Faamanuiaina i le avea ai ma se Tagata Fou Liliu Mai
A o tatou aapa atu i isi i le agaga faauo, auai i auaunaga, ma fiafia i tusitusiga paia, o le a mausali lo tatou talitonu mautinoa.
O le taeao o le taumalulu i le taimi muamua na ou auai atu ai i le Ekalesia a Iesu Keriso o le Au Paia o Aso e Gata Ai, sa ese lava le segisegi ma le malulu. Ina ua ou oo atu i le falelotu, sa matuai ou le iloaina pe o le a faapefea ona suia lou olaga i le auai i le Ekalesia. O le mea na lelei ai, sa i ai mea e mafai ona faia e tagata liliu mai e pei o au, ina ia malolosi ai i le talalelei. E tatau ona tatou atiina ae ni faauoga, tautua i le Ekalesia, ma “fiafia i le afioga a Keriso” (2 Nifae 32:3).
Atiina Ae Faauoga
E manaomia e tagata uma o le Ekalesia, ae maise lava o tagata fou liliu mai, ni uo e fesoasoani ia i latou. O ni auala nei e mafai ai e le atiina ae o uo ona faia se eseesega.
E mafai e tagata o le ekalesia ona aapa atu i tagata liliu mai. A o lei oo i lou papatisoga, sa savali mai ai se uso mai le tulimanu aupito mamao o le falelotu ona o lona fia feiloai ia te au. Sa ou lagonaina le ootia ona sa taumafai lava o ia e fesoasoani mai ia ou lagona e taua au. Na toatele foi isi sa faapena ona latou faia. A o iloa e tagata liliu mai le alolofa tele o tagata o le Ekalesia ia i latou, o le a faapea foi ona faatumulia o latou lava loto i le alofa.
E alolofa foi faiaoga o vasega a le Ekalesia ia i matou. O lou faiaoga i le vasega O Ou Faavae i le Talalelei sa avea ma se punavai maoae o musumusuga ia te au. E masani ona ou lagonaina e pei lava na fetalai tonu mai le Faaola ia te au e ala i nei lesona, e siitia ai au ma uunaia ai au e tulei pea i luma.
E faapena foi, o faiaoga o aiga ma faiaoga asiasi latou te vaaia ma faamanuiaina tagata o le Ekalesia. Ia talia i latou i lou fale, ma faaali atu le agaga faafetai ia i latou faapea ma le Alii mo la latou auaunaga. E pei ona aoao mai Elder David B. Haight (1906–2004) o le Korama a Aposetolo e Toasefululua, “O le loto faafetai … e mafai ona faamanuia ai o tatou loto ma o tatou mafaufau ma o tatou agaga, i mea tatou te mananao e faaauau e faataunuu ai mea ua poloaiina i tatou e fai.”1
O le a faamanuiaina foi tagata liliu mai, pe a latou aapa atu i isi. I se tasi aso, na ou faatauina mai ai se kata faamanuia na i ai se ata o se ‘ioimata tele lava i lona faavaa. O totonu na i ai se faaupuga, “Faafetai mo le vaaiga o au!” Sa ou auina atu le kata i se uso o le uarota o le sa agalelei mai ia te au. A o ou faia lea tulaga, sa ou lagonaina se lagona mafanafana o le alofa faaKerisiano mo ia.
O le mea mulimuli, e manaomia ona tatou faamalosia a tatou sootaga ma le Tama Faalelagi ma Iesu Keriso. O le a tupu lenei mea a o tatou auauna atu i isi, faaali atu le agaga faafetai, ma tatalo. O le a faamautu mai e le Agaga lo tatou agavaa mo le taulaga sili na faia e le Faaola mo i tatou.
Auaunaga i le Ekalesia
E masani lava i nisi o tulaga i le faatoa uma ai ona papatiso, o le a talosagaina ai tagata fou e faataunuu se tiute maualuga atu e auauna ai i la latou uarota po o le paranesi. O le a tuuina atu e le epikopo po o le peresitene o le paranesi se valaauga. O lenei tulaga e mafai ona avea ma se taimi faigata mo nisi.
Ina ua ou taliaina le valaauga muamua lava na ou mauaina—o le failautusi i le Aualofa—sa ou mafaufau faapea, “Aisea ua tuu mai ai se tiute taua faapenei?” Na faamalamalama mai e Peresitene Henry B. Eyring, Fesoasoani Muamua i le Au Peresitene Sili le mafuaaga: “O le a i ai taimi e te lagonaina ai le lofituina. O se tasi o auala o le a osofaia ai oe o le lagona lea o lou le gafatiaina. … Ae ua mafai ona e sao atu i se isi malosi e sili atu nai lo lou lava malosi, ma e te le o galue na o oe.”2
I se taimi mulimuli ane, na saunoa mai ai le peresitene o le Aualofa e faapea, o fautuaga na ou tuuina atu i se fonotaga a le au peresitene na faaalia ai sa musuia au. I lo’u le malamalama na ou tali atu ai, “E a ea?” Sa ia faamautinoa mai ma le agalelei e faapea, sa ou tali atu i le Agaga. O le faailoaina o le aao o le Atua i le taitaiga o le galuega o loo tatou faia, e le faigofie i le taimi muamua, ae a o tatou tausia poloaiga ma galulue ma le maelega, o le a tatou iloa ai Na te faalauteleina i latou o e Na te valaauina.
Fiafia i le Afioga a Keriso
Atonu o le auala e sili ona lelei e iloa ai e alofa le Alii ia i tatou ma o le a lagolagoina i tatou, e ala lea i le suesueina o tusitusiga paia. O loo aoao mai tusitusiga paia, ua valaaulia e le Alii “ia o mai uma ia te ia, ia tofo i latou i lona agalelei; ua le faafitia foi e ia se tasi e sau ia te ia” (2 Nifae 26:33).
O nisi o tagata fou latou te maofa i le malamalama ma molimau a isi. Ae ia manatua, o le auala e aoao mai ai le Alii o le “upu ma le upu, o le fuaiupu ma le fuaiupu” (2 Nifae 28:30). O i tatou uma taitoatasi e tatau ona tatou aoao a’o tatou agai i luma. E oo lava ia Iesu “na ia le maua i le atoatoaga muamua, a e na faia pea lea amioga mama i lea amioga mama, seia maua e ia le atoatoaga; sa faapea foi ona taua o ia o le Alo o le Atua, aua na ia le maua i le atoatoaga muamua” (MFF 93:13–14)
O lena malamalama ua faateleina ai lou faaaloalo ma le migao mo Ia. Na te silafia moni le tiga, faaosoosoga, faigata, ma le tuuatoatasi na ou oo i ai (tagai Alema 7:11). E mafai ona ou liliu atu ia te Ia ma lou talitonuina atoa o au lava. Ua aoao mai tusitusiga paia o le alofa, malamalama, ma le alofa o le Faaola mo i tatou, po o fea lava tatou te i ai, e atoatoa ma e le gata.
A o tatou aapa atu i isi i le agaga faauo, faia o auaunaga, ma fiafia i tusitusiga paia, o le a faapea ona mausali ma malosi lo tatou talitonu ia i tatou lava, ma o le a avea i tatou ma Au Paia o Aso e Gata Ai faamaoni lea tatou te mananao ia avea ai i tatou.
Ata na saunia e Matthew Reier, John Luke, ma Frank Helmrich