Kabatan-onan Mosaulog og A Brand New Year
Mga yunit sa Simbahan sa tibuok kalibutan nakadawat og DVD nga giulohan og A Brand New Year: 2010 Youth Celebration. Ang DVD mipasiugda sa 2010 nga tema sa Mutual ug mahimong gamiton aron madugangan ang mga klase sa mga batan-on, mga miting sa korum, Mutual, mga panaghisgutan sa bishop ngadto sa mga batan-on, ug ubang mga kalihokan sa tibuok tuig.
Ang 2010 nga tema sa Mutual mao ang “Magmakusganon ka ug magmaisug; ayaw pagkahadlok ug dili ka magmaluya: kay ang Ginoo nga imong Dios, magauban kanimo bisan asa ikaw paingon” (Josue 1:9; empasis gidugang). Ang unang bahin sa A Brand New Year: 2010 nga Pagsaulog sa mga Batan-on naglatid og espesyal nga mensahe gikan ni Elder M. Russell Ballard, usa ka miyembro sa Korum sa Napulog Duha ka mga Apostoles, ug usa ka musikal koleksyon sa mga batan-on sa tibuok kalibutan.
Ang DVD naglakip usab og dugang siyam ka mga bahin, diin naglakip og makapadasig nga mga mensahe pinaagi sa mga istorya, mga pagpamatuod, musika, ug espesyal nga mga pasundayag gikan sa kinatibuk-ang mga kapangulohan sa Young Men ug Young Women. Kini nga mga bahin nagtumong sa mga sumbanan sa ebanghelyo gikan sa Alang sa Kalig-on sa mga Kabatan-onan, lakip ang edukasyon, pamilya ug mga higala, musika ug sayaw, pagpakig-date ug hiyas, pisikal nga kahimsog, pag-alagad sa uban, ug paghinulsol.
Ang mga batan-on sa tibuok kalibutan nakigbahin sa ilang mga hunahuna ug mga pagpamatuod diha sa DVD.
“Mahinamon kami alang sa mga batan-on sa Simbahan nga makakita sa usag usa dinhi niini nga DVD ug mapalig-on pinaagi sa mga pagpamatuod sa usag-usa,” miingon si Elaine S. Dalton, kinatibuk-ang presidente sa Young Women. “Kinsa kadtong motan-aw makakita sa maisugong mga batan-on sa tanang dapit nga nagpili sa pagsunod sa mga sumbanan [sa Simbahan] ug naghimog kalainan sa kalibutan. Naglaum kami nga ang priesthood ug mga lider sa auxiliary ug mga magtutudlo mogamit sa DVD diha sa ilang mga klase aron sa pagtudlo sa mga sumbanan ug mga kalihokan nga makatabang sa mga kabatan-on nga mopasalig sa pagsunod ug paggamit niini nga mga sumbanan sa ilang mga kinabuhi.”
Ang mga lider sa Simbahan miawhag sa lokal nga priesthood ug mga lider sa auxiliary sa pagrebyu sa DVD ug paggamit niini sa ilang mga miting ug mga kalihokan. Ang unang bahin sa DVD magamit sa mga kalihokan sa Bisperas sa Bag-ong Tuig o ubang espesyal nga mga kalihokan diin ang tema gipasundayag. Ang nahibilin nga mga bahin giplano nga gamiton sa tibuok tuig aron pagpalapad sa tema.
Ang mga bahin gimantala nga may mga subtitle sa Cantonese, English, French, German, Italian, Japanese, Korean, Mandarin, Portuguese, Russian, ug Kinatsila. Ang materyal gikan sa DVD anaa usab aron i-download sa Internet.
Si Manuel Sarabia sa Mexico mipakigbahin sa iyang mga kasinatian diha sa DVD.
Litrato pinaagi ni tyler harris