Faamatalaga

O Se Fuataga Faaopoopo o le Agaga

O au o se tina e i ai se fanau lelei e toalua ma se tane lagolagosua. I lenei lalolagi o le le mautonu, o le Liahona e moni lava o le tapasa faaneionapo lea a lo matou aiga. A o matou faitauina le Savali a le Au Peresitene Sili ma isi tusiga musuia i a matou afiafi faaleaiga, e oo mai se fuataga faaopoopo o le Agaga o le Alii i totonu o lo matou aiga. Matou te lagonaina le mana o le Togiola a lo tatou Faaola, o Iesu Keriso, ma maua ai le faamafanafanaga ma le toafilemu.

Crisanta Estayo Padilla, Filipaina

Lotomaulalo ma le Faamagalo Atu i le Faaipoipoga

O le tusiga “Faamuamuaina o La’u Faaipoipoga Nai lo Lo’u Faamaualuga” (Ian. 2008) na fesoasoani ia te au ou te malamalama lelei ai i le tiutetauave o le feagaiga o le faaipoipoga. Sa ma faitauina ma la’u uo le tusiga, ma na ma faia ai ni sini ia avea le lotomaulalo ma le faamagalo atu o ni mataupu faavae taua i le ma mafutaga. Na ou mafaufau e faavaa le tusiga e tuu i lo ma fale i le lumanai, ina ia mafai ona ma manatua pea le agaga manaia na ma mauaina ina ua ma fefaasoaai i lenei savali ma faamalosia ai lo ma alofa.

Clébi Nascimento, Pasila

O Le Uunaiga a le Liahona

Na ou liliu mai i le Ekalesia e ala i savali musuia o loo i le Liahona. Na ou iloaina e mafai ona ou malamalama i le auala o loo talanoa mai ai o tatou taitai ia i tatou, ma sa ou faatatauina a latou fautuaga ia te au. O le auala lea na amata ai ona atiina ae la’u molimau. Ou te faitauina ma le naunautai le mekasini, tatalo ina ia mafai ona ou maua se tufaaga sili atu o le Agaga ma maua aoaoga mai luga.

I le taimi o la’u misiona, na ou feaveaia ai ni nai kopi o le mekasini ma tuuina atu i tagata sailiili ma tagata ua le toaaga o le ekalesia. Talu ai nei, na ou tuuina atu ai ni kopi i nisi o uo e fiafia e faitau i o tatou talitonuga.

O lenei ua i ai lou valaauga o le sui o le Liahona. O la matou sini ia tofu tagata taitoatasi o la matou paranesi ma se kopi [o le mekasini]. Matou te tuuina atu mekasini matou te mauaina mai le faletusi i tagata fou liliu mai, ma latou alualu ai i luma i le talalelei ma lagona ai le fiafia i le Liahona. Ou te iloa o le Liahona o loo aoao ai le talalelei a Iesu Keriso ma lo tatou Tama Faalelagi alofa. Matou te faafetai tele mo le musumusuga, o le faamaoni, ma le faigofie, ma fautuaga lelei o loo tatou mauaina i lomiga taitasi.

Edison Geovanny Zapata Heredia, Ekuatoa