Ebanghelyo sa Akong Kinabuhi
Gigiyahan sa Espiritu
Ang trabahador sa konstraksyon nagbuy-od diin siya nahulog, kuyaw kaayo nga nagtuya-tuya sa usa ka tabla nga siyam ka mga pulgada (23 cm) ang gilapdon ug 100 ka pye (30 m) ang kahabugon. Siya naigo sa nahulog nga puthawng sagbayan nga hapit miputol sa iyang wala nga bukton ug bitiis.
Isip usa ka paramedic nga sakop sa Yorkshire Air Ambulance, nagserbisyo sa kadaghanang dapit sa amihanan sa England, ako wala gayud masayud kon unsa nga matang ang sunod nga emerhensya ang moabut o unsang matang sa sitwasyon ang among atubangon sa among pag-abut sa nahitaboan.
Niining hitaboa, ang biktima dili mahimong tandugon hangtud mahibaloan unsa ang mga kadaot nga iyang nahiaguman. Ako gipasaka pinaagi sa crane diha sa usa ka puthaw nga plataporma sa kargamento. Sa diha nga ako nakaabut sa biktima, usa ka trabahador sa konstraksyon migunit sa likod sa akong sanag nga jacket, nagsilbi isip nga “crane” aron sayon nakong mahiling ang biktima.
Sa mga sitwasyon nga sama niini, ang mga katuigan sa pagbansay magamit, mao nga ako misugod sa pagsusi unsa ang mga kadaot sa tawo. Sa iyang tuhod may usa ka pang-emerhensyang bendahe nga gibutang sa first aid nga tigresponde sa mga trabahante sa konstraksyon. Sa naandan akong hilngon ang samad aron mahibaloan ang kadaot tungod kay kana ang lagda nga gitudlo kanamo nga sundon.
Apan sa akong paghikap, ang Espiritu miaghat kanako: “Ayaw hilabti ang bendahe.” Mao nga wala nako tanduga kini. Tulo ka mga higayon atol sa hitabo, ako giaghat sa akong mga kauban didto—sa unang tigresponde, akong kauban nga diha sa ubos, ug sa usa ka doktor—aron hilngon ang samad sa tuhod, ug tulo na usab ka higayon, ang Espiritu miaghat kanako sa dili pagtandog sa bendahe. Sa diha nga among napakalma ang pasyente, among gialsa ang tawo ngadto sa plataporma sa kargamento, kaming duha gitunton paubos sa yuta, ug amo siyang gidala sa ospital.
Sa emergency resuscitation area, ang trauma team naghulat kanamo. Usa ka doktor dali nga mitangtang sa bendahe gikan sa tuhod. Diha-diha ang ugat mibuto, ug misugod sa pag-agas og kusog ang dugo sa pasyente. Diha sa kontrolado nga palibut sa ospital, kining makahulga sa kinabuhi nga sitwasyon dali ra nga nasulbad. Kon nahitabo pa kini didto sa tabla 100 ka mga pye sa itaas, ang biktima tingali dili na mabuhi.
Matag buntag ako mag-ampo ug mohangyo sa Langitnong Amahan sa pagtabang kanako, sa pagpanalangin kanako og inspirasyon nga masayud kon unsaon sa pagtabang sa kinamaayohang paagi ang akong mga kaigsoonan kinsa nagkinahanglan karong adlawa. Sa nanglabay nga mga tuig, ang kasinatian nagtudlo kanako nga sa bisan unsay giaghat sa Espiritu nga buhaton, sundon gayud. Kana nga pagkamasulundon nakapanalipod usab kanako.
Sama pananglit, usa sa akong mga responsibilidad mao ang paglihok isip usa ka tignabigar, nga mogiya sa piloto sa helicopter ngadto sa nahitaboan. Ang pang-emerhensya nga mga helicopter makalupad bisan asa, diin mahinungdanon kaayo aron dali nga makaabut sa nahitaboan apan delikado usab alang kanila. Kon kami maglupad og labaw pa sa 140 ka milya (225 km) kada oras, ang mga kable sa kuryente ug mga linya sa telepono mahimong dili makit-an. Ug kini mahimong mopikas sa helicopter dihadiha.
Sa usa ka biyahe milandig kami sa usa ka labing malisud nga dapit. Sa kalit ang Espiritu misulti kanako, “Ipaubos ang clipboard!” Sa gihapon diha dayon, kalit, nakong gibati, “Ipaubos kini!” Mao nga miduko ako aron ibutang ang akong clipboard sa kahon diha sa akong mga tuhod. Sa akong pagbuhat sa ingon, ang tumong sa akong panan-aw nausab, ug akong nakita ang kable sa kuryente ubos gayud kanamo. “Mga kable! Mga kable! Mga kable sa ubos!” mao ra ang akong nasulti. Ug bisan tuod nga amo gayud nga nasaghiran ang kable ug nakabawog niini, ang piloto dali nga nakalikay, ug mipataas kami ug naluwas. Kana mao ang labing duol sa katalagman nga akong naagian. Kon wala ang pag-aghat sa Espiritu, kadto nga emerhensya nga tawag tingali adunay hilabihan ka lahi nga katapusan.
Ako mapasalamaton kaayo tungod sa mahigugmaong paagi nga ang Langitnong Amahan nahibalo sa tanan natong mga panginahanglan. Ang Ginoo kanunay nga nagbantay kanato. Siya gusto nga kitang tanan magpabilin nga luwas sa espirituhanon nga paagi ug mopauli ngadto Kaniya, mao nga kanunay Siya nga makigsulti kanato pinaagi sa ligdong, hinay nga tingog sa Espiritu. Ang tanan natong buhaton mao ang pagpaminaw ug pagsunod.
Kon wala ang aghat sa Espiritu, kadto nga emerhensya nga tawag tingali adunay lahi kaayo nga katapusan.