Unsa ang Atong Gituohan

Ang Dios Mao Gayud ang Atong Amahan

Ang Dios mao ang Amahan sa Langit, ang Amahan sa atong mga espiritu. Sa Dios nga Kapangulohan uban Kaniya mao si Jesukristo ug ang Espiritu Santo. Sila lain-lain nga binuhat nga may lain-laing mga tulumanon apan adunay usa ka katuyoan. Kini nga kamatuoran, kauban sa uban pa, nawala human sa kamatayon ni Jesukristo ug sa Iyang mga Apostoles, sa usa ka panahon nga gitawag og Apostasiya.

Ang Ginoo misugod sa pagpahiuli niining nawala nga mga kamatuoran panahon sa tingpamulak sa 1820, sa dihang ang 14 anyos nga si Joseph Smith nag-ampo sa kakahoyan duol sa iyang balay sa Manchester Township, New York, aron masayud kon asa nga simbahan siya magpamiyembro. Agi og tubag sa iyang pag-ampo, iyang nakita ang Dios nga Amahan ug si Jesukristo. Si Propeta Joseph Smith sa kaulahian misulat kabahin niini nga panan-awon: “Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17).

Niadtong Pebrero 16, 1832, ang Propeta ug si Sidney Rigdon midawat og usa ka pagpadayag. Sa pagpaila niana nga pagpadayag, sila mipamatuod kabahin ni Jesukristo ug sa Dios nga Amahan: “Ug karon human sa daghang mga pagpamatuod nga gihatag mahitungod kaniya kini mao ang pagpamatuod, ang katapusan sa tanan, nga kami naghatag kaniya: Nga siya buhi! “Kay kami nakakita kaniya, gani diha sa tuo nga kilid sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan” (D&P 76:22–23).

Mga doktrina nga mopamatuod sa Dios nga Amahan:

1. Kita gilalang diha sa hitsura sa Dios (tan-awa sa Moises 2:26).

2. Ang Dios mao ang Makagagahum nga Tiglalang, ug ang “tanan nga mga butang nagpakita nga adunay Dios” (Alma 30:44).

3. Ang Dios mao ang atong Langitnong Amahan, sa literal usa ka espirituhanon nga ginikanan (tan-awa sa Mga Hebreohanon 12:9).¹

4. Ang Dios nga Amahan adunay lawas nga unod ug mga bukog nga mahikap (tan-awa sa D&P 130:22).

5. Ang atong Langitnong Amahan mihatag kanato sa plano sa kaluwasan (tan-awa sa Alma 34:9).

Mga pamaagi nga atong maila ang atong Langitnong Amahan:

1. Pagbusog sa mga kasulatan (tan-awa sa 2 Nephi 32:3).

2. Duol aron makaila kang Jesukristo (tan-awa sa Juan 14:9).

3. Tumana ang mga sugo sa Dios ug sunda ang mga propeta (tan-awa sa Juan 14:21; D&P 1:38).

4. Uban sa hugot nga pagtuo, pag-ampo sa Dios sa ngalan ni Jesukristo (tan-awa sa Santiago 1:5; 3 Nephi 18:20).

Aron makat-on og mas daghan kabahin sa atong sukaranang pagtuo, bisitaha ang Mormon.org (anaa sa daghang mga pinulongan, gilista sa ubos sa Web page).

Mubo nga sulat

1. Tan-awa sa Mga Pagtulun-an sa mga Presidente sa Simbahan: Joseph Smith (2007), 39.

Paggahin og panahon sa pagtan-aw sa kalangitan, diin ang mga grupo sa mga bitoon ug mga planeta mga ebidensya sa “Dios nga naglihok sa iyang pagkahalangdon ug gahum” (tan-awa sa D&P 88:41–47).

“Tuo sa Dios; tuo nga siya mao, ug nga siya ang milalang sa tanan nga mga butang, lakip sa langit ug sa yuta; tuo nga siya aduna sa tanan nga kaalam, ug ang tanan nga gahum, sa langit ug sa yuta” (Mosiah 4:9).

Wala: litrato sa planeta sa maayong kabubut-on sa NASA/JPL; litrato sa mga bitoon © NASA ug STScI; paghulagway pinaagi ni Robert T. Barrett; paghulagway sa litrato pinaagi ni Wei-Hsiang Wang; tuo: painting sa mga hayop pinaagi ni Stanley Galli; paghulagway sa Langitnong Amahan uban sa mga bata pinaagi ni Paul Mann; detalye gikan sa Ang Unang Panan-awon, ni Del Parson; paghulagway sa litrato sa pamilya pinaagi ni Welden C. Andersen; paghulagway sa litrato sa lalaki pinaagi ni Welden C. Andersen; litrato ni Presidente Monson pinaagi ni Craig Dimond; paghulagway sa litrato sa babaye pinaagi ni Ruth Sipus