Ang Gahum sa usa ka Pangutana
Ang akong higala nangutana kon ngano nga ang akong igsoong lalaki ug ako wala moapil sa mga klase sa relihiyon. Kana nga pangutana mihatag kanako og higayon sa pagsulti kaniya mahitungod sa ebanghelyo.
Nahimo akong higala ni Kerstin sa dihang ako 14 anyos pa. Kami pareho og eskwelahan. Ako nakaila kon kinsa siya sulod na sa dugayng panahon, apan wala ko kaila niya sa personal kaniadto tungod kay 12 anyos pa siya.
Kami nagkaila og maayo sa usag usa sa dihang misulay kami og apil sa dula sa eskwelahan. Kami sa wala madugay nahimong maayong managhigala, bisan tuod kon may duha ka tuig nga deperensya sa edad. Dili pa lang dugay nga kami magkita inig ka hapon aron sa paglakaw-lakaw ug magsultihanay. Usa ka hapon sa tingpamulak, sa usa sa among mga lakaw, siya nangutana og usa ka butang nga nakapausab sa iyang kinabuhi sa kahangturan.
Si Kerstin natingala kon ngano nga ang akong igsoong lalaki ug ako dili moapil sa klase sa relihiyon sa eskwelahan sama sa kadaghanan sa mga estudyante sa Austria. Siya akong gisultihan kabahin sa ebanghelyo ni Jesukristo ug kabahin sa Ang Simbahan ni Jesukristo sa mga Santos sa Ulahing mga Adlaw. Dayon ako mihatag sa akong pagpamatuod ug midapit kaniya sa pag-adto sa usa ka kalihokan sa mga batan-on. Wala madugay siya akong gihatagan og kopya sa Basahon ni Mormon ug sa Liahona.
Sukad niadto si Kerstin nakaapil sa matag kalihokan sa Simbahan ug motambong sa miting sa Simbahan matag Domingo. Nakatambong na gani siya sa youth conference. Kutob kami adunay panahon, kami manglakaw ngadto sa gamay nga sapa sa duol aron magbasa sa among mga kasulatan ug magtrabaho sa Personal nga Kauswagan sa Young Women.
Ang nakasubo lang, kay si Kerstin dili pa mabunyagan hangtud nga siya mag-edad og 18. Ang iyang mga ginikanan dili gusto og bisan unsang mga gubot uban sa iyang mga paryente. Bisan pa man niini nga babag, si Kerstin nakahimo na sa pagpatambong sa iyang inahan ngadto sa simbahan.
Si Kerstin usab nagtrabaho uban sa mga misyonaryo. Siya mohisgut kabahin sa Simbahan sa matag usa nga iyang ikahimamat ug nakatabang nga madasig ang iyang amahan mahitungod sa programa sa family history, bisan kon siya dili interesado sa relihiyon.
Si Kerstin ang akong ehemplo kon unsa diay ka sayon ang paghisgut ngadto sa uban mahitungod sa ebanghelyo ug giunsa sa atong Amahan sa Langit pag-andam sa mga tawo nga maminaw sa Iyang pulong. Kinahanglan lamang nga atong ablihan ang atong mga ba-ba ug magbaton og hugot nga pagtuo. Ang tanan mosunod ra.
paghulagway pinaagi pinaagi Amy Thompson