Walay Paglubad nga mga Istorya sa Ebanghelyo
Pagsulbad sa Emosyonal nga mga Problema sa Kaugalingong Pamaagi sa Ginoo
Kini nga sinulat naggikan sa usa ka pamulong sa kinatibuk-ang komperensya nga orihinal nga gihatag niadtong Abril 1978. Mga punctuation gihimong standard; mga subhead gidugang. Ang tibuok teksto makita sa liahona.lds.org.
Ang atong mga bishop nag-atubang sa nagkadaghan nga tawag sa pagtambag sa mga miyembro nga adunay mga problema nga may kalabutan sa emosyonal nga mga panginahanglan kay sa panginahanglan sa pagkaon o sinina o pinuy-anan.
Ang akong mensahe, hinoon, mahitungod sa hilisgutan nga: pagsulbad sa emosyonal nga mga problema sa kaugalingong pamaagi sa Ginoo.
Maayo na lang, kay ang mga baruganan sa temporal nga welfare magamit usab ngadto sa emosyonal nga mga problema. …
Mga Baruganan sa Pagpaningkamot sa Kaugalingon
Ang handbook sa welfare nagtudlo: “[Kita kinahanglan] nga matinud-anong motudlo ug moawhag sa mga miyembro sa Simbahan nga makasuporta sa ilang kaugalingon kutob gayud sa ilang mahimo. Walay tinuod nga Santos sa Ulahing mga Adlaw ang makahimo … sa boluntaryong paghatag sa iyang kaugalingon nga palas-anon ngadto sa uban alang sa pagsuporta sa iyang kaugalingon. Kutob sa iyang mahimo, ubos sa pagdasig sa Labing Gamhanan ug uban sa iyang kaugalingon nga mga paningkamot, siya mosangkap sa iyang kaugalingon sa mga panginahanglan sa kinabuhi” ([1952], 2). …
Kita nagmalampuson gayud sa pagtudlo sa mga Santos sa Ulahing mga Adlaw nga sila kinahanglang mosangkap sa ilang kaugalingong mga panginahanglan sa materyal nga butang ug dayon mohatag alang sa kaayohan niadtong kinsa dili makasangkap alang sa ilang mga kaugalingon.
Kon ang usa ka miyembro dili makasuporta sa iyang kaugalingon, dayon siya mangayo og tabang sa iyang kaugalingong pamilya, ug dayon diha sa Simbahan, niana nga han-ay. …
Kon ang katawhan makahimo apan walay tinguha nga moatiman sa ilang mga kaugalingon, kita adunay responsibilidad sa pagpahamtang sa balaod nga gihatag sa Ginoo nga ang mga tapulan dili makakaon sa tinapay sa mga mamumuo. (Tan-awa sa D&P 42:42.)
Ang yano nga balaod gikan pa sa sinugdanan mao ang pag-atiman sa kaugalingon. Kining mubo nga panultihon sa kamatuoran maoy usa ka modelo: “Unsay naa maoy gamita, gamita samtang mahimo pa, o bisan wala ka niini nga butang padayon lang.”
Sa dihang ang programa sa welfare sa Simbahan unang gipahibalo niadtong 1936, ang Unang Kapangulohan miingon:
“… Ang tuyo sa Simbahan mao ang pagtabang sa katawhan sa pagtabang sa ilang mga kaugalingon” (sa Conference Report, Okt. 1936, 3; mga italic gidugang). …
Kini usa ka sistema sa pagtabang sa kaugalingon, dili usa ka sistema sa paghatag diha-diha dayon. Kini nagkinahanglan og mabinantayon nga pag-imbentaryo sa tanang kapanguhaan sa personal ug sa pamilya, kining tanan kinahanglang klaro sa dili pa dugangan sa bisan unsa nga butang gikan sa gawas.
Kini wala magpasabut nga ang usa ka bishop dili mabination o walay pagbati kon ang bishop mopatrabaho sa usa ka miyembro kutob sa iyang mahimo alang sa iyang nadawat gikan sa welfare sa Simbahan.
Wala gayud untay bisan gamay nga kaulaw alang ni bisan kinsa nga miyembro nga pagatabangan sa Simbahan. Kana, kon iyang gibuhat ang tanan kutob sa iyang mahimo. …
Ang unod sa buot nakong isulti mao kini: Ang sama nga baruganan sa—pagpaningkamot sa kaugalingon—magamit sa espiritwal ug ingon man ngadto sa emosyonal. …
Gawas lamang kon kita magmatngon, kita duol na kaayo sa pagbuhat og usa ka butang alang sa atong kaugalingon sa emosyonal nga paagi (ug, ingon man, sa espiritwal nga paagi) unsa ang atong gitrabahoan og maayo sulod sa mga henerasyon sa paglikay sa materyal nga paagi.
Pagtambag
Kita mora og nagpalambo og epidemya nga “gusto kanunay nga tambagan” nga makapahinay sa espiritwal nga kalig-on gikan sa Simbahan susama kaayo sa kasagaran nga hilanat nga makahurot sa kusog sa tawo kay sa bisan unsa pa nga sakit. …
Uban sa simbolo nga pagkaistorya, daghang mga bishop ang mobutang sa kilid sa iyang lamesa og daghang listahan para sa emosyonal nga pangpahupay.
Kon ang usa ka tawo moduol nga may problema, ang bishop, sa walay swerte, sa walay pangutana, mohatag niining daghang listahan, nga wala gani siya maghunahuna kon unsa ang iyang gibuhat alang sa iyang katawhan. …
Ang dili pag-agad sa uban sa espiritwal nga paagi ug ang pagka mapaningkamuton sa kaugalingon usa ka makapatunhay nga gahum diha sa Simbahan. Kon ato kining ihikaw sa mga miyembro, unsaon man nila sa pagkadawat og pagpadayag alang sa ilang kaugalingon? Unsaon man nila pagkahibalo nga adunay usa ka propeta sa Dios? Unsaon man nila pagkadawat og mga tubag sa ilang mga pag-ampo? Unsaon man nila pagkahibalo sa kasiguroan alang sa ilang kaugalingon? …
Paggamit niini ngadto sa mga Pamilya
… Ang mga amahan mao ang responsable sa pagdumala sa ilang mga pamilya.
Usahay, uban sa tanang maayo nga mga intensyon, kita nagkinahanglan og hilabihan ka daghan nga dili na mahimo sa mga bata ug sa amahan.
Kon ang akong anak nga lalaki nagkinahanglan og tambag, bishop, ako ang una nga responsable niini, ug ang ikaduha ikaw.
Kon ang akong anak nga lalaki nagkinahanglan og lingaw-lingaw, bishop, ako ang una nga responsable niini, ug ang ikaduha ikaw.
Kon ang akong anak nga lalaki nagkinahanglan og pagkorihir, bishop, kini gayud mao ang akong unang responsibilidad, ug ang imoha ikaduha.
Kon ako napakyas isip usa ka amahan, tabangi ko og una, ug ang akong mga anak ikaduha.
Ayaw og pagdali-dali sa pagpuli sa akong buluhaton sa pag-amuma sa akong mga anak.
Ayaw og pagdali-dali sa pagtambag kanila ug sa pagsulbad sa tanang mga problema. Paapila ako. Kini mao ang akong pangalagad.
Kita karon nagpuyo sa panahon nga ang kaatbang moatake sa matag oportunidad sa pilosopiya nga diha-diha dayon nga pagkatagbaw. Kita mora og modemanda og diha-diha dayon sa tanang butang, lakip na ang diha-diha dayon nga mga solusyon sa atong mga problema. …
Kini gayud gituyo nga ang kinabuhi mahimong usa ka hagit. Ang pag-antus og pipila ka mga kabalaka, pipila ka kasub-anan, pipila ka pagkasagmuyo, bisan gani ang pipila ka mga kapakyasan kini normal lamang.
Tudloi ang atong mga miyembro nga kon sila adunay maayo, dunay miserable nga adlaw panagsa, o daghan nga nagsunod-sunod nga dili maayo, nga mobarug nga lig-on ug moatubang niini. Ang mga butang mamaayo ra.
Adunay dakong katuyoan sa atong panlimbasug sa kinabuhi.
Ang baruganan sa pagpaningkamot sa kaugalingon o personal nga dili magsalig mao ang sukaranan sa malipayon nga kinabuhi.