Augatupulaga
Pe o oe o se tagata fou pe ua leva lou aiga i le Ekalesia, e mafai e le autalavou a le Au Paia o Aso e Gata Ai i Guadeloupe ona tau atu ia te oe o le ola i le talalelei e fausia atoa ai le malosi.
Coralie “Coco” Gamiette, 12, e tele ni nofoaga e fiafia e asiasi i ai, ma o se tasi o ia nofoaga o se afu. E igoa o le la Cascade aux Écrevisses.O se nofoaga lea na papatisoina ai le toatele o uluai tagata o le Ekalesia i West Indies i le motu o Guadeloupe.
Fai mai Coco o le afu e faamanatu atu ai ia te ia se nofoaga i le Tusi a Mamona, o le Vai o Mamona, na faamatalaina o se “vaipuna manino lelei” ma “le ulu vao o laau laiti” na latalata i ai. O iina lea na papatisoina ai le toa 450 o i latou o e na talitonu i aoaoga a Alema. (Tagai Mosaea 18.)
Ioe, i Guadeloupe i aso nei, e pei o le tele o nofoaga i le Ekalesia, e faataunuuina ai papatisoga i se faatanoa i le falesa. Ae mo Coco, o la Cascade e tumau pea ona avea o se nofoaga mataina mo tafaoga, savalivali i le vaivai, ma nofonofo i le paolo malu ma mafaufau e uiga i le talatuu o le Ekalesia i lona lava aiga.
Mai Farani, ma le Alofa
O lena talatuu o loo taatia i se tala e fai si faigata lea e oo atu i le 20 tausaga i tua atu, i le aai o Angoulême, Farani. O iina, na taitaiina atu ai faifeautalai faamisiona i se tamalii e igoa ia Michel Menardin, o le na sau mai Guadeloupe, o se itumalo o Farani, e faatino lana tautua faamiliteli. Na talia e Michel le talalelei ma na papatisoina ma faamauina.
O lena lava tausaga i le nuu lena, na tuu ai e faifeautalai se tamaitusi i totonu o se pusameli. Na afua ai le fia iloa o se tina nofofua, o Claudine, o le sa tausia se tama teine e 19-tausaga o Delphine. Sa la tau fai mauaina ni molimau ma na papatisoina ai foi ma faamauina.
Na fetaui Michel ma Claudine i le lotu, ma tonu ai ua fetaui lava le tasi o i laua ma le isi, ma faaipoipo ai loa. (O i laua ia o matua matutua o Coco.) Ina ua sau le tina o Michel o Marthé, i le faaipoipoga, sa nofo o ia i Angoulême, ma masani ai i le Ekalesia, ma auai ai.
Mulimuli ane, na valaauina ai Delphine i se misiona i Seattle, Uosigitone. A o faia lana misiona, sa toe siitia atu ona matua ma lona tinamatua i Guadeloupe. Ina ua uma lana misiona, sa alu atu loa Delphine e asi i latou, ma ao i ai i Guadeloupe sa la feiloai ai ma Claude Gamiette, o le sa lei leva ona foi mai i le Misiona a Florida Jacksonville. Sa auauna atu o ia o se fesoasoani i le tama fai o Delphine i le au peresitene o le paranesi. Sa tafafao faamasani ia nei faifeautalai e toalua ua maea misiona ma faaipoipo ai i se taimi e lei mamao mulimuli ane. O Claude ma Delphine o matua ia o Coco. O lenei la, ua 14 tausaga ma ua toalima le fanau, o Claude, o lona lava aiga ua loa ona i ai i le Ekalesia, ua avea nei ma peresitene o le Itu a Basse-Terre Guadeloupe.
O lena talafaasolopito umi, o Coco o le lona fa ai lea o augatupulaga o Au Paia o Aso e Gata Ai. “Sa ou ola ae i totonu o le Ekalesia,” o lana tala lea. “Sa ou faalogo i ai i lou olaga atoa, alu i le Peraimeri ma o le taimi nei i Tamaitai Talavou, ma na ou faalogo foi i ou matua, ma o laua matua, ma matua o o laua matua o tuuina mai a latou molimau. Sa ou iloaina lava e moni le talalelei. Ina ua ou faitau i le Mosaea e uiga i folafolaga na faia e tagata talitonu ina ua papatisoina i latou e Alema, o le mea lena na ou vaaia i lou olaga atoa.”
E manatua e Coco na faapea mai lona tina matua, o le aiga e mamao atu nai lo na o se tina ma se tama ma le laua fanau. “Fai mai o ia o le aiga e oo atu i augatupulaga, mai le vavau e oo i le faavavau,” na fai mai ai Coco. “O le mea lena o loo ou vaaia i lo’u aiga.”
O Lea Mea Itiiti ma lea Mea Itiiti, O Lea Aso ma lea Aso
I le isi itu o le motu, i le taulaga o Basse-Terre, o loo avea ai le Ekalesia ma se talatuu e lua augatupulaga mo Luidgia Duflo, 13, ma lona uso o Stella, 17, o e na auai i le Ekalesia i le lua tausaga ua mavae i le taimi foi lea na auai ai lo laua uso matua, tuagane laitiiti, ma o laua matua. Fai mai i laua o le talalelei ua aoaoina ai i laua e ava i lo la tina ma lo la tama. E faapitoa ona la fiafia i afiafi faaleaiga, lea latou te faia i le fale mautotogi o le aiga, e tu i luga ae o le faleoloa laitiiti o lo laua tama. Na te faatauina atu mea e faaaoga i le fale, o suka, mea faamanogi meaai, lole, ma meaai a meaola. O se tasi o o latou nofoaga e sili ona fiafia e talanoa ai ma ia o lona ofisa i le pito i tua o le faleoloa, lea e lilo i ata o malumalu eseese o le Au Paia o Aso e Gata Ai.
“Na te maua ai se avanoa e fai ai se galuega faafaifeautalai laitiiti pe a o atu i ai tagata mo pisinisi ma fia iloa po o a ia fale,” o le faamatala mai lea a Stella. “Ae ou te manatu e faamanatu ai foi ia te ia i aso uma ia ana folafolaga ma sini e faavavau; o le mea tonu lava lena e faia mo i ma’ua. E tatau ona ma saunia e o atu i le malumalu, ma na te faamanatu mai pea lena mea ia i maua.”
Ua vaaia e le auaiga o Duflo se lumanai manuia o i luma. “O le a faaauau pea ona ola le Ekalesia i Guadeloupe, ma o le a tupu talaulau,” o le tala lea a Stella. “E tatau lava ona fai la matou vaega, o lea mea itiiti ma lea mea itiiti, i lea aso ma lea aso, ma faalagolago i le Alii i mea uma ma fetufaai atu le talalelei i soo se taimi e mafai ai.”
Seminare ma Koliata
O Eole Montredon, 15, e sau i le seminare i taeao uma o le aoga, e ui ina e le’i auai o ia i le taimi nei i le Ekalesia. “O le tele o itu,” na ia fai mai ai, “e pei lava na avea au ma se tagata o le ekalesia i lo’u olaga atoa, aua sa ou ola ae e latalata i le Ekalesia, ma ua ou masani i le talalelei.”
Fai mai o ia e fiafia lava e sau i le seminare aua “e lelei mo i matou tagata talavou le suesue faatasi i tusitusiga paia, e tusa lava pe tatau ona matou feala a o lei oso le la ina ia i ai iina.” E amata le seminare i le 6:00 i le taeao, o lea e ala ai o ia i le 5:00. “O nisi o au uo sa faapea ua ou valea, ae ina ua ou faamalamalama atu i ai le mea na matou faia, sa latou manatu e le afaina. Ma le isi, ou te lagonaina le Agaga Paia pe a ou i ai iina. O se lagona manaia lea ou te manatuaina i le aso atoa.”
O se tasi o tala o le Tusi Paia e sili ona fiafia i ai o le tala ia Tavita ma Koliata. Fai mai o ia na te maua ai le lototele i lona iloa o le a fesoasoani atu le Alii i tagata laiti e foia ia faafitauli tetele, aua o loo feagai o ia ma se luitau, lea o nisi taimi e pei ai le tele o Koliata. Ua tetea ona matua, ma e ui o loo toaga pea lona tina i le lotu, ae o le a matua fiafia i le vaaia ua avea o ia [Eole] ma se tagata o le Au Paia o Aso e Gata Ai, ae o loo finau pea le tama o Eole e faatali. Ma o lea, ina ia ava i lona tama, o loo faatalitali ai lava o ia ma le onosai, ma ola i le talalelei, ma tatalo ia i ai se aso e sui ai lona loto.
“Afai e mafai ona ou tuuina atu se savali i le autalavou a le Ekalesia,” na fai mai ai Eole, “ia o mai i le seminare i aso uma o le vaiaso ma o mai i le lotu i Aso Sa uma, aua o le tele lava o lou sau, o le tele foi lea o lou vaaia o le manaia ma avea ai e le talalelei oe ma tagata malosi.” E ui lava ina le mafai e Eole ona olioli i le talatuu o augatupulaga e tele e auai i le Ekalesia—e le o le taimi nei—ae ua ia iloaina e mafai ona galue o ia i le taimi nei e fausia lena talatuu mo augatupulaga a sau. “Ou te iloa e tatau ona ou amata nei,” o lana tala lea, “ma afai e tumau pea lo’u faamaoni, o le a tutupu ni mea lelei.”
Toefaafouina i le Taeao Po
I se vasega Seminare i le taeao po i Abymes, ua iloga ai lava lena naunautai e fausia le malosi i le aluga o taimi. E taututuu tagata o le vasega e sue mau o tusitusiga paia. Latou te o mai ma le naunautai i le laupapa e tusi ata. O taimi uma lava e fesili ai le faiaoga, e sii ae i luga lima e volenitia atu se tali.
“O le seminare e fesoasoani ia i matou e iloa lelei ai le Atua,” o le tala lea a Travis Devarre, 14. “E fesoasoani foi ia i matou ina ia mafai ona matou faia le galuega faafaifeautalai i le taimi nei ma sauni ai mo se misiona i se taimi mulimuli mai. E te aoao e ala i le suesue i le afioga a le Atua, ma e te taunuu atu i le aoga ua matala atoa lou mafaufau, ma tumu foi lou mafaufau i mafaufauga lelei. E toefouina ai oe.”
O se tasi o uiga o le toefaafouina o le “ia toe fanaufouina pe liua faaleagaga.” E faauigaina foi “toefuatai i se tulaga sili atu, maualuga atu, ma sili atu le aoga.” Fai mai foi Travis o le auauna ai i le perisitua e toefaafouina ai foi o ia. “Ua faamanuiaina ai au ma lo’u aiga, aua e mafai ai ona ou fesoasoani atu i isi o siomia ai au, e aofia ai lo’u aiga. O lena mea e faatumulia ai lo’u loto i le fiafia.”
“Afai tatou te talitonu i le Tama Faalelagi, o le a faapea ona faamanuiaina i tatou,” na fai mai ai Leslie Amoussouga, 15. “Matou te iloa Na te saunia e le aunoa se ala mo i tatou. Afai tatou te le masalosalo, afai tatou te faatuatua ma tausi poloaiga, o le a Ia aumai le fiafia i o tatou loto.” I se isi faaupuga, o le a fesoasoani mai o Ia e toe fafaga [faaleagaga] i tatou lava, mai lea augatupulaga i lea augatupulaga.
Ata na pueina e Richard M. Romney
Luga mai le pito i luga: Tamaiti seminare o Luidgia, Travis, Eole, ma Leslie (itulau faafeagai) fiafia i le aoaoina faatasi o le talalelei. Ua iloa e Coco (itulau na muamua atu) o le talalelei ua faamalosia ai lona aiga.