O Lo’u Faamoemoega Moni o se Faifeautalai
Sa ou auauna atu o se faifeautalai faamisiona i Atenitina mo na o le lua masina ae taunuu mai le tala ua fai le faamau a lo’u uso laitiiti e toatasi. Sa vavalalata lo ma tuputupu ae ma Repeka ma sa ma moemiti mo le faaipoipoga a le tasi ma le isi, ae o lenei la o le a ou misia lana [faaipoipoga].
Sa auina mai e ou matua ni fuafuaga, ata, lisi o meaai, ma taimi faatulagaina, ae na ou lagonaina lava le faaesea, tuua toatasi, ma le mamao ese. Sa faigata ma tuai le galuega faafaifeautalai. Sa iu ina ou mafaufau pe o le a la’u mea o fai i lo’u nofo mamao ai mai lo’u aiga, ma na ou le mautonu po o le a le mea na tatau ona ou faataunuuina.
Ae ui i lea, na ou iloaina sa valaauina au e le Alii ou te auauna atu, ma na ou maua se molimau malosi i le tatalo ma le mana o le perisitua. Sa ou maua se faamanuiaga o le faamafanafanaga na folafola mai ia te au sa ou i ai i le mea na manaomia ona ou i ai.
O le avea ai ma ni faifeautalali e masani ai ona matou fetufaai i le apoapoaiga o loo maua i le Moronae 10:4–5. Sa mautu lou talitonuga i le folafolaga a na fuaiupu—e faapea afai ou te ole atu i le Atua, lou Tama Faavavau, i le suafa o Iesu Keriso, o le a mafai ona ou iloa le moni o mea uma e ala i le mana o le Agaga Paia. Sa ou tatalo ma le maelega ina ia ou iloa pe na ou faia le mea sao o le sau i Atenitina nai lo le nofo i le fale, i le mea na semanu ou te fesoasoani ai i lou uso e tapena mo lana faaipoipoga. A o latalata mai lava le aso o lana faaipoipoga, sa faapena foi ona atili loloto ai au tatalo. Sa ou lagonaina le uunaiga faamautinoa a le Agaga, ae sa ou moomoo lava mo se tali.
E lua vaiaso a o lei oo i le faaipoipoga, sa ma savavali mai ai ma lau soa i le fale mai se fuafuaga o se taumafataga i le aoauli ma ni tagata o le paranesi sa ma galulue ai. O le paranesi sa i se taulaga laitiiti i le ogatotonu o Atenitina, lea e tausisia ai lava e tagata le agaifanua o le malolo i le aoauli. O le taimi lena o le aso, e masani lava e leai lava ni tagata e feoai ai.
Ae peitai, a o ma savavali lava, na valaau mai se alii talavou ia i maua. Talu ai ona e toatele ni alii talavou e taufaalilili mai ia i maua, o lea na ma le amanaiaina ai o ia ma faaauau lava ona ma savavali. Ina ua toe valaau mai o ia, sa ou lagonaina se uunaiga e tali atu ia te ia.
O lona igoa o Horacio, ma sa ia fia iloa pe ma te uo ma ni tamaitai talavou o e na faitauina le Tusi a Mamona faatasi ma lona tausoga. Fai mai o ia sa ia lagonaina se mea faapitoa a o faitauina e tamaitai faifeautalai, o e o loo galulue foi i le ma paranesi. Sa ia fia iloa pe mafai ona sau o ia i le tatou lotu.
A o ma aoaoina Horacio faatasi ai ma le fesoasoani a tagata o le ekalesia i le lotoifale, sa vave lava ona fiafia o ia i le talalelei. Na suia lona olaga a o tuputupu ae o ia i le talalelei, ae na tetee lona aiga ma na teena o ia e ana uo. E ui lava i lea, na lagona lava e Horacio le alofa o le Alii ma manao ai e mulimuli ia te Ia. Na ou maua nisi o aafiaga aupito faapitoa o la’u misiona a o aoaoina Horacio.
A o nonofo lo’u aiga i le Malumalu o Oakland Kalefonia e molimauina le faamaeaina e lou uso o se tasi o sauniga o le a faapea ona fesoasoani e saunia ai o ia mo le malo selesitila, sa ou saofai i se falesa laitiiti i General Pico, Atenitina, e faatalitali mo Horacio e faamaea se faatalanoaga e sauniuni ai mo le mauaina o lona sauniga faaola muamua—o le papatisoga. Sa mafai ona saunia lo’u uso mo ona sauniga e aunoa ma la’u fesoasoani, ae atonu e le mafai e Horacio ona faia o lea tulaga e tasi. Sa ia manaomia i maua ma lau soa e aoao o ia i le talalelei, ma sa ou manaomia o ia e faamanatu mai ia te au lou faamoemoe moni o se faifeautalai—o le fesoasoani e aumai agaga ia Keriso.
A o ou sauni e tuua Atenitia i le faaiuga o lau misiona, sa sauniuni Horacio e auauna atu i lana lava misiona. Na ala mai ia te ia, le tali a le Tama Faalelagi i au talosaga, ma auina atu ai Horacio e tali i talosaga i isi.