Atong Luna

Diha sa Web: Tabang sa pagpili sa labing maayo nga mga poster aron magamit sa umaabut nga mga bulan. Adto sa liahona.lds.org aron sa pagbotar. Ug samtang atua kamo didto, kamo makasugyot gani og mga caption o mga ideya alang sa umaabut nga mga poster.

Ang Akong Paborito nga Kasulatan

“Kon kamo moduol ngari kanako kamo makaangkon og kinabuhi nga dayon. Tan-awa, ang akong bukton sa kalooy gitunol nganha kaninyo, ug kinsa kadto nga moduol Ako modawat kaniya; ug bulahan kadto kinsa moduol ngari kanako” (3 Nephi 9:14).

Kini usa sa akong mga paborito tungod kay kini mao ang kasulatan nga naghatag kanako og pagpamatuod nga si Kristo buhi ug buot nga kita mosunod Kaniya.

Olivia K., 15, Heves, Hungary

Kita mga Misyonaryo Karon

Ang artikulo sa Marso 2007 Liahona “Unsaon sa Pagpangandam aron Mahimong Usa ka Maayong Misyonaryo” midala kanato og importante nga mensahe. Kita dili kinahanglang maghulat nga ma-19 aron mahimong mga misyonaryo. Dili! Kita mga misyonaryo karon.

Kini misulti kanato nga kita kinahanglan nga magsiksik ug mamalandong sa mga kasulatan ug mag-ampo kanunay aron kita makabuntog ni Satanas. Kita kinahanglan nga kanunay adunay hugot nga pagtuo sa Manluluwas nga si Jesukristo.

Melissa N., 18, Samoa

Maayo Ra Ang Tanan

Klaro pa nakong nahinumduman ang gabii sa diha nga nakaplagan ko ang akong kaugalingon diha sa usa ka hilabihang espiritwal nga panagbangi. Ako nagpaingon sa institute sa diha nga ako mibati og kahasol. Ang akong hunahuna mibati og kalibog. Dili ako makasulti nga ako nahibalo sa pagkatinuod sa akong pagtuo. Ako wala na gayud mobati og kasigurohan sa bisan unsang butang. Akong gibati ang pagkawala sa kadasig ug pagkaulaw sa akong kaugalingon ug nag-ampo alang sa kalig-on.

Sa diha nga miabut ako sa balay-tigumanan, hilabihan ang akong kasubo. Ako miginhawa og lawom ug dayon misulod sa bilding. Sa dihang ako duol sa chapel, akong nadungog ang himno “Dali, Dali, Kamo mga Santos” (Mga Himno ug mga Awit sa mga Bata, nu. 2) nga gikanta sa isigka kaigsoonan. Akong gibati diha-diha ang kahupayan nga naggikan sa Dios pinaagi sa Espiritu Santo.

Ang pagbati sa kalinaw hilabihan kaayo nga wala nako kapugngi ang akong mga luha. Ang Ginoo mipahibalo kanako nga ang tanan mamaayo ra ug nga ako luwas. Akong nasabtan nga ang mga gahum sa kangitngit misulay sa paglaglag sa tanang kaayohan nga akong nakat-unan apan ang gugma sa Dios luwas ug may kainit. Akong nasabtan nga ang Dios tinuod ug maoy atong dangpanan ug kalig-on. Nakat-unan usab nako nga atong mabuntog ang mga pagsulay ug mga tintasyon kon atong gamiton ang hugot nga pagtuo diha sa Dios ug sa kanunay magtinguha sa Iyang paggiya pinaagi sa pag-ampo.

Kini nga kalibutan puno sa mga pagsulay, ug wala gayud kita mahibalo kon unsa ang moabut. Kita nagkinahanglan og hingpit nga pagsalig sa Dios, modugang sa atong hugot nga pagtuo pinaagi sa pagtuon sa mga kasulatan, ug magpakabuhi sumala sa Iyang kabubut-on.

Ivonete S., 19, Bahia, Brazil

“Kay ikaw magadagkut sa akong lamparahan: ang Ginoo nga akong Dios magahayag sa akong kangingit” (Salmo 18:28).

Kini Mao ang Inyong Luna

Kini mao ang inyong mga pahina—ang inyong luna aron sa pagpakigbahin uban sa laing kabatan-onan kon unsay kahulugan sa ebanghelyo nganha kaninyo. Ania ang unsay inyong mapaabut sa pagbasa niini nga mga pahina ug unsay inyong mapakigbahin:

• Mga kasinatian o mga pagtulun-an nga makatabang kaninyo nga mas makasabut ug makasunod sa ebanghelyo.

• Usa ka klaro kaayo nga litrato nga inyong gikuha ug kasulatan isip usa ka caption.

• Usa ka maayo nga kasinatian nga inyong maangkon samtang magtrabaho sa Katungdanan ngadto sa Dios o sa Personal nga Kauswagan.

• Inyong mga ikasulti mahitungod sa usa ka kasulatan nga nakapadasig kaninyo. Ilakip ang inyong litrato kon gusto ninyo.

• Ang ikasulti mahitungod sa Liahona: unsa nga mga artikulo ang ganahan ninyo nga basahon?

I-e-mail ang inyong istorya, litrato, o mga komentaryo ngadto sa [e-mail]. Palihug isulat ang “Our Space” diha sa hilisgutan nga linya, ug ilakip ang pagtugot sa inyong ginikanan (ipahayag diha sa e-mail) aron sa pagpakigbahin kon unsay inyong gipadala kanamo. Ang mga gipadala mahimo nga i-edit alang sa gitas-on o sa pagkaklaro.

Sa tuo: Paghulagway sa litrato pinaagi ni Craig Dimond