Naʻá Ne Fakaʻapaʻapaʻi ʻEku Kolé

Sione Kālosi Falasi ʻAkuila, Seni Hosē, Kosita Lika

ʻI hono papitaiso au ʻi hoku taʻu 18, naʻá ku ʻilo ʻe hoko ʻa e ongoongolelei ʻo Sīsū Kalaisí ko ha tōʻonga moʻui. Naʻá ku ongoʻi ʻa e mahuʻinga mo e fakamātoato ʻo hono moʻui ʻaki ʻa e ngaahi tuʻunga ʻulungāaanga ʻo e ongoongoleleí pea kuo tāpuekina ʻeku moʻuí ʻi ha ngaahi founga kehekehe ʻi hono fakahoko iá.

Ko e taha ʻo e ngaahi tefitoʻi moʻoni ʻo e ongoongoleleí ʻoku mahuʻinga ʻaupito kiate aú ko hono tauhi ʻo e ʻaho Sapaté ke māʻoniʻoní. ʻOkú ne fakaʻataʻatā au mei heʻeku ngaahi ngāue fakaʻahó kae huʻu taha pē ʻeku fakakaukaú ki heʻeku Tamai Hēvaní.

ʻOku ou ngāue ʻi ha kautaha takimamata ʻi Kosita Lika. Pea ʻi he natula ʻo e faʻahinga pinisi ko ʻení, ʻoku angamaheni ʻaki e ngāue ʻa e kakaí he ʻaho Sāpaté. ʻI he taimi ne u kamata ngāue aí naʻá ku fakahā ange ko e mēmipa au ʻo e Siasí. Naʻá ku kole—pea naʻe tali—ke ʻoua naʻá ku ngāue Sāpate.

Naʻe fieʻilo hoku kaungāngāué mo ʻeku pulé koeʻuhí ko e kole faikehe naʻá ku faí. Naʻa nau fehuʻi mai ha ngaahi fehuʻi lahi fekauʻaki mo ʻeku tui fakalotú. Naʻe ʻi ai pē ha ngaahi faingamālie naʻá ku maʻu ke fakamatala ʻa e ngaahi meʻa ʻoku tui ki ai ʻa e Kau Māʻoniʻoni ʻi he Ngaahi ʻAho Kimui Ní. ʻI he ngaahi fakamatala lahi fekauʻaki mo e ongoongoleleí ne u maʻu ai ʻenau fakaʻapaʻapá.

ʻI ha ʻaho ʻe taha ne tānaki mai ʻe heʻeku pulé ʻemau kau ngāué ke tala ha fanongonongo. Naʻá ne pehē, “ ʻOku ou fie maʻu ke mou ngāue kotoa ʻi he fakaʻosinga ʻo e uike ʻe ua ka hoko maí.” Ne tō hifo hoku lotó. Naʻá ku ʻilo ne fie maʻu ke u ngāue ʻi he ʻaho Sāpaté.

Pea hoko atu ʻemau pulé ʻo pehē: “ ʻA ia ko e tokotaha kotoa tuku kehe pē ʻa Sione Kālosi. ʻOku tau ʻilo kotoa pē ʻoku ʻikai ha meʻa te ne lava ʻo ʻomai ia ki he ngāué ʻi he ʻaho Sāpaté.”

Naʻá ku ongoʻi fiemālie ange. Naʻe fakaʻapaʻapaʻi ʻe hoku pulé ʻa ʻeku kolé! Koeʻuhí ko e tōʻonga mo e ngaahi tuʻunga ʻulungāanga naʻá ku fakahā ʻi he ngāué, naʻá ne tokaʻi au. Ko hono olá ko ʻene loto fiemālie ke fakaʻapaʻapaʻi ʻeku ngaahi tui fakalotú.

ʻOku ou ʻilo ʻi he taimi ʻoku tau fakamuʻomuʻa ai e ngaahi tuʻunga ʻulungāanga ʻo e ongoongoleleí ʻi heʻetau moʻuí, ʻe tāpuekina kitautolu ʻe he ʻEikí.

Naʻe pehē ʻe homau pulé, “ ʻOku ou fie maʻu ke mou ngāue kotoa ʻi he fakaʻosinga ʻo e uike ʻe ua ka hoko maí.” Ne tō hifo hoku lotó. Naʻá ku ʻilo ʻe fie maʻu ke u ngāue ʻi he ʻaho Sāpaté.