomia se uo, se tiutetauave, ma le faafaileleina faaleagaga.
Ata na saunia e Steve Bunderson; Sa Latou Toe Aumaia Au, saunia e Steve Kropp