Para sa Gagmayng mga Bata
Pagtudlo sa magtutudlo ni Tanner
“Gusto ko karon nga mamisyonaryo. Bisan pa kon gamay pa ako” (“Gusto ko Karon nga Mamisyonaryo,” Songbook sa mga Bata, 90).
1. Usa ka adlaw niana si Tanner nakakuha og litrato ni Jesus. Siya ganahan sa litrato. Gusto siya nga makigbahin niini sa laing tawo. Siya nahibalo nga dili tanan nahibalo kabahin ni Jesus.
2. “Ma, mahimo ba nga akong ihatag ang akong litrato ni Jesus ngadto sa laing tawo?” si Tanner nangutana.
“Oo kaayo,” miingon si Mama. “Kinsay imong tagaan niini?”
“Ihatag ko kini sa akong magtutudlo, nga si Mrs. Young. Ganahan ko niya tungod kay basahan man ko niya og daghang mga istorya.”
“Nindot kana nga ideya,” miingon si Mama. “Ako mapasigarbuhon kanimo.”
3. Sa diha nga si Tanner miabut sa eskwelahan, iyang gihatag ang litrato kang Mrs. Young. Siya nalipay sa pagkadawat og litrato ni Jesus. Si Tanner nalipay nga iyang nagustohan kini.
4. Paglabay sa pipila ka adlaw, si Tanner ug ang iyang pamilya mihimo og libro nga sama sa Basahon ni Mormon nga mga palid nga bulawan. Dayon sila misulat sa ilang mga pagpamatuod diha sa libro.
“Ma, madala ba nako ang basahon ngadto sa eskwelahan aron ipakita ni Mrs. Young?” Si Tanner nangutana.
“Oo, mahimo,” miingon si Mama.
5. Pagkasunod adlaw sa eskwelahan, si Tanner nagdala og backpack uban sa bulawan nga palid sa iyang pamilya nga anaa sa sulod. Iyang gisultihan si Mrs. Young kabahin sa libro nga gihimo sa iyang pamilya. Ang magtutudlo ni Tanner hilabihan ka interesado.
6. Sa diha nga si Mama mikuha ni Tanner gikan sa eskwelahan nianang adlawa, ang iyang magtutudlo miduol aron makigsulti sa inahan ni Tanner.
“Si Tanner midala karon og usa ka butang nga hilabihan ka makapaikag,” miingon si Mrs. Young. “Mahimo ba nga sultihan mo ako og dugang pa?”
“Unsa kaha kon ikaw ug ang imong bana moadto aron manihapon sa among balay?” Nangutana si Mama. “Kita makasulti unya og dugang pa.”
“Ingon og nindot kana,” miingon si Mrs. Young.
7. Pipila ka bulan ang milabay, si Tanner ug ang iyang inahan miadto sa bunyag ni Mr. ug Mrs. Young.
“Ako hilabihan ka malipayon nga akong gipakigbahin ang litrato ni Jesus sa akong magtutudlo,” miingon si Tanner.
“Ako nasayud nga siya usab,” miingon si Mama. “Ikaw maoy dakong rason kon nganong si Mrs. Young ug ang iyang bana gibunyagan karon.”
8. Si Tanner adunay malipayon nga pagbati samtang siya nagtan-aw ni Mrs. Young nga gibunyagan. Siya mipahiyum sa dihang si Mama miyuko ug mihung-hong, “Ang mga nag-edad og upat ka tuig bantugan nga mga misyonaryo!”
Wala: mga paghulagway pinaagi ni Elise Black