Tukma Gayud Bisan Gani Karon
Naghunahuna ba kamo nga ang Daang Tugon hilabihan ra ka karaan aron pagtudlo kaninyo sa bisan unsang butang? Mas maayong hunahunaon pag-usab.
Bisan tuod og ang mga pulong, panahon, ug kultura sa Daang Tugon lahi kaayo kay sa karon, kamo masurprisa kon unsa ka daghan ang inyong makat-unan gikan sa Daang Tugon. Inubanan sa daghang mainampuong pagtuon, kamo makakaplag og mga baruganan sa mga istorya sa Daang Tugon nga magamit sa inyong kinabuhi karon. Aniay siyam lamang sa daghang mga ehemplo:
-
Si Jose sa Ehipto milikay gikan sa tintasyon (tan-awa sa Genesis 39:12). Ang paglikay sa tintasyon kanunay nga mas sayon kay sa pagpakasala ug paghinulsol.
-
Si Jose mipasaylo sa uban, gani sa iyang igsoong mga lalaki kinsa mibaligya kaniya ngadto sa pagkaulipon (tan-awa sa Genesis 45). Mapasaylo ba ninyo ang uban, ilabi na niadtong inyong kaugalingong pamilya?
-
Ang Ginoo mihatag og manna sa matag adlaw aron ipakaon sa mga Israelite (tan-awa sa Exodo 16:15). Ang Ginoo nakahatag usab og daghang mga butang nga ipakaon sa atong mga espiritu: pag-ampo, mga kasulatan, ang sakrament, mga templo.
-
Ang Exodo 28 nagpiho kon giunsa ni Aaron ug sa ubang mga naghupot sa priesthood sa pagsinina. Ang Ginoo mihangyo kanila sa pagsinina sa usa ka piho nga paagi aron sa pagpahinumdom kanila sa importante nga mga bahin sa ilang pagsimba. Kon kamo mosimba o moadto sa templo, sa unsa nga paagi ang inyong pagsinina makaapekto sa inyong balaan nga pagtahud ug pagsimba?
-
Kadaghanan sa basahon sa Levitico mao ang mahitungod sa sakripisyo ug ang mga panalangin niini. Ang inyong mga sakripisyo—sa panahon, mga talento, o kwarta—kamo makadawat og mga panalangin sa langit.
-
Gikan sa ehemplo ni Samuel, atong makat-unan ang kaimportante sa pagpaminaw ug sa pag-ila sa tingog sa Ginoo (tan-awa sa 1 Samuel 3:4–10). Samtang kamo nagkat-on sa pag-ila ug pagsunod sa mga pag-aghat sa Espiritu Santo, ang inyong kinabuhi molambo.
-
Ang mga pagpili sa batan-on nga David mipakita nga siya mituo nga “adunay usa ka Dios sa Israel” (1 Samuel 17:32–51). Ang inyong mga pagpili nagpamatuod kon kamo mituo ba o wala mituo sa Dios.
-
Si Daniel misupak sa mando sa hari ug nakit-an nga nag-ampo (tan-awa sa Daniel 6:11). Unsa ka sagad kamo makit-an nga nag-ampo, bisan kon kini ingon og malisud?
-
Si Naaman nakat-on nga ang gahum moabut kon kita mosunod sa propeta (tan-awa sa 2 Mga Hari 5:1–14). Ang pagsunod sa tambag sa mga propeta ug mga apostoles karon modala sa gahum sa Ginoo ngadto usab sa inyong kinabuhi.
Si Haring Nabucodonosor mitambog sa tulo ka mga Israelite ngadto sa kalayo. Apan sa diha nga ang hari mitan-aw ngadto sa kalayo, iyang nakita ang “upat na ka tawo nga dili ginapus, nga nanlakaw sa taliwala sa kalayo … ug ang dagway sa ikaupat [mao ang] sama sa Anak sa Dios” (Daniel 3:24–25). Samtang kamo nagbasa sa Daang Tugon, inyong makita ang Dios nga naglakaw uban sa Iyang mga anak. Ang ilang mga kasinatian makatudlo kaninyo kon unsaon nga mahimong usa ka mas maayo nga anak nga lalaki o anak nga babaye sa Dios.
Ang pagpaminaw sa Espiritu (ibabaw sa wala), pag-ampo bisan kon kini malisud (ibabaw), ug pagsunod sa tambag sa propeta (ubos) mao lamang ang pipila sa mga leksyon nga atong makat-unan gikan sa Daang Tugon.
Wala: Jose sa Egipto, ni Michael T. Malm; paghulagway ni Ted Henninger; tuo: Ang Batang si Samuel Gitawag sa Ginoo, ni Harry Anderson; Si Daniel sa atubangan ni Haring Nabucodonosor, ni Simon Harmon Vedder; Si Naaman Naayo sa Sangla, ni Paul Mann