Unsaon Namo Pagbayad ang Among Abangan?

Douglas Arévalo, Costa Rica

Usa ka tuig ug tunga human ang akong asawa, nga si Rebecca, ug ako nagminyo, ang kompanya diin ako nagtrabaho nasirado. Diha-diha dayon akong nakita ang akong kaugalingon nga wala nay trabaho.

Imbis nga mangita og laing trabaho, ako mibati og pag-aghat nga magsugod og akong kaugalingon nga kompanya. Ako nasayud nga kining hagit mahimong usa ka lisud nga butang, busa ako nag-ampo sa Langitnong Amahan aron sa pagsiguro kabahin sa akong gibati. Ang pag-ampo adunay importante nga bahin nianang inisyal nga desisyon ug nagpadayon nga nahimong hilabihan ka importante sukad niadto.

Niadtong Agosto 2003 ako misugod sa akong kaugalingong kompanya sa pagpamintal, pagpanghimo og mga garden, pagpanindot sa palibut [landscaping], ug buhat sa pagpang-ayo ug pagpanglimpyo [maintenance work]. Ang mga butang dili gayud sayon ilabi na kon ikaw magtukod og imong kaugalingon nga kompanya, ilabi na sa pagsugod niini. Sa sinugdanan sa unang buwan, si Rebecca ug ako kinahanglan nga mobayad og abang para sa among balay. Kami walay bisan usa ka sentimo. Busa usa ka buntag kami nag-ampo nga unta kami makakuha sa kwarta nga among gikinahanglan. Sa pagkahapon ako nadawat sa trabaho nga igong ibayad sa among abangan.

Usa ka bulan human ako misugod sa akong kompanya, ang presidente sa stake mihangyo kanako nga makigkita kaniya. Sa wala madugay ako gitawag nga mahimong bishop sa among ward. Ako nakahunahuna nga ang Langitnong Amahan miandam og paagi alang kanako nga modawat ug mobuhat niini nga calling. Kon kadtong usa nako ka trabaho, wala unta akoy igong panahon nga gikinahanglan alang sa mga miyembro sa ward ug sa akong kaugalingon nga pamilya. Tungod kay ako adunay akong kaugalingon nga kompanya, ako adunay iskedyul nga mahimo nakong ipahaum. Ako anaa sa balay alang sa importante nga mga panghitabo sa kinabuhi sa akong pamilya, sama sa pagkatawo sa akong mga anak ug sa ilang pagsugod og lakaw ug sa pagsulti. Dugang pa niana, ang akong asawa ug ako nakapangalagad sa Templo sa San José Costa Rica. Kini nga mga oportunidad, miabut tungod kay kami mitubag sa mga pag-aghat ug nangita og direksyon pinaagi sa pag-ampo, nakapasuod kanamo sa usag usa.

Ako bag-ohay lamang nga mibalik sa akong pagtuon sa unibersidad. Sa dihang ang pagdasig miabut sa pagbalik og eskwela, ako nabalaka kon unsaon nako sa pagsangkap ang akong pamilya. Duha ka adlaw sa usa ka semana ako anaa sa lawak klasehanan, dili sa trabaho. Unsaon sa akong pamilya nga makalampus niini?

Usab, ang akong asawa ug ako mihimo niini nga hagit nga usa ka butang sa pag-ampo, ug ang Ginoo mitubag. Ako nagsugod sa pagdawat og permanente nga mga kontrata, nga nakapasayon alang kanako sa pagtapal sa mga adlaw nga tingtrabaho nga wala ako makaadto tungod kay ako anaa sa eskwelahan.

Sa tanan niining mga kasinatian, among nakita nga ang Ginoo mituman sa Iyang saad: “Pangayo, ug kamo makadawat” (3 Nephi 27:29). Ang pag-ampo nahimong importante nga bahin sa pag-uswag ug pagpalambo sa among pamilya. Among nakita ug nabati nga kon kita moduol sa Ginoo, Siya mopanalangin kanato. Kami nasayud nga Siya nakaila kanato pinaagi sa ngalan, ug kita makapangayo Kaniya kon bisan unsa ang atong gikinahanglan.