Ako Walay Rekomend sa Templo

Anne-Mette Howland, Utah, USA

Sa dihang 17 pa akong panuigon, ako adunay dakong tinguha nga makakita og usa ka templo sa Santos sa Ulahing mga Adlaw. Ako mipuyo sa Denmark uban sa akong pamilya, diin nianang higayuna wala pay templo. Alang sa mga Santos nga nagpuyo sa Denmark, ang labing duol nga mga templo anaa sa Switzerland ug England. Ako walay kaila bisan usa niadto nga mga nasud, mao nga ang pagbiyahe sa bisan asa niini nga nasud nga ako lamang imposible gayud.

Apan tungod kay aduna akoy pamilya sa Utah, ako mihukom sa pagtigum og kwarta aron ako makabisita ug makahimo og mga bunyag alang sa mga patay didto sa Templo sa Salt Lake. Ako misulat sa akong tiya ug mga ig-agaw sa Utah aron sa pagtino kon maayo ba kon ako moadto para mobisita. Sila naghinam-hinam sa pagkadungog sa akong mga plano.

Human sa usa ka tuig ako nakatigum og igong kwarta para sa akong dugay na nga gipaabut nga pagbiyahe. Pipila ka adlaw human ako miabut sa Utah, ang akong tiya misuroy kanako ngadto sa Templo sa Salt Lake. Ako naghinam-hinam pag-ayo nga makakita niini sa personal ug mobuhat sa mga bunyag alang sa patay. Sa akong pag-abut sa may agianan pasulod, hinoon, usa ka worker sa templo nangita sa akong rekomend sa templo. Walay bisan usa ang misulti kanako kabahin sa rekomend sa templo. Ang worker mabinationg mipasabut unsa ang rekomend sa templo ug miingon kanako nga ako mahimong mokuha niini gikan sa akong bishop.

Ang akong kasingkasing nahugno. Ako kontento na lamang nga makabisita sa akong mga paryente ug pagtan-aw sa templo diha sa gawas.

Panahon sa pagpuasa ug miting sa pagpamatuod pagkasunod Dominggo, ako mibati nga kinahanglang mopakigbahin sa akong pagpamatuod, mosulti sa kongregasyon kon unsa ka dako ang ilang panalangin nga nagpuyo duol sa templo. Ako usab miingon nga ako ganahan kaayo nga mosulod apan dili makahimo tungod kay ako walay rekomend, hinoon ako kanunay nga gitudloan sa pagpuyo nga takus. Ako mitapos sa akong pagpamatuod pinaagi sa pag-awhag sa mga miyembro sa pagtambong kanunay sa templo kutob sa ilang mahimo.

Human sa pagsimba, ang bishop sa akong mga paryente miduol kanako ug miingon nga siya mosulay sa pagtabang kanako nga makakuha og rekomend sa templo, ug kami mihimo sa interbyu. Panahon sa interbyu, siya nangutana kanako kon ang akong bishop makasulti ba og Iningles. Ako miingon nga dili. Siya mitubag, “Ug ako dili makasulti og Danish.” Ang akong kasingkasing nahugno pag-usab.

Apan ang bishop miingon, “Miabut naka og ingon niini ka layo; dili lamang kita basta-basta nga mohunong. Ako nasayud nga ang Ginoo motabang kanato. Kita kinahanglan lamang magbaton og hugot nga pagtuo.”

Dayon siya nangayo sa numero sa telepono sa akong bishop sa Denmark, nga maayo gani kay ako nakadala. Ako nasurprisa nga nakadungog sa anak sa akong bishop nga mitubag sa telepono. Siya miingon kanako nga siya bag-o lamang miuli gikan sa iyang misyon sa England. Sa dihang ako misulti sa bishop nga Amerikano, siya miingon, “Nindot kaayo. Siya makahubad para kanato.”

Sa wala madugay kami nag-istoryahanay sa telepono—ang akong bishop nag-interbyu kanako alang sa rekomen, ang iyang anak nga lalaki naghubad niini alang sa bishop nga Amerikano. Sa wala madugay ako nakadawat sa akong rekomend ug sa katapusan nakasulod sa templo! Ako dili makasulti sa mga pulong sa hingpit nga kalipay nga akong gibati nasayud nga ang Ginoo miandam og paagi para kanako nga kini mahimo.

Sa kaulahian ako naminyo sa templo ug napanalanginan og upat ka matahum nga mga anak. Ako mapasalamaton kaayo sa Langitnong Amahan nga naghatag kanato og mga templo, ug ako mapasalamaton nga nasayud nga ako nabugkos sa akong pamilya ug kon, kami mopuyo nga matarung, kami mag-uban hangtud sa kahangturan.