Ko e Meʻa ʻOku Tau Tui Ki Aí

Kuó Ne Toe Tuʻu

Fai ʻe Palesiteni Thomas S. Monson

Ko e fē pē ha feituʻu ʻoku ou fononga ki ai, te u feinga ke ʻaʻahi ki he faʻitoka ʻo e koló. Ko ha taimi ia ʻo e fakalaulauloto, ʻo e fakakaukau ki he ʻuhinga ʻo e moʻuí mo e pau ke hoko mai ʻa e maté. ʻI he kiʻi faʻitoka ʻi he kolo ko Sanitā Kalalá ʻi ʻIutā, ne u manatu ai ki he konga lahi ʻo e ngaahi hingoa faka-Suisalani naʻe tohi ʻi he ngaahi maka fakamanatu ʻo e faʻitoká. Ne mavahe ʻa e tokolahi ʻo e kakaí ni mei honau ʻapí mo e fāmili ʻi Suisalani kelekele lelei mo lau maʻuiʻuí, pea ʻi heʻenau tali ki he ui ke “Haʻu ki Saioné,” naʻa nau nofoʻi ai e ngaahi kolo ʻoku nau “tatoka ai ʻi he melinó.” Ne nau kātekina e ngaahi tāfeá, taʻe ʻi ai ha ʻuha he faʻahitaʻu māfaná, siʻisiʻi e ututaʻú, mo e ngāue lahí. Ne nau tuku mai ha tukufakaholo ʻo e feilaulau.

Ko e ngaahi faʻitoka lalahi tahá, ʻa kinautolu ʻoku lahi taha ʻene fakatupu e ngaahi ongoʻi ʻofa tahá, ʻoku fakalāngilangiʻi kinautolu ko e ngaahi feituʻu mālōlōʻanga ʻo ha kau tangata kuo nau mate ʻi he taú lolotonga ʻoku nau tui e teunga ʻo honau fonuá. ʻOku tau fakakaukau atu ki he ngaahi fakaʻānaua kuo maumaú, ngaahi ʻamanaki ne ʻikai fakahokó, ʻa e ngaahi loto fonu ʻi he mamahí mo e ngaahi moʻui ʻa kinautolu kuo mate kei talavou tupu mei he taú.

ʻOku fakamamafaʻi mai ʻe he ngaahi ʻeka lahi ʻoku tuʻu ai e ngaahi kolosi hinehina ʻi he ngaahi kolo ʻo Falanisē mo Pelisiumé ʻa e tokolahi ʻo e mate ʻi he ʻUluaki Tau Lahi ʻa Māmaní. ʻOku ʻi ai ha fuʻu faʻitoka lahi ʻoku tuʻu ʻi Vētani ʻi Falanisē. ʻI he faʻahitaʻu failau kotoa pē ʻoku palauʻi ai ʻe he kau fāmá ʻa e kelekelé, ʻoku nau maʻu ai ha tatā helemeti, kauʻi meʻafana—ko hano fakamanatu mai ia ʻo e kau tangata ʻe lau miliona kuo nau fakangahū e kelekelé ʻaki e toto ʻo ʻenau moʻuí.

Ko Mate, ko ha Vahe Foʻou ʻo e Moʻuí

ʻI he ngaahi taʻu lahi kuohilí, ne u tuʻu ʻi he veʻemohenga ʻo ha talavou, ko e tamai ʻa ha fānau ʻe toko ua, lolotonga ʻokú ne fakaʻau hifo ke maté. Naʻá ne puke atu hoku nimá, sio ki hoku matá, peá ne fehuʻi mai, “ ʻE pīsope, ʻoku ou ʻiloʻi ʻoku ou mei mate. Talamai angé pe ko e hā ʻe hoko ki hoku laumālié ʻi he taimi te u mate aí.”

Ne u lotu ke maʻu ha fakahinohino fakalangi. Naʻe taki ʻeku tokangá ki he Tohi ʻa Molomona ʻi he funga tēpile ʻi hono veʻemohengá. Ne u kamata lau leʻolahi:

“Ko ʻeni, ko e meʻa ki he tuʻunga ʻo e laumālié ʻi he vahaʻa ʻo e maté mo e toetuʻú— … ʻoku fakafoki ʻa e laumālie ʻo e tangata kotoa pē, ʻo ka hili ange ʻa ʻenau mavahe mei he sino fakamatelié ni, … ki honau ʻapí ki he ʻOtua pē ko ia ʻa ia naʻe foaki ʻa e moʻuí kiate kinautolú.

“… Ko e ngaahi laumālie ʻo e faʻahinga ʻoku māʻoniʻoní ʻe tali ʻa kinautolu ki ha potu ʻo e fiefia, ʻa ia ʻoku ui ko palataisi, ko ha potu ʻo e mālōlō, ko ha potu ʻo e melino, ʻa ia te nau mālōlō ai mei heʻenau ngaahi faingataʻaʻia kotoa pē mo e hohaʻa kotoa pē mo e mamahi” (ʻAlamā 40:11–12).

Ne kuikui hifo hoku kaungāmeʻa kei talavoú ni, fakamālō fakamātoato mai, pea mavahe fakalongolongo atu ki he palataisi ko ia naʻá ma toki lau ki aí.

Ikunaʻi ʻo e Maté

Tuku ke fakamatalaʻi ʻe Luke, ko e toketaá, ʻa e meʻa naʻe hoko kia Mele mo e Mele ʻe tahá ʻi heʻena aʻu atu ki he fonualoto ʻi he ngoué:

“Pea naʻa nau vakai kuo tekaʻi ʻa e maká mei he fonualotó. …

“… Naʻa nau hū atu, ka naʻe ʻikai te nau ʻilo ʻa e sino ʻo e ʻEiki ko Sīsuú.

“… Pea lolotonga ʻenau puputuʻu lahi aí, vakai, naʻe tuʻu mai kiate kinautolu ʻa e ongo tangata naʻe huhulu hona kofú:

“Pea … pehē ʻe kinaua kiate kinautolu, Ko e hā ʻoku mou kumi ai ʻa e moʻuí ʻi he potu ʻo e maté?

“ ʻOku ʻikai ʻi heni ia, ka kuo tuʻu hake” (Luke 24:2–6).

Ko e ui ʻeni ki he kakai Kalisitiane kotoa pē ke ngāué. ʻOku ʻomi ʻe he moʻoni ʻo e Toetuʻú ki he tokotaha mo e kakai kotoa pē ʻa e melino ʻoku ʻikai faʻa mahino ki ha taha. ʻOkú ne fakafiemālieʻi ʻa kinautolu naʻe mate honau ngaahi ʻofaʻangá ʻi he ngaahi manafa ʻo Felenitaá (ʻi ʻIulope) pe mole ʻi he kilisi tahí pe tatoka ʻi he kiʻi feituʻu ko ʻeni ko Sanitā Kalalá. Ko ha moʻoni ia ʻoku hoko ʻi māmani kotoa.

ʻI heʻeku hoko ko e siʻi taha ʻo ʻEne kau ākongá, ʻoku ou fakahā ʻeku fakamoʻoni fakatāutaha kuo lavaʻi ʻa e maté, kuo lava hono ikunaʻi ʻo e maté. Fakatauange ʻe ʻiloʻi ʻe he kakai kotoa pē ʻa e ngaahi folofola ko ia naʻá Ne fakatoputapuʻí. Manatuʻi kinautolu. Mahuʻingaʻia ʻiate kinautolu. Fakaʻapaʻapaʻi kinautolu. Kuó Ne Toe Tuʻu.

1. Kuo tau haʻu ki he māmaní ke ako, ke moʻui, ke fakalakalaka ʻi heʻetau fononga taʻengata ki he haohaoá.

2. ʻOku ʻi ai ha niʻihi ʻoku moʻui taimi nounou ʻi he māmaní, pea ʻoku moʻui fuoloa e niʻihi ʻi he fonua. ʻOku ʻikai ko e meʻafuá ʻa e lōloa ʻo ʻetau moʻuí ka ko e lelei ʻo e founga ʻoku tau moʻui ʻakí.

3. ʻOku hoko mai leva ʻa e maté pea mo e kamataʻanga ʻo ha vahe foʻou ʻo e moʻuí.

4. ʻOku tataki atu mei he vahe foʻou ko ʻení ki he ʻaho nāunauʻia ʻo e toetuʻú, ʻa e taimi ʻe toe fakatahaʻi ai ʻa e laumālié mo e sinó, pea ʻikai toe mavahevahe ʻo taʻengata.

Mei he “Kuó Ne Toetuʻu,” Liahona, ʻEpeleli 2003, 2–7.

Naʻe folofola ʻa Kalaisi kia Maʻata naʻe mamahí ʻo pehē, “Ko au ko e toetuʻu, mo e moʻuí: ko ia ʻoku tui kiate aú, ka ne mate ia, ʻe moʻui pē ia: pea ko ia ʻoku moʻui mo tui kiate aú, ʻe ʻikai ʻaupito mate ia” (Sione 11:25–26).

ʻOku fakahā ʻe he toetuʻu ʻa Kalaisí, ʻi heʻene hoko ko e konga ʻo e Fakaleleí, ha hala ke tau toetuʻu mo kitautolu hono kotoa.

Mei Toʻohema: ʻOku Moʻui Hoku Huhuʻí, tā ʻe Roger Loveless, ʻoua naʻa hiki hano tatau; tā fakatātā ʻe Matthew Reier, Christina Smith, mo Welden C. Andersen; Vakai ki Hoku Ongo Nimá mo e Vaʻé, tā ʻe Harry Anderson; Lāsalosi, tā ʻe Carl Heinrich Bloch