Mahimo bang Isira Nako ang Akong Negosyo matag Dominggo?

Gerardo Adrián García Romero, Veracruz, Mexico

Tulo ka semana human nga akong giablihan ang akong kasingkasing, midawat sa ebanghelyo, ug mihimo og importante nga desisyon nga magpabunyag niadtong 2001, ako mitambong sa klase sa Sunday School diin kami naghisgut sa kaimportante sa pagbalaan sa adlaw nga Igpapahulay.

Isip usa ka malampusong tag-iya og negosyo nga may daghang mga empleyado, ako nagtrabaho matag Dominggo nga sobra na sa 20 ka tuig. Sa dihang ang kaimportante niining adlawa nahimong klaro ngari kanako, ako mihukom sa pagsulti sa akong tulo ka mga manager sa tindahan nga kami dili na mangabli og Dominggo.

Mga pipila ka semana human nga ako mipahibalo sa akong desisyon, ang tulo nako ka mga manager miingon nga daghang mapugsanon nga mga customer, kasagaran mga maestra sa eskwelahan, mihangyo kon kami ba mangabli sa among mga tindahan inigka sunod Dominggo. Ako anaa sa negosyo sa pagbuhat og kendi sa Papantla, ug ang mga tawo kinahanglan nga mopalit og kendi ug piñatas aron ilang andamon alang sa El Día del Niño (Adlaw alang sa mga Bata), diin pagahimoon inigka Lunes. Panahon sa Adlaw sa mga Bata, nga pagahimoon inigka Abril 30 sa Mexico, ang mga eskwelahan adunay mga party ug mga dula, ug ang mga bata makadawat og kendi.

“Ugma, sa Sabado, kamo akong pahibaloon,” akong giingnan ang akong mga manager.

Sa pag-abut sa balay, akong giingnan ang akong asawa unsa ang nahitabo. Ako nagtuo nga siya moingon og, “Pangabli. Total, usa ra bitaw na ka Dominggo.” Apan dili kini mao ang iyang tubag.

Uban sa walay pagduha-duha nga tingog, siya miingon kanako nga ako ang pangulo sa pamilya ug kini anaa ra sa akong desisyon. Apan dayon siya nangutana kanako, “Kon adunay usa ka tawo nga mosulti kanimo nga karong Dominggo ikaw makadawat og daghan kaayo nga kwarta o ikaw makadawat sa Langitnong Amahan, asa man ang imong pilion?”

Ang iyang pangutana nakatabang kanako sa paghunahuna sa kaimportante sa pagdawat sa Ginoo matag Dominggo, ug ako nasayud nga ako kinahanglan nga mobarug sa akong desisyon. Ang pagpasidungog sa Ginoo mao ang labing importante nga butang nga atong buhaton sa Dominggo, ug sukad niadto ako wala na mosipyat sa mga oportunidad sa pagbuhat sa ingon.

Kon atong unahon ang mga butang sa Ginoo kay sa mga butang sa tawo, kita makaangkon og pagpamatuod sa adlaw sa Igpapahulay. Sa among pagbalaan sa adlaw nga Igpapahulay, ang akong pamilya ug ako napanalanginan pag-ayo, ingon man ang akong negosyo. Unta kita makadawat sa mga panalangin sa pagbalaan sa adlaw sa Ginoo.