Tibuok Simbahan

Mga Santos sa Africa Gitawag sa Adlaw sa Pagserbisyo

Nagdala og mga pala ug mga karetilya ug nagpahiyum ug nagsul-ob og yellow nga mga tsaliko ang mga miyembro sa Simbahan nga labaw pa sa 30 ka mga nasud sa Africa misalmot sa ikatulong All-Africa Service Project niadtong Agosto 22, 2009.

Sa usa ka siyudad sa Ivory Coast, ilang giayo ang mga karsada. Sa usa ka lungsod sa Liberia, ilang giayo ang daan nga mga balay. Sa Sierra Leone, ilang gilimpyohan ang mga kanal. Sa Nigeria, ilang gitang-tang ang walay silbi nga mga tanum gikan sa lokal nga building sa gobyerno. Sa Ghana, ilang gisilhigan ang merkado ug gipanguha ang binulto nga mga basura. Sa Kenya, Habagatang Africa, Cameroon, ug lapas pa, ang mga miyembro mibagnos sa mga selda sa prisohan ug mga kasilyas, mitanum og mga kahoy, miayo sa mga karsada, ug mitrabaho sa mga puy-anan sa mga nailo. Ilang gilimpyohan ang mga ospital ug mga panimalay, ilang giibut ang mga sagbot ug gipintalan ang mga timaan.

Si Elder Eric Jackson, direktor sa public affairs alang sa Africa Southeast Area, miingon, “Ang napamatud-an sa mga miyembro sa ilang mga kaugalingon mao nga kon may igong mga tawo ang moduol, walay proyekto nga dagko alang kanato.”

Diin ang mga miyembro naghago, ang mga reporter nagpundok aron mag-obserbar ug magsulat.

Daghan pa gawas sa mga miyembro sa Simbahan ang miapil sa proyekto. Ang Simbahan nakigtambayayong sa lokal nga nagserbisyong mga grupo, ubang mga tinuohan, ug mga ahensya sa gobyerno nga gawasnong mitanyag sa ilang mga himan ug mga materyal ug gani miapil sa paningkamot.

“Kadaghanan, sa dihang nakadungog nga kami naghimog [serbisyo] tungod kay gisunod namo ang maayong mga binuhatan ni Kristo, midayeg sa Ginoo ug miingon nga gusto nilang moapil namo,” miingon si Elder Adesina Olukanni, Area Seventy ug area direktor sa Public Affairs sa Kasadpang Africa.

Ang Unang Komperensya alang sa Kabatan-onan sa Ethiopia

Sa miaging Hulyo 2009 labaw pa sa 160 ka mga batan-on ug mga young adult nagpundok alang sa usa ka adlaw sa panaghigalaay, mga workshop, sayaw, ug mga pagpamatuod diha sa unang komperensya sa mga batan-on nga gihimo sukad sa Ethiopia.

Tungod kay ang upat ka mga branch wala maorganisar ngadto sa usa ka district, daghang mga miyembro wala mahibalo nga adunay ubang mga branch ug mga miyembro sa Simbahan sa Ethiopia. Kabahin sa katuyoan sa komperensya mao ang pagtugot kanila sa pagpakighugoy-hugoy uban sa ilang mga ka-edad samtang sila gibayaw sa espirituhanong paagi.

Si Wondwossen Amanuel, 23, kinsa nagpadala sa iyang misyonaryo nga mga papeles aron mahimong unang misyonaryo gikan sa Awasa Branch, miingon, “Makahatag kini kaninyo og pagdasig kon magpundok kamo ug magbuhat sa ingon nga mga kalihokan. Ang among branch gamay ra, apan didto gibati namo nga kami anaa sa panon—ug sama kini sa pamilya.”

Ang mga nangapil mapagarbuhong nagsul-ob sa mga singsing nga CTR ug mga T-shirt nga gidayan-dayanan sa mga pulong nga “Makanunayon ug Siguro,” ang tema sa komperensya.

Duha ka bulan sa hiniusa nga mga paningkamot sa mga misyonaryo, mga presidente sa branch, ug ang manggihatagong organisasyon nga Hope Arising, mipundok sa pioneer nga mga Santos gikan sa upat ka nagkatag nga mga branch ngadto sa complex sa simbahan sa Addis Ababa, Ethiopia.

Ang mga nangapil mibiyahe pinaagi sa bus og lima ka oras aron pagtambong sa komperensya, ug labaw sa katunga kanila dili mga miyembro ug mga investigator. Duha ang gibunyagan pagkasunod semana.

“Sa dihang [ang mga batan-on] nakaamgo nga dihay laing mga batan-on uban sa ilang mga paglaum, mga damgo, mga problema, ug mga kabalaka, sila nakabaton og labaw pa nga pagsalig. Sila nasayud nga sila wala mag-inusara, ug nakahatag kini kanila og kalig-on,” miingon si Elder Brad Wilkes, usa ka full-time nga misyonaryo kinsa, uban sa iyang asawa, si Sister Karen Wilkes, mitabang nga maorganisar ang komperensya.

Mga Young Women sa Romania Nagpahigayon sa Unang Kamping

Lima ka batan-ong mga babaye ug ilang mga lider gikan sa Bucharest Romania District, uban sa dili miyembro nga higala, miapil sa unang kamping sa Young Women sa Simbahan didto sa Romania nga nagsugod sa Agosto 24 hangtud sa 26, 2009. Ang presidente sa District Young Women nga si Dina Cojocaru nangulo sa kamping uban sa panabang sa senior nga mga misyonaryo nga sila si Elder Don ug Sister Edie Van Noy.

Ang batan-ong mga babaye ug mga lider nagpahigayon og debosyonal sa buntag ug gabii, naghiusa nga nagtuon sa mga kasulatan sa matag adlaw. Si Elder ug Sister Van Noy nag-workshop sa mga hilisgutan sama sa hiyas ug unsaon sa paghatag og epektibong pagpamulong diha sa simbahan. Sa laing workshop, ang batan-ong mga babaye nakat-on kabahin sa pagkaligdong ug pagsinina sa uso nga paagi samtang ipabilin gihapon ang kaligdong.

Si Alina Mateescu, usa sa batan-ong mga babaye, miingon nga naghunahuna siya kon unsaon sa mahiyason nga batan-ong babaye, apan pinaagi sa workshop kabahin sa hiyas siya nakasiguro nga siya mahimong ehemplo nga babaye sa kaligdong nga gusto sa Dios alang kaniya.

Ang Romania, usa ka nasud sa habagatang silangan sa Europe, nga adunay 2,736 nga mga miyembro sa 17 ka mga branch.

Ang mga miyembro sa Habagatang Africa nananum alang sa mga ilo diin walay nagdagayday nga tubig.

Litrato pinaagi ni Kaye Jackson

Ang mga miyembro sa Nigeria mitrabaho uban sa mga opisyal sa estado aron sa paglimpyo sa mga dinahili sa daplin sa karsada.

Litrato pinaagi ni Sola Idowu