O Le Fuafuaga Sili a lo Tatou Atua
Mai se saunoaga i se faigalotu na tuuina atu i le Iunivesite o Polika Iaga i le aso 30 o Oketopa, 2007.
I le televave o le lalolagi i aso nei, ua toatele naua tagata ua tuua le tele o aafiaga o le olaga i le laki, e aunoa ma le lava o ni fuafuaga ma sauniuniga. Ou te iloa lena mea pe a ou fesili i nisi o tagata aooga po o a a latou matata aoaoina, e masani ona ou maua le tali, “E lei maua lava se tonu. O le a ou faia lena faaiuga i se taimi mulimuli.” Ua ou vaai i aiga ma tagata taitoatasi ua pauu atu i mailei o aitalafu ona latou te lei faia ni fuafuaga lelei tautupe ma ua latou ola i mea e sili atu nai lo mea latou te maua. O isi ua soona tautino i latou lava i gaoioiga, lesona, kalapu, ma afeleti. E ui o le auai i faalapotopotoga faapena e moni lava e lelei, ae o le auai ai foi e vave lava ona iu ina faigata ona taulimaina pe a tatou le faia ni fuafuaga. O le le faia o se fuafuaga, tatou te le iloa ai lo tatou taunuuga e faavavau.
E mafai ona tatou maua le faataitaiga sili o le fuafuaina i le liliu atu lea i tusitusiga paia. I le Mose 1:39, na fetalai mai ai le Alii, “Aua faauta, o lau galuega ma lou mamalu lenei—ia faataunuu le faaofuina o le tagata i le tino ola pea ma le ola faavavau.” O Lana fuafuaga sili, lea e aofia ai le taulaga togiola, o le aumaia o le tino ola pea i tagata uma. E ala mai i le meaalofa ma le mana o le perisitua, o i latou o e o le a faalogo ma mulimuli i Lana fuafuaga o le a maua le ola faavavau, o le meaalofa sili lea e mafai ona tuuina mai e le Atua i Lana fanau (tagai MFF 14:7). O loo i ai i tusitusiga paia le tele o faatatauga i lenei fuafuaga.
O se talafaasolopito o le faagasologa o le mulimuli i lena mamanu o loo molimau moni i lona atoatoa ma le tumau. Ua aoaoina ma le faaeteete e le Alii Lana fanau e uiga i le fuafuaga o le talalelei i le aluga o periota o taimi ua taua o tisipenisione, o periota ia e “tuuina ai e le Alii se auauna ua faamaonia i le fogaeleele e tauaveina ki o le perisitua paia. …
“… A faatulaga e le Alii se tisipenisione, e toe faailoa mai le talalelei ina ia le faalagolago ai tagata o lena tisipenisione i tisipenisione ua mavae mo se malamalama i le fuafuaga o le faaolataga.” 1
E tofu tisipenisione taitasi ma se lesona faapitoa e mafai ona tatou faaaofia i a tatou fuafuaga faaletagata lava ia a o tatou sauniuni mo lo tatou taunuuga e faavavau.
O Le Tisipenisione o Atamu: Avea Faapei o lo Tatou Tama oi le Lagi
I le tisipenisione muamua, na faia ai e le Alii ia Atamu ma Eva, ma tuuina i laua i le lalolagi, ma tuuina atu ia i laua ni avanoa e filifili ai (tagai Mose 3:17). Na poloaiina i laua e aua nei aai i le fua o le laau e iloa ai le lelei ma le leaga, aua na ta’u atu ia i laua o le a tulieseina i laua mai le faatoaga pe a la aai ai. Ae o le aai i le fua o le laau o le a la maua ai le ola faitino. Sa la aai i le fua o le laau.
O le Pau sa le o se mea leaga. Sa le o se sasi po o se mea tupu faafuasei. O se vaega fuafuaina o le fuafuaga o le faaolataga a le Alii. O se taunuuga o le Pau, ua mafai ai ona tatou oo i tofotofoga ma le faanoanoa o se tau e iloa ai le olioli moni. A le tofo i le oona, o le a tatou le malamalama lava i le suamalie (tagai 2 Nifae 2:15). Tatou te manaomia le aoaiga i le olaga i le tino ma le toe faaleleia mo le isi laasaga o lo tatou alualu i luma ina ia avea atili e pei o lo tatou Tama.
O le a se mea ua aoao mai e lenei tisipenisione muamua ia i tatou? O i tatou o le fanau moni a lo tatou Tama Faalelagi. Ua tatou fananau mai i le olaga faitino, ua tatou maua ni tino faaletino na faia i Lona faatusa (tagai Kenese 1:27). Ua folafola mai ia i tatou, afai o le a tatou maua sauniga e tatau ai, tausi feagaiga, ma usitai i poloaiga a le Atua, o le a tatou ulu atu i le faaeaga ma avea faapei o Ia.
Ua tatou iloa foi i le avea ai o ni atalii ma ni afafine a se Tama Faavavau, e mafai ona tatou talanoa ma Ia e ala i le tatalo ma maua tali e ala i musumusuga ma faaaliga. Ia aofia i le fuafuaga o o tatou olaga le tatau ona tumau ma ia le aunoa ona tatou fesootai ma lo tatou Tama.
O Le Tisipenisione o Enoka ma Noa: Filifilia o le Amiotonu nai lo le Amioleaga
O le tisipenisione lona lua ua taua o le tisipenisione o Enoka o le na “feoai ma le Atua” (Kenese 5:24). Na ia faatuina le nuu o Siona, lea na avea ma se faatusa mamana o le amiotonu e faapea ona mafai ona maua i le lalolagi faapea foi ma le lagi (tagai Mose 7:18–21).
O le isi e sosoo ai o le tisipenisione o Noa. Na soifua Noa i taimi na sili ona amioleaga, ma e ui ina sa alaga atu o ia i tagata ina ia salamo, ae sa latou le faalogo i ana upu. Ina ua oo mai le lolo, sa na o Noa ma lona aiga na faasaoina (tagai Kenese 7:23).
O le tisipenisione lona lua ma le tolu, ua aoao mai ia i tatou ni lesona maoae e uiga i mea e oo mai ona o le filifilia o le lelei nai lo le leaga. O Enoka faapea ma i latou uma na faatasi ma ia na faamanuiaina tele o se taunuuga o lo latou amiotonu. O tagata o e na le usiusitai ia Noa, na latou iloaina o le faatafunaga e mulimuli atu i le tagata agasala.
O nei tisipenisione e lua ua aoao mai ia i tatou ina ia saili i mea lelei ma atoatoa. I la tatou fuafuaga mo le olaga, e mautinoa lava o lo tatou faamoemoega o le, ia maua le tele o le lelei e mafai ona tatou maua i lenei fogaeleele. E mafai ona tatou maua le tele o lenei lelei e ala i le suesue i aso uma i tusitusiga paia. O le a latou taitaiina i tatou i le ola e faavavau.
O Le Tisipenisione o Aperaamo: Osia ma Tausia Feagaiga
O le isi tisipenisione e sosoo ai o le tisipenisione o Aperaamo. E pei o Atamu, Enoka ma Noa, na maua foi e Aperaamo se tiute paia mai le Alii. Na osi foi e le Alii ni feagaiga—po o ni maliega fusifusia ma mausali—faatasi ma Aperaamo:
“Ia e alu ese mai lou nuu, ma tagata o lou aiga, ma le aiga o lou tama, ae alu atu i se laueleele o le a ou faasino atu ia te oe. …
“Ma o le a ou faia ia avea oe ma nuu tele, ma o le a faasilisili foi ona ou faamanuiaina oe, ma faamamaluina lou igoa i atunuu uma, ma o le a avea oe ma faamanuiaga i au fanau o le a tutupu mai pe a e mavae atu, ma o latou lima foi latou te tauaveina ai lenei galuega ma le Perisitua i atunuu uma;
“Ma o le a ou faamanuia atu ia i latou e ala atu i lou igoa; aua o i latou uma o e talia lenei Talalelei, e faaigoaina i latou i lou igoa ma avea i latou ma au fanau, ma o le a latou tutu mai foi ma viia oe, o so latou tama;
“Ma o le a ou faamanuia atu ia i latou o e faamanuia ia te oe, ae o le a ou faamalaia atu ia i latou o e fetuu ia te oe; ma o le a ala atu ia te oe (o lona uiga, i lou Perisitua) atoa ma au fanau (o lona uiga, o lou Perisitua), aua ou te tuuina atu ia te oe se folafolaga, o le a tumau pea lenei aia ia te oe ma au fanau o le a tutupu mai pe a mavae atu (o lona uiga o lau lava fanau, po o le fanau mai lou lava tino) ona manuia aiga uma o le lalolagi i faamanuiaga o le Talalelei, o faamanuiaga lava ia o le olataga, ma le ola e faavavau” (Aperaamo 2:3, 9–11).
O le Au Paia o Aso e Gata Ai o ni tagata o le feagaiga. Ua tatou faia ni maliliega ma le Alii lea na Ia folafola mai ai ia i tatou le tele o faamanuiaga pe a faapea tatou te tuuto atu i tatou lava e usitai i Ana tulafono ma poloaiga. O la tatou fuafuaga mo le olaga e tatau ona aofia ai le faia ma le tausia o feagaiga. E mafai ona tatou faia lenei mea i se vaega e ala i le ola agavaa e le aunoa mo le umiaina o se pepa faataga aoga o le malumalu.
O Le Tisipenisione o Mose: Mulimuli i Perofeta a le Alii
O Mose o se tasi o tamalii malosi na soifua [i le lalolagi]. Sa la feoai ma talanoa ma le Atua. Na filifilia o ia e le Atua e laveai mai Isaraelu mai le nofo pologa i Aikupito (tagai Esoto 6:13). Na faamanuiaina o ia e maua mo tagata uma le tulafono sili o loo i le Tulafono e Sefulu (tagai Esoto 19; 20). E ala mai i nei tulafono ma isi lesona mai le Alii, na avea ai Mose ma se taitai aoga.
E mafai foi ona avea i tatou o ni taitai aoga. O le tulaga faaletaitai e manaomia ai le paleni o o tatou olaga. Na faamanino mai e Peresitene Gordon B. Hinckley (1910–2008) ia tiutetauave e tatau ona tatou mafaufau i ai pe a vaevaeina ma faapaleniina o tatou taimi ina ia maua ai le tulaga faamanuiaina:
-
O se tiutetauave i o tatou aiga.
-
O se tiutetauave i e o faafaigaluegaina i tatou.
-
O se tiutetauave i le galuega a le Alii.
-
O se tiutetauave ia i tatou lava. O le mea lenei na sili ona manaia ia te au. Na taua e Peresitene Hinckley e tatau ona tatou faaavanoaina se taimi e malolo ai, faamalositino, gaoioiga faafiafia, suesue, mafaufau loloto, ma tapuaiga i malumalu ina ia mafai ona paleni o tatou olaga.2
O le tisipenisione o Mose ua aoaoina ai i tatou ma saunia ai i tatou e mulimuli i taitaiga faaperofeta ma ia atiina ae i tatou lava ia avea o ni meafaigaluega e sili atu ona aoga i le fausiaina o le malo o lo tatou Tama oi le Lagi i le fogaeleele.
O Le Vaeluaga o Taimi: Ia Faasusulu Atu Lou Malamalama
Ioe o le tisipenisione aupito sili ona maoae o le tisipenisione o le vaeluaga o taimi, lea na afio mai ai le Faaola i le lalolagi. O Iesu Keriso o le tamalii autu i la tatou aoaoga faavae. Na sili atu o Ia nai lo le na o se tagata e leai se agasala, lelei, ma agalelei. Na sili atu o Ia nai lo na o se faiaoga. Na auauna atu o Ia i le lalolagi o se tagata, e ui o Ia o le Alo o le Atua. Na maliu o Ia, ma tanumia, ma toetu mai i le aso tolu ina ia faia le taulaga togiola mo tagata uma, ina ia le mafai e le oti ona umia se mana tumau. Ona o lena faatinoga, o le a faapea ona fiafia uma ai tagata ma olioli i le tino ola pea.
Faatasi ai ma le tele o mea na aoao mai e le Faaola ia i tatou, o i tatou o le malamalama o le lalolagi ma e tatau ona faasusulu atu lo tatou malamalama i luma o tagata (tagai Mataio 5:14–16). Ua faamanuiaina i tatou e maua Lana talalelei. Ia faasusulu atu lou malamalama ina ia mafai ona iloa e isi tagata au galuega lelei ma mananao ai e iloa atili e uiga i le fuafuaga e faavavau a le Atua.
O Le Tisipenisione o le Atoaga o Taimi: Olioli i le Atoaga o le Talalelei
O loo tatou ola i le vaitaimi mata’ina o le tisipenisione o le atoaga o taimi, o le taimi ua toefuataiina mai ai le talalelei a Iesu Keriso i lona atoatoa (tagai MFF 27:13). Ua faamanuiaina foi la tatou augatupulaga i isi tisipenisione uma na muamua atu lea e mafai ona tatou fausia ai o tatou olaga a o tatou malamalama i fegalegaleaiga a le Atua ma Ana fanau.
O fetalaiga a le Alii, e pei ona tuuina mai ia i tatou e ala mai i augatupulaga mai Ana perofeta paia, ua taialaina ai i tatou i se fuafuaga ua faatulagaina e le Alii mo i tatou. O lena fuafuaga ua atoatoa mai le amataga o taimi seia oo ina tatou maua se avanoa, pe afai tatou te ola agavaa, e ola faatasi ai ma Ia i faavavau o le a oo mai.
O outou o fanau o le folafolaga. Ou te faamoemoe o le a outou le fuafua e avea na o se tagata ua masani ai ae ia outou fuafua ia matua tulaga ese. E leai se avanoa i lenei lalolagi mo le feololo; e tatau ona tatou taumafai mo le atoatoa. E mafai ona e maua le atoatoa i le tele o itu a o e saili ma galue agai i sini ua e faatuina.
Ua i ai sou talatuu ‘oa; aua e te fefe e mafaufau ma galue e tusa ai ma mataupu faavae o le talalelei ma ia olioli i ona faamanuiaga a o e faataunuuina le fuataga o lou foafoaga o se atalii/afafine o le Atua. Ia faamanuia oe e le Atua ina ia e maua le naunau e agai ai i luma ma saili le faaolataga i lalo o lenei fuafuaga maoae ua Ia tuuina mai ia i tatou.
Atamu
Enoka
Noa
Aperaamo
Mose
Iesu Keriso
Iosefa Samita
Taumatau: Faatusa o Keriso, saunia e Heinrich Hofmann, faaaloaloga a le C. Harrison Conroy Co.; lalo, mai le tauagavale: Atamu ma Eva i le Faatoaga, saunia e Lowell Bruce Bennett; Faaliliuina o le Nuu o Siona, saunia e Del Parson; Na Amusia le Talaiga a Noa, saunia e Harry Anderson
Mai le tauagavale: Aperaamo i Laufanua o Mamere, saunia e Grant Romney Clawson; Mose o Vaeluaina le Sami Ulaula, saunia e Robert Barrett; Malamalama ma le Upumoni, saunia e Simon Dewey; Uso Iosefa, saunia e David Lindsley; Keriso i Ketesemane, saunia e Heinrich Hofmann, faaaloaloga a le C. Harrison Conroy Co.
Iosefa Samita, saunia e Alvin Gittins
O le tisipenisione aupito sili ona maoae o le vaeluaga o taimi, ina ua afio mai le Faaola i le lalolagi. O Iesu Keriso o le tagata autu i la tatou aoaoga faavae.
Na maliu le Faaola, na tanumia, ma toetu mai i le aso tolu ina ia faia ai le taulaga togiola mo tagata uma ina ia le mafai ona i ai se mana tumau o le oti. Ona o lena faatinoga, o le a olioli ai tagata uma ma fiafia i le olaga tino ola pea.
O loo tatou ola i se augatupulaga mata’ina o le tisipenisione o le atoaga o taimi, lea ua toefuataiina mai ai le talalelei a Iesu Keriso i lona atoatoa.