Hisitōlia ʻo e Siasí he funga Māmaní
Kalisi
Ne fekumi ʻa Likasi Pofanitisi mo Nikolasi Malavetisi ʻi ha taʻu ʻe tolu ki ha ngaahi moʻoni fakalotu feʻunga mo ʻena maʻu ha fakamatala nusipepa ʻi he taʻu 1898 fekauʻaki mo e tui ʻa e kau Māmongá. Naʻá na fie ʻilo ʻo toe lahi ange ko ia naʻá na fai ha tohi ki he hetikuota ʻa e Siasí. Naʻe fekau leva ʻe he kau taki ʻo e Siasí ʻa e palesiteni ʻo e Misiona Toaké ke ʻaʻahi mo akoʻi ʻa e ongo meʻá ni ʻi Kalisi. ʻI he 1903 naʻe mālōlō ai ʻa Nikolasi Malavetisi, ka ʻi he hili ha taʻu ʻe ua mei ai kuo toe fai ʻe Likasi Pofanitisi ha tohi ki he hetikuota ʻo e Siasí ʻo kole ke papitaiso ia. Naʻe toe fekau ʻe he kau taki ʻo e Siasí ʻa e palesiteni misiona ʻo Toaké ke foki ki Kalisi, ʻa ia naʻá ne papitaiso ai ʻa Misa Pofanitisi mo ha toko nima kehe, kau ai e uitou ʻo Nikolasi Malavetisí.
Hili ha mahina ʻe ono mei he fuofua papitaiso ʻi Kalisí ne tūʻuta ʻa e fuofua kau faifekaú, ka ʻi he 1909, naʻe kamata ʻa hono taʻofi ʻe he Siasí ʻa e ngāue fakafaifekaú ʻi ha taʻu ʻe 70 nai, tupu mei he ngaahi ngāngāʻehu fakapolitikale ʻi he fonuá. Lolotonga iá naʻe kamata ke vahevahe ʻe he kau sōtia ʻi he feituʻú ni ʻa e ongoongoleleí ki he kakai ʻi Kalisí. Ka naʻe kei tuai pē ʻene fakalakalaka ki muʻá; ʻi he taimi naʻe fetongi ai ʻe he Kolo ʻAtenisí ʻa e kiʻi kolo ʻa e kau sōtiá ʻi he 1967, naʻe toko 80 ʻa e kāingalotu ʻo e kiʻi koló ka ko e toko valu pē ʻo kinuatolu ko e kau Kalisi.
ʻI he 1972 naʻe fakatapui ai ʻa Kalisi ki hono malanga ʻaki ʻo e ongoongoleleí ʻe ʻEletā Kōtoni B. Hingikelī (1910–2008) ko ha mēmipa ʻo e Kōlomu ʻo e Kau Aposetolo ʻe Toko Hongofulu Mā Uá ʻi he taimi ko iá. Talu mei he taimi ko iá mo e lahi ha ngaahi fakalakalaka ʻi he ngāué kuó ne tokoniʻi ʻa e tupu tokolahi ʻa e kāingalotú, kau ai hono pulusi ʻo e Tohi ʻa Molomoná ʻi he lea faka-Kalisí ʻi he 1987, fokotuʻu ʻo e Misiona ʻAtenisi Kalisí ʻi he 1990, pea mo hono fakatapui ʻo e fuofua falelotu ʻi Kalisí ʻi he 1999.
|
Memipasipí (2009) |
661 |
|
Ngaahi Vahefonuá |
1 |
|
Ngaahi Koló |
5 |
ʻI he ngaahi taʻu kimui ní maí kuo hoko ʻa e kiʻi Moʻunga ko Maʻasí, ʻa e feituʻu naʻe fakahoko ai ʻe he ʻAposetolo ko Paulá ʻa ʻene malanga ʻoku hā ʻi he Ngāue 17, ko ha feituʻu ke fakahoko ai ha ngaahi houalotu fakamoʻoni, ngāueʻofa mo e ngaahi fakafiefia ko e fakamanatua ʻo ha kakai Kalisi ʻoku hoko ko e kau faʻifaʻitakiʻanga lelei.