O Saafiafiga: O Se Faaopoopoga i le Liahona
Elder Joseph B. Wirthlin Sa Matua Tuuto i le Malo
11 Iuni, 1917–1 Tesema, 2008
I se po o le Kerisimasi e manatua pea i le 1937, i lena taimi a o avea Elder Joseph B. Wirthlin, ma se faifeautalai faamisiona, sa savavali atu ai i la’ua ma lana soa i le nuu o Openatofa, e lotolotoi i Atumauga o Pavaria. A o la asiasi atu i le nuu sa lauiloa o le nuu na musuia ai le viiga o le “Po Filemu,”1 sa la mapu i se falesa laitiiti e faalogologo i musika o le Kerisimasi sa lagiina e se aufaipese.
“O se po maninoa, ma le malulu, na siomia ai i ma’ua a o amata ona ma toe foi,” na tomanatu ai Elder Wirthlin. “Na ma savavali i lalo ifo o le faamalumaluga a fetu ma sopoia atu le kiona fou ua toulu ma ua to’a.”2
A o la savavali, sa fetufaai e faifeautalai talavou o la’ua faamoemoe, o miti, ma sini mo le lumanai. I lena vaaiga faalelagi, sa faafou ai e Elder Wirthlin lana tautinoga e auauna atu i le Alii: “Sa tonu i lo’u mafaufau o le a ou faalauteleina soo se valaauga ou te mauaina i le malo o le Alii.”3
Sa tausia e Elder Wirthlin lena tautinoga i aso uma na soifua ai i lenei olaga, lea na faaiuina i le aso 1 o Tesema, 2008, ina ua maliu filemu o ia i le 91 o ona tausaga ina ua afu lona soifua.
O lana auaunaga o se epikopo, fesoasoani i se au peresitene o le siteki, fesoasoani i le au peresitene aoao o le Aoga Sa, Fesoasoani i le Toasefululua, ma se uso o le Korama Muamua a Fitugafulu, sa ia tautino mai ai, “Sa ou faamemelo i tofiga uma sa ou galue ai i le malo.” Ina ua lagolagoina e avea ma se uso o le Korama a Aposetolo e Toasefululua i le aso 4 o Oketopa, 1986, sa ia faamatala mai, “Ma i lena auaunaga, sa foliga mai o aso uma lava o se Aso Sa, aua o le auaunaga i le Alii.”4
Faatuatua ma le Lakapi Faa-Amerika
Na soifua mai Joseph Bitner Wirthlin i le Aai o Sate Leki, i Iuta, i le aso 11 Iuni, 1917, o le ulumatua o le fanau e toalima a Joseph L. Wirthlin, o le sa avea ma Epikopo Pulefaamalumalu, ma Madeline Bitner Wirthlin. Sa lagolagoina e le tama o Joseph le aiga o ia o le taiulu o le Wirthlin’s Inc., o se pisinisi o meaai siiatoa ma faatau atu foi taitasitasi, a o lona tina sa uunaia le la fanau i gaoioiga eseese, e aofia ai musika ma taaloga. Na aoao e Joseph ma Madeline a la’ua fanau ia lotomaulalo, faamaoni, maelega, auauna atu, agaalofa, ma ia faatuatua.
E tele taleni a le alii talavou o Joseph ae na i’u lava ina tosina o ia i taaloga, ma sa iloga lava i le lakapi faa-Amerika, pasiketipolo, ma taaloga tamoe. Ina ua uma ona taalo o se taitai i le laina pito i tua i le East High School, sa faasolo atu o ia e taalo o se tagata momoe i le pito i tua mo le Iunivesite a Iuta.5
Mai le pulelaa, sa fiafia lava Elder Wirthlin e faasoa mai ni lesona sa ia aoaoina o se tagata taalo lakapi faa-Amerika. O se tasi o lesona taua na oo mai i le pito i lalo o ni tagata taaalo e toa 10 i le taimi o se taaloga suega siamupini. Ina ua mavae ni taumafaiga e maua le sikoa lea e manumalo ai, sa pueina ai Joseph ae na toeitiiti lava oo atu i le laina sikoa.
“O le taimi lena sa faaosoosoina ai au e tulei le polo i luma. … Na semanu e avea au ma tagata lauiloa,” o lana faamatalaga lea. Ae ona manatuaina loa upu a lona tina: “Joseph,” sa masani ona ia fai atu ai ia te ia, “fai le mea sa’o, e tusa lava po o le a le taunuuga.”
Na sili atu le manao o Joseph e fai o ia ma tagata lauiloa i le vaai a lona tina nai lo le vaai a tagata o lana au. O lea, sa ia fai mai ai, “Na ou tuua ai le polo i le mea na i ai—e lua inisi mai le laina sikoa.”6
I le faaiuga o le vaitau o lakapi i le 1936, sa talanoa atu le tama o Joseph ia te ia e uiga i le auauna atu i se misiona. Na amata ona aliae mai le taua i Europa, ma afai e le vave aluese atu Joseph o lona uiga o le a leai sona avanoa e auauna atu ai [i le misiona].
“Sa ou manao e faaauau la’u miti o le faaauau lea ona taalo lapaki ma ia ou faauu mai le iunivesite,” o le saunoaga lea a Elder Wirthlin. “Afai ou te taliaina se valaauga o le misiona, o lona uiga o le a ou tuueseina ai mea uma. I aso na, o se valaauga mo se misiona sa tai 30 masina le umi, ma na ou iloaina afai ou te taliaina, ona lona uiga o le a o le toe taalo lakapi lava—e masalo foi o le a ou le faauu lava.”7
Ae sa moemiti foi Joseph ia avea ma se faifeautalai, ma sa ia iloaina le mea e tatau ona ia faia. O ni nai masina mulimuli ane, na agai atu ai o ia i Europa, lea o le a ia auauna atu ai i Misiona a Siamani-Auseteria ma Suisi-Auseteria mai le 1937 i le 1939.
E le i toe taalo lakapi lava o ia, ae sa faauu o ia mai le iunivesite, i le matata o pulega faapisinisi. “E ui lava i lena mea, ae ou te le’i faanoanoa lava i le faia ai o se misiona ma tuuto atu lo’u tagata i le auauna atu i le Alii,” na ia saunoa ai. “O le faia o lea tulaga, ua matuai faamanuiaina ai lo’u olaga i mea eseese, i aafiaga faaleagaga, ma le olioli e le mafai ona faamatalaina.”8
“O Se Faaipoipoga Atoatoa”
O se tasi o tautinoga na faia e Elder Wirthlin i lena po o le Kerisimasi i Openatofa, o le a faaipoipo atu o ia i se tamaitai malosi faaleagaga o le na ola i le talalelei. Na ia faamatalaina atu ona foliga faaletino i lana soa i le misiona: e lima-futu-lima inisi (1.6 m), e lauulu enaena, ma mata lanumoana. E lua ma le afa tausaga talu ona maea lana misiona, ae feiloai atu o ia ia Elisa Young Rogers. Sa fetaui lelei lava o ia i foliga na faamatalaina.
“Ou te manatuaina le taimi muamua na ou vaai ai ia te ia,” o le saunoaga lea a Elder Wirthlin i le konafesi i le 2006, i le lua masina talu ona maliu o ia. “Ona o le molimanao a sa’u uo, na ou alu atu ai i lona fale e piki mai lona uso o Frances. Na tatala e Elisa le faitotoa, ma ia te a’u lava ia, o le alofa i le vaaiga muamua.
“Ou te manatu sa ia lagonaina foi se mea, aua o upu muamua lava ou te manatua sa ia fai mai ai o le, ‘Ou te iloaina o ai oe.’”
Na talasua Elder Wirthlin i lena sasi i le kalama aua sa faapitoa ana aoaoga i le Igilisi. Ae sa ia faapea mai, “Ou te teufatuina lava na upu e ono o nisi o upu e sili ona matagofie o le gagana a tagata.”9
Sa la’ua faaipoipo i le Malumalu o Sate Leki i le aso 26 o Me, 1941, ma mo le 65 tausaga sa la’ua fetufaai ai i le mea na ta’ua e Elder Wirthlin “o se faaipoipoga atoatoa.”10 Sa la’ua faamalolosia, uunaia, ma lagolagoina e le tasi le isi, ma sa la’ua soalaupule faatasi pe a faia ni filifiliga. Na le mafai ona tuua e Elder Wirthlin le fale e aunoa ma le sogi faatofa atu ia Elisa, ma sa masani ona telefoni mai i aso taitasi e asi mai o ia.11
Na valaauina le tama o Elder Wirthlin i le Au Epikopo Pulefaamalumalu i le 1938, o lea na faatautaia ai e Elder Wirthlin le pisinisi meaai a lo latou aiga ina ua taliu mai lana misiona. Mulimuli ane, ao la’ua tausia ma Elisa a la fanau, sa ia faaaluina le tele o itula i le taulimaina o le galuega ma tiute o le Ekalesia. Ae sa tumau pea ona avea Elisa ma la la’ua fanau teine e toafitu ma le atalii e toatasi, o se mitamitaga ma se fiafiaga o Elder Wirthlin. Ua maliu o ia ae ua toa 59 le fanau a lana fanau, ma le toeitiiti toa 100 o fanau a fanau a lana fanau.
Agalelei Atu i Isi
O Elder Wirthlin, o le na ta’ua e Peresitene Thomas S. Monson “o se tamalii e maoae lona tausaafia na soifua mai ma ia,”12 sa alofagia e tagata uma na iloaina o ia. Mo le 33 tausaga a o auauna atu o ia o se Pulega Aoao, e aofia ai tausaga e 22 o avea o se Aposetolo, o lena tausaafia na faaalia lava a o ia fetufaai mai lana molimau—i le upu ma le amio—e uiga i le Faaola ma Lana talalelei toefuataiga.
Faatasi ai ma le lotomaulalo ma e masani foi ma le agamalie, e uunaia ai e Elder Wirthlin le Au Paia o Aso e Gata Ai ina ia fai le mea sili i le olaga nei e ala i le faataitai i faataitaiga a le Faaola. Ina ia faia lena mea, sa ia aoao mai, ia taulai atu i le tasi, atiina ae le agalelei, ma alofa atu i isi.
Na ia aoao mai, “O taimi aupito sili ona faapelepele ma paia o o tatou olaga, o taimi na e faatumulia i le agaga o le alofa.” “O le tele lava o le fua o lo tatou alofa, o le tele foi lena o lo tatou olioli. I le faaiuga, o le atiina ae o se alofa faapena o le fua moni lena o le faamanuiaina i le olaga.” Sa ia faaopoopo mai, ina ia iloa moni pe faapefea ona alofa atu, na pau le mea e tatau ona tatou faia, o le mafaufau i le soifuaga o lo tatou Faaola.13
“Tatou te pisi uma lava,” na saunoa ai Elder Wirthlin i se tasi taimi. “E faigofie ona saili ni ‘alofaga mo le le aapa atu i isi, ae ou te manatu o le a pei e le logolelei i lo tatou Tama Faalelagi e pei o le tamaitiiti aoga tulagalua, na ia ave i lona faiaoga se tusi e faanoi mai ai o ia mai le aoga mai le aso 30 o Mati e oo i le aso 34.”14
Sa uunaia foi e Elder Wirthlin tagata o le Ekalesia ina ia “ola i le agaga faafetai i aso uma,” e tusa lava po o a faigata.15 “Afai o le a tatou mafaufau i faamanuiaga ua tatou maua, o le a tatou faagaloina nisi o o tatou popolega,” na ia aoao mai ai.16
O Se Molimau Faamavae
“O loo i ai nisi o e faapea o le Au Pulega Aoao e seasea oo i tiga, mafatiaga, po o puapuaga. Maimau pe ana moni lena mea,” na saunoa ai Elder Wirthlin i lana saunoaga mulimuli i le konafesi aoao na mavae atu nei. “E le punitia e le Alii i Lona atamai soo se tasi mai le faavauvau po o le faanoanoa.”17
O le “faanoaonaga sili” o Elder Wirthlin na oo mai i le maliu o lana pele o Elisa. I taimi o le tuuatoatasi na faapea ona tulai mai, sa utuvai mai mo lona malosi mai “aoaoga faavae faamafanafana loto o le ola faavavau” ma mai lana molimau e faapea o le Aso Faraile pogisa o le Faasatauroga o le Faaola, na sosoo ma le Aso Sa susulu matagofie o Lona Toetu.18
Ona sa i ai ia Elder Wirthlin se molimau mausali i le taulaga togiola a le Faaola, sa ia iloa ai o le oti e le o le mutaaga lea o le olaga, ma o loo faatalitali mai se toe faatasia mo e e faamaoni o e ua faia ni tautinoga i totonu o malumalu paia.
“O le a tatou toetutu uma mai le tuugamau,” sa ia molimau mai ai ia Oketopa 2006. “O lena aso o le a opoina ai e lo’u tama lo’u tina. O lena aso, o le a ou toe opoina ai la’u Elisa faapelepele i o’u lima.”19
Ma o lena aso, o se tautinoga na faia i se po malulu i aso ua leva, o le a faia ai se eseesega tele.
Ata pue na saunia e Craig Dimond; si’o na saunia e Pat Gerber
Ata pue mai faaaloaloga a le aiga o Wirthlin, vagana ua faaaila; tauagavale: atapue o le lakapi na saunia e Christina Smith; taumatau: atapue o Sister ma Elder Wirthlin na saunia e Michael Lewis, BYU–Idaho, e le mafai ona kopiina; atavali na saunia e Cloy Kent
E tolu tausaga sa taalo ai Joseph B. Wirthlin (numera 4) i le tulaga o le momoe i tua mo le au lakapi a le Iunivesite o Iuta a o lei lafoaia le lakapi ma tolopoina ana aoga ina ia avea o se faifeautalai (lalo) i le 1937. Taumatau: O Joseph B. Wirthlin ma Elisa Young Rogers Wirthlin i le aso o le la’ua faaipoipoga, 16 Me, 1941.
Luga: O le aiga lautele o le au Wirthlin ia Iuni 1999. Tauagavale: O Elder ma Sister Wirthlin o loo feiloai atu i tagata o le Ekalesia ina ua maea se faigalotu o le Vaiaso o Aoaoga i le Kolisi o Ricks (ua taua nei o le Iunivesite o Polika Iaga–Idaho) i le 1998. Lalo: O se atavali o Elder ma Sister Wirthlin i le 1999.