Pagtuon sa Buluhaton sa Relief Society
Sa unang Dominggo sa bulan, ang kapangulohan sa Relief Society modala kanato sa mga panaghisgutan kon unsaon nato sa pagtuman ang atong sagrado nga mga responsibilidad isip mga sister sa Relief Society.
Sa dihang ang among kapangulohan unang gitawag, kami gihatagan og pipila ka mga kapanguhaan kabahin sa kasaysayan sa Relief Society, nga gikolekta sulod sa daghang mga katuigan. Kami mainampuong nagtuon niini, gusto nga masayud kon unsa ang katuyoan sa Relief Society ug unsa ang gusto sa Ginoo nga among buhaton panahon sa among administrasyon.
Samtang kami mabinantayong nagtuon sa kasaysayan, kami nakakat-on nga ang katuyoan sa Relief Society nga giestablisar sa Ginoo mao ang pag-organisar, pagtudlo, ug pagdasig sa Iyang anak nga mga babaye sa pag-andam kanila alang sa mga panalangin sa kinabuhi nga dayon. Ang Relief Society magamit sa tanang aspeto sa kinabuhi sa usa ka babaye nga Santos sa Ulahing mga Adlaw. Ang mga sister gitudloan ug gidasig pinaagi sa visiting teaching, pagserbisyo, ug mga miting sa Relief Society. Matag Dominggo ang among tumong sa Relief Society mao ang pagtuon sa doktrina ug mga baruganan nga makatabang kanamo nga makab-ot ang among mga katuyoan. Isip resulta sa mga leksyon sa Dominggo, ang mga sister kinahanglan nga makasunod sa ebanghelyo nga may mas dakong konbiksyon sa ilang mga pamilya ug sa mga panimalay.
Ang Unang Dominggo Lahi
Sa ikaduha, ikatulo, ug ikaupat nga mga Dominggo sa bulan, kita magtuon sa Mga Baruganan sa Ebanghelyo ug sa mga pagtulun-an gikan sa kinatibuk-ang komperensya isip usa ka paagi nga modala kanato ngadto sa mga panalangin sa kinabuhing dayon. Apan, sa unang Dominggo sa bulan, usa ka miyembro sa kapangulohan sa Relief Society motudlo ug mangulo kanato sa mga panaghisgutan kon unsaon nato sa pagtuman ang atong sagrado nga mga responsibilidad isip mga miyembro sa Relief Society.
Isip mga kababayen-an nga Santos sa Ulahing mga Adlaw anaa kanato ang gipahiuli nga ebanghelyo ni Jesukristo ug mga pagpamatuod sa plano sa kaluwasan. Kita ang responsable sa katunga nga bahin alang sa mga babaye niana nga plano. Kini dili madelegar ngadto sa uban. Kita ang may tulubagon sa atubangan sa Ginoo sa pagbuhat sa atong mga buluhaton. Ug ang unang Dominggo sa bulan mao ang gasa nga panahon sa Ginoo alang kanato isip mga sister sa Relief Society aron makat-on kon unsaon sa pagtuman sa atong mga responsibilidad.
Ako manghinaut nga atong gamiton ang gasa nga panahon aron sa pagtuman sa atong tulo ka mga responsibilidad sa tibuok natong kinabuhi isip mga miyembro sa Relief Society: (1) pagpalambo sa hugot nga pagtuo ug personal nga pagkamatarung, (2) pagpalig-on sa mga pamilya ug mga panimalay, ug (3) pagpangita ug pagtabang niadtong nanginahanglan.
Ako manghinaut nga unta kita mopakli sa mga kasulatan ug sa gitugotan nga mga kapanguhaan sa Simbahan alang sa mga ehemplo, mga baruganan ug mga doktrina nga makatabang kanato nga makatuman niining mga responsibilidad ug magkat-on unsaon nato nga matubag ang mga hagit niining ulahing mga adlaw. Si Emma Hale Smith, ang atong unang presidente sa Relief Society, gisugo sa “pagpatin-aw sa mga kasulatan, ug pag-awhag sa simbahan, sumala sa ikahatag kanimo pinaagi sa akong Espiritu” (D&P 25:7). Kita mahimong mosunod sa iyang ehemplo.
Kon ako ang mobuhat niini sa unang Dominggo sa miting sa Relief Society, ako magsugod pinaagi sa mainampuong paghukom kon unsa ang among angay nga makat-unan. Ako dayon magsiksik diha sa mga kasulatan aron sa pagdiskobre unsa ang gitudlo niini kabahin niana nga hilisgutan. Ako makakat-on unsa ang gitudlo sa mga propeta ug mga lider sa Simbahan. Dayon ako mag-ampo alang sa giya sa Espiritu samtang akong gisulat ang pipila ka mga pangutana sa panaghisgutan nga among magamit samtang kami dungan nga magtuon sa miting sa unang Dominggo. Ako manghinaut nga ang mga sister mamauli sa balay nga mas lig-on ug gamiton kining sumbanan sa pagtuon diha sa ilang mga panimalay ug sa pagtudlo sa ilang mga pamilya.
Pagpalambo sa Hugot nga Pagtuo ug Personal nga Pagkamatarung
Ang akong lola, nga si Isabelle Bawden Bangerter, naila nga usa ka babaye nga may talagsaong hugot nga pagtuo. Siya nakaangkon sa iyang hugot nga pagtuo isip usa pa ka bata ug milihok aron sa pagpalambo niini sa iyang tibuok nga kinabuhi. Siya mitudlo sa Relief Society sulod sa daghang mga tuig, ug diha sa mga sister sa Relief Society siya naila isip usa ka batid sa teyolohiya, usa ka babaye kinsa may dakong nahibaloan sa ebanghelyo ug makatudlo niini gamit ang mga kasulatan. Siya nagpadayon gihapon sa pagtuon sa mga kasulatan sa dihang siya namatay sa edad nga 97. Si Lola Bangerter usa ka babaye kinsa may pagsalig sa iyang mahangturon nga mga tulumanon ug mga responsibilidad. Sa dihang ako usa pa ka bag-o nga inahan, ako nangutana kaniya kon posible ba sa pag-amuma og usa ka matarung nga kaliwatan dinhi sa kalibutan nga puno sa kadautan. Siya mibarug, ug mitudlo kanako, siya mipahayag nga may gibug-aton nga miingon, “Oo! Kinahanglan imong buhaton! Mao kana ang rason nganong ania ka dinhi!” Ang iyang pagtulun-an midasig kanako nga mahimong mas matinguhaon kabahin sa akong mga responsibilidad ug sa paglantaw sa kinabuhi uban sa mas hugot nga pagtuo. Posible nga makasinati nianang sama nga direkta ug dinasig nga pagtulun-an matag semana sa Relief Society.
Ang mga sister kanunay adunay mga pangutana kon unsaon sa pagpuyo pinaagi sa mga kasinatian niining mortal nga kinabuhi nga puno sa hugot nga pagtuo. Ang unang Dominggo sa bulan naghatag kanato og oportunidad sa paghiusa nianang hugot nga pagtuo nga anaa sa matag Relief Society. Ang kaalam sa tanan nga nanambong makatabang sa pagtubag sa tinuoray nga mga pangutana ug mohatag og dinasig nga mga tubag.
Ang mosunod mao ang pipila ka mga ehemplo kon unsaon nato sa pagtuon ang unang Dominggo aron sa pagtabang kanato nga mapalambo ang atong hugot nga pagtuo ug personal nga pagkamatarung:
-
Paghimo ug paghupot sa mga pakigsaad.
-
Makasarang alang sa usa ka rekomend sa templo ug pagsimba diha sa mga templo.
-
Makasarang alang, sa pag-ila, ug pagsunod sa impluwensiya sa Espiritu Santo.
-
Pagtudlo ug pagpanalipod sa ebanghelyo ni Jesukristo.
-
Pag-apil sa sinsero nga personal nga pag-ampo ug pag-ampo sa pamilya.
-
Paghimo og family home evening.
-
Pagpatuman sa mga baruganan sa pagpaningkamot sa kaugalingon ug madaginutong pagpuyo.
Paglig-on sa mga Pamilya ug sa mga Panimalay
Sa dihang ako usa pa ka batan-on nga sister sa Relief Society, kami adunay klase alang sa pag-edukar sa mga mama kausa sa usa ka bulan. Bisan tuod ako adunay usa ka talagason ug hanas nga inahan, ako mikat-on gihapon gikan sa akong mga magtutudlo sa Relief Society kon unsaon nga mahimong usa ka mas maayo nga inahan ug unsaon sa pagpalambo sa akong panimalay. Kami mikat-on sa mga baruganan ug mga kahanas sa homemaking, kami mikat-on kon unsaon nga mahimong mas maayo nga mga ginikanan, ug kami mikat-on kon unsaon sa paglig-on sa among mga kaminyoon.
Ang bag-o pa nga mga inahan kanunay mohangyo kanako kon kami makahimo ba pag-usab og klase sa pag-edukar sa mga inahan sa Relief Society. Ang akong tubag oo. Kita makakat-on kon unsaon sa pagsuporta, pag-amuma, ug pagprotekta sa mga pamilya sa unang Dominggo sa bulan.
Ang mosunod mao ang pipila ka mga ehemplo kon unsa ang atong tun-an sa unang Dominggo aron sa pagtabang kanato nga malig-on ang atong mga pamilya ug mga panimalay.
-
Pagsabut ug pagpanalipod sa balaan nga mga tulumanon sa mga babaye.
-
Pagdawat sa mga panalangin sa priesthood.
-
Paghimo og mahangturon nga mga pamilya.
-
Pagpadayon og lig-on nga mga kaminyoon.
-
Pagbaton ug pag-amuma sa mga anak.
-
Pagpakita og gugma alang sa mga sakop sa pamilya ug pag-amuma kanila.
-
Pagdawat sa responsibilidad sa pagpangandam og usa ka matarung nga nagtubo nga henerasyon sa mga Santos sa Ulahing mga Adlaw.
-
Pagkasayud, pagpuyo, ug pagpanalipod sa doktrina sa pamilya.
-
Pagsiksik sa mga nangamatay nga mga sakop sa pamilya ug pagpahigayon og mga ordinansa sa templo alang kanila.
Pagpangita ug Pagtabang Niadtong Nanginahanglan
Ang mga leksyon sa unang Dominggo mao ang atong oportunidad sa paglig-on sa usag usa ug sa pagpangita og mga tubag sa mga kalisdanan sa kinabuhi. Sa bisan unsa nga higayon daghan sa mga sister sa matag Relief Society nakasinati og mga pagsulay ug mga pagkapakyas. Si Presidente Boyd K. Packer, Presidente sa Korum sa Napulog Duha ka mga Apostoles, mitawag sa matag Relief Society sa ward isip usa ka “sirkulo sa mga sister.” Siya miingon:
“Ang matag sister, dili igsapayan bisan asa nga dapit siya magbarug niana nga sirkulo, makatan-aw sa bisan asa nga kilid ug makabati sa diwa sa inspirasyon nga moabut samtang iyang idunol ang maloloy-on nga kamot sa gugmang putli niadtong kinsa anaa sa bisan asa nga kilid. …
“… Kamo moserbisyo sa inyong organisasyon, sa inyong katuyoan—ang Relief Society—kining talagsaon nga sirkulo sa mga sister. Ang inyong matag panginahanglan matuman, karon, ug sa kahangturan; ang matag walay pagpakabana mapapas; ang tanang pang-abuso pagakorihian. Kining tanan mahimong moabut kaninyo, ug daling moabut, kon inyong ipahinungod ang inyong kaugalingon sa Relief Society.1
Kini gayud akong kasinatian nga ang matag Relief Society sa ward adunay kapasidad sa paghatag sa usag usa og suporta nga gikinahanglan. Kon kita mangita ug modawat og tabang sa Espiritu Santo, ang tanang mga tubag mahimong makita diha sa matag sirkulo sa mga sister.
Kita adunay responsibilidad sa paghatag og kahupayan—kahupayan sa kalisud, kasakit, pagduha-duha, kaignorante, ug tanan nga mga nagpugong sa hingpit nga kalipay ug kauswagan sa usa ka babaye. Ang Relief Society kanunay gayud nga apil sa paghatag og kahupayan ngadto sa uban.
Kita nasayud nga tungod kay kita nagpuyo sa ulahing mga adlaw, kita isip mga indibidwal ug mga pamilya nag-atubang og daghang lisud nga mga hagit. Kining mga hagit naglakip sa abuso, pagkaadik, kabugnaw sa pagbati, utang, depresyon, pagkamasinupakon, walay trabaho, dili pagkahiusa sa pamilya, sakit, pagpanglutos, kalisud, ug kapintas. Kini mora og susama kaayo sa gipanagna ni Apostol Pablo diha sa 2 Timoteo 3:1–7, 13. Apan, kita dili kinahanglan nga mahadlok. Anaa kanato ang ebanghelyo ni Jesukristo. Si Apostol Pablo mihatag usab kanato sa solusyon:
“Apan magpadayon ka diha sa mga butang nga imong nahikat-onan ug imong ginatoohan pag-ayo, sanglit ikaw nahibalo man kong kinsa ang imong nahikat-onan niini;
“Ug nga sukad sa imong pagkabata ikaw nakasabut na sa balaan nga kasulatan nga makagagahum sa pagtudlo kanimo ngadto sa kaluwasan pinaagi sa pagtuo ni Jesukristo.
“Ang tibuok nga kasulatan gituga sa Dios, ug may kapuslanan alang sa pagpanudlo, alang sa pagpamadlong, alang sa pagpanul-id, alang sa pagmatoto sa pagkamatarung” (2 Timoteo 3:14–16).
Sa unang Dominggo, usa ka miyembro sa kapangulohan sa Relief Society sa personal nga paagi motudlo sa buluhaton sa Relief Society. Siya makapokus sa mga buhat sa kamanggiloy-on isip mga solusyon ngadto sa piho nga mga panginahanglan sa ward o branch. Siya makabansay og mga sister nga mahimong mga visiting teacher kinsa makatubag sa mga panginahanglan sa uban samtang sila mangita kanila. Ug kon angay, siya makahimo og mga buluhaton aron sa pagtabang sa piho nga mga tawo nga nagkinahanglan.
Paggamit sa Unang Dominggo
Ako nagtuo nga samtang ang mga lider sa Relief Society mangita sa panabang sa Espiritu Santo, sila madasig kon unsa ang angay nga tun-an ug itudlo panahon sa miting sa unang Dominggo sa Relief Society. Ako nasayud nga ang buluhaton sa Dios magpadayon sa tibuok kalibutan ug kini molambo tungod sa dakong bahin sa maayong mga babaye sa Simbahan nga mobuhat sa tanan kutob sa ilang mahimo aron sa pagpalambo og una niana nga buluhaton sa ilang mga panimalay ug mga pamilya ug dayon sa ilang uban nga mga sirkulo sa pagpakighigala ug mga kaila.
1 Pagpalambo sa Hugot nga Pagtuo ug Personal nga Pagkamatarung. Ang leksyon sa unang Dominggo makahatag kanato og oportunidad nga mopakli sa mga kasulatan alang sa mga doktrina nga makatabang kanato sa pagtubag sa mga hagit niining ulahing mga adlaw.
2 Paglig-on sa mga Pamilya ug mga Panimalay. Sa unang Dominggo sa bulan, kita makakat-on kon unsaon sa pagsuporta, pag-amuma, ug pagprotekta sa mga pamilya.
3 Pagpangita ug Pagtabang Niadtong Nanginahanglan. Kita adunay responsibilidad sa paghatag og kahupayan—kahupayan sa kalisud, kasakit, pagduha-duha, kaignorante, ug tanan nga nagpugong sa hingpit nga kalipay ug kauswagan sa mga babaye.
Paghulagway sa litrato pinaagi ni ROBERT CASEY; litrato ni Sister Beck pinaagi sa Busath Photography
Mga litrato nila ni Sister Thompson ug Sister Allred pinaagi sa Busath Photography; pahulagway sa litrato sa pamilya pinaagi ni Christina Smith
Wala: paghulagway sa litrato pinaagi ni Craig Dimond