Savali a Faiaoga Asiasi

Malamalama i Matafaioi Paia a Tamaitai

Ia aoao atu mau ma faamatalaga e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

Julie B. Beck, peresitene aoao o le Aualofa: “E i ai sa’u molimau na maua mai le mafaufau loloto ma le suesueina o le fuafuaga o le fiafia ua tuuina mai ia i tatou e lo tatou Tama oi le Lagi. O loo i ai i lena fuafuaga se vaega mo Ona afafine. Ua ia i tatou le afa faaletamaitai e tatau ona tatou taulimaina, ma afai tatou te le faia la tatou vaega, e leai se isi na te faia mo i tatou. O le afa lea o le fuafuaga a le Tama e fatufatuina ai le ola, e faafaileleina agaga, e faateleina le tuputupu ae, e uunaia ai isi mea uma na tuuina mai ia i tatou. E le mafai ona tatou faamatuuina atu. E le mafai ona tatou tuuina atu i se isi tagata. E patino ia i tatou. E mafai ona tatou teenaina, e mafai ona tatou faafitia, ae o la tatou vaega lava, ma tatou te tali atu mo lea tulaga. O le a i ai se aso o le a tatou manatuaina uma ai mea na tatou iloaina ae tatou te lei fananau mai. O le a tatou manatua sa tatou tau i se taua tele mo lenei avanoa. E faapefea ona tatou ausia lenei tiutetauave? Tatou te tuuina i aso taitasi o tatou malosi i le galuega tulaga ese lea tatou te faia.”

Elder M. Russell Ballard o le Korama a Aposetolo e Toasefululua: “O le faamoemoega faavae mo le Foafoaga o le lalolagi, o le saunia lea mo fanau agaga a le Atua o le faagasologa faaauau o le ola faaeaga e faavavau. …

“… E ui lava ina leai se saofaga e sili atu ona taua e mafai ona outou faia mo le nuu, o le Ekalesia, po o le taunuuga e faavavau o fanau a lo tatou Tama nai lo mea e te faia o oe o se tina po o se tama, o le tulaga faatina ma le tulaga faatama, e le na o le pau ia o ni fuafaatatau o le lelei po o le taliaina foi o se tasi i luma o le Alii. …

“O tuafafine uma i lenei Ekalesia, o e ua osi feagaiga ma le Alii, ua ia te i latou se faatagaga paia e fesoasoani ai i le laveaiina o agaga, e taitai tamaitai o le lalolagi, e faamalolosia aiga o Siona ma fausia le malo o le Atua” (“O Tamaitai o le Amiotonu,” Liahona, Tes. 2002, 36, 39; Ensign, Ape. 2002, 68, 70).

Elder David A. Bednar o le Korama a Aposetolo e Toasefululua: “O le mamanu paia, ua fuafuaina alii ma tamaitai ina ia agai atu faatasi i luma i le faaatoatoaga ma se atoaga o le olioli. Ona o o laua natura ma mana tulaga ese, o lea e tofu aumaia ai e tane ma fafine i se sootaga o le faaipoipoga, ia vaaiga ma aafiaga iloga. E eseese sao o le tane ma le fafine, ae e tutusa lava [o laua sao] ina ia tasi ma se faatasiga e leai se isi lava auala e mafai ai” (“E Taua le Faaipoipoga i Lana Fuafuaga Faavavau,” Liahona, Iuni 2006, 51–52; Ensign, Iuni 2006, 83–84).

Silvia H. Allred, fesoasoani muamua i le au peresitene aoao o le Aualofa: “Ua faamanuiaina e le Alii ia tamaitai i uiga paia o le alofa, tiga alofa, agalelei, ma le alofa mama. O a tatou asiasiga i masina taitasi o ni faiaoga asiasi, tatou te maua ai le mana e faamanuia ai uso taitasi a o tatou faaloaloa atu lima o le alofa ma le agalelei ma avatu meaalofa o le tiga alofa ma le alofa mama. Po o a lava o tatou tulaga faaletagata, ua tatou maua uma lava le avanoa e faamalamalama ai ma faafailele isi” (“Fafaga A’u Mamoe,” Liahona ma le Ensign, Nov. 2007, 113).

Peresitene Spencer W. Kimball (1895–1985): “O le avea ma se tamaitai amiotonu i le taimi faaiu i lenei lalolagi, a o lumanai le afio mai faalua o lo tatou Faaola, o se valaauga e faapitoa lona tamalii. O le malosi ma aafiaga o tamaitai amiotonu i aso nei e mafai ona faasefuluina [le tulaga] e oo i ai i taimi e sili atu ona filemu” (“Privileges and Responsibilities of Sisters,” Ensign, Nov. 1978, 103).

Ata na saunia e Matthew Reier; pito i tua na saunia e Shannon Gygi Christensen