Inu Sau Ipu
E lei leva ona matou auai i le Ekalesia, ae ma fai malologa atu loa ma lou toalua i Pemuta. A o ma i ai iina, sa ou alu i se tasi aso i se siva faaaoauli sa fai i le matou faletalimalo. A o ou matamata lava i taumafa mama matagofie, sa ou sosogiina ai le manogi o le lauti. Sa matua faatosina mai lava lona manogi, ma na pei lava ou te faalogoina se leo o fai mai, “Inu sau ipu.”
Sa ou faamaoni lava i le Upu o le Poto talu lava ona ou papatiso. Sa ou faapea ifo i lou mafaufau, “Leai, ou te le inuina.”
Sa pei lava e fai mai le leo faatauanau, “Oi, se tago i ai.” “E te le iloa lava nisi iinei, ma o loo e mamao mai lou aiga.”
Faatasi ai ma se tautinoga sili atu ona mausali, sa ou toe tali atu ai i lou mafaufau, “Leai, ou te le inuina!”
Sa toe oo mai foi lena leo, faatosina: “E leai lava se isi o le a iloa.”
Sa ou tali atu ma le mausali, “O le a ou iloa!”
O le taimi lena a o ou tu i talaane o le tama faigaluega sa na ligiina le ti. Ma sa ou ui ese atu loa ma le mautinoa. A o ou tauvaavaai mo se laulau, sa ou tei i lou faalogoina o valaau mai se tagata i lo’u igoa. Sa ou maofa i lo’u vaaia o foliga ataata o so’u pule sa i ai muamua, o le ua tele tausaga ou te lei toe vaai i ai. Sa sau o ia ia te au, ma a o ma savavali atu i se laulau sa ia faapea mai, “sa ou faalogo ua e auai i le Ekalesia Mamona. Sei faamatala mai ia te au.”
Sa ou fiafia e faamalosi, ma faasoa atu ia te ia nisi o mataupu faavae o le talalelei, i lou fiafia i le avea ai ma se tagata O Le Ekalesia a Iesu Keriso o le Au Paia o Aso e Gata Ai, ma la’u molimau. Na fai mai lo’u pule muamua, sa ia faia ni sailiiliga mo igoa o lona aiga ma sa ia faamaumauina le tele o augatupulaga o lona talafaasolopito faaleaiga. Sa fiafia moni o ia i mea sa ou faasoaina atu e uiga i le Ekalesia, ma na ou lagonaina le malosi o le liligiina mai o le Agaga a o ma talanoa.
A o ma feiloai na oo mai se manatu i lo’u mafaufau: “Mata e te faia lenei talanoaga pe ana e tuuina se ipu lauti i luga o lau fata?” Na ou iloa le tali. Ana ou gauai atu i le faaosoosoga, semanu ou te misia lenei aafiaga faaleagaga e manatua pea ma se avanoa e faasoa atu ai la’u molimau.