ʻE Maʻu ʻe he Kau Maʻu Makasiní ʻa e Kiʻi Tohi Temipale Kuo Fakaleleiʻí

ʻE maʻu ʻe he kau maʻu makasini Liahoná mo e Ensign ʻa e kiʻi tohi naʻe fakafoʻoú ko e Ngaahi Temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e fakafetongi ʻo e paaki angamaheni ʻo ʻOkatopa 2010.

Ko e kiʻi tohí ni, ko hono fakafoʻou ia ʻo ha pulusinga kuo paaki ʻi he ngaahi taʻu ko ʻeni ʻe 50 tupu. Naʻe kamata ko ha pulusinga ʻo ha makasini Siasi ko e Improvement Era ʻi he 1955. Naʻe toki hoko ko ha kiʻi tohi makehe kuo fakafoʻou tuʻo valu talu mei ai. ʻE kau ki he paaki fakamuimui tahá ha ngaahi fakamatala mo ha ngaahi tā pea ʻe pulusi ʻi ha ngaahi lea fakafonua ʻe 45.

Kuo toutou fakalotolahiʻi mai ʻe he kau palōfita ʻo e ngaahi ʻaho kimui ní, ʻo kau ai ʻa Palesiteni Tōmasi S. Monisoni, ʻa e kāingalotú ke nau maʻu honau ngaahi ouau ʻi he temipalé pea toe foki ki he temipalé ke fai ʻa e ngāue maʻa ʻenau ngaahi kuí.

ʻOku fakataumuʻa ʻa e kiʻi tohí ke akoʻi ʻa e ngaahi tokāteline mo e ngaahi tefitoʻi moʻoni ʻo e moihū ʻi he temipalé. ʻOku fakalotolahiʻi ʻa e kau mēmipa ʻo e Siasí ke tauhi ha tatau ʻe taha ʻi honau ʻapí koeʻuhí ke lava ʻo fakaʻaongaʻi ʻe he mātuʻá ʻi he efiafi fakafāmili ʻi ʻapí pe ko ha toe fakatahaʻanga ange ke akoʻi honau ngaahi fāmilí ʻo kau ki he temipalé.

ʻE lave ke maʻu ʻe he toʻu kotoa pē ha meʻa ʻe ʻaonga kiate kinautolu ʻi he kiʻi tohí. ʻOku kau ʻi he ngaahi fakamatala ʻoku foʻou ki he pulusinga ʻo e tohi ko ʻení ʻa e “Ngaahi Tāpuaki ʻo e Temipalé,” meia Palesiteni Tōmasi S. Monisoni, mo e “Mateuteu ki he Ngaahi Tāpuaki ʻo e Temipalé,” meia ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku toe kau foki ʻi he kiʻi tohí ha fakamatala maʻá e toʻu tupú ʻoku fakahingoa “Ko Hono Ngaohi ʻo e Temipalé ke Hoko ko ha Konga ʻo Hoʻo Moʻuí,” pea ʻe lava ke ako ʻa e fānaú ʻo kau ki he ngaahi temipalé mei ha fakamatala ʻoku fakahingoa “Ko Ho Hala ki he Temipalé.” ʻE fiefia e tokotaha kotoa pē ʻi heʻenau vakai ki he ngaahi tā ʻo e ngaahi temipale ʻi he funga ʻo māmaní. ʻOku toe kau ʻi he kiʻi tohí ʻa e ngaahi tali ki he ngaahi fehuʻi ʻoku faʻa fai ke tokoni ki he kāingalotu ʻoku nau teuteu ke hū foʻou ki he temipalé.

ʻOku fakalotolahiʻi ʻa e kāingalotú ke vahevahe ʻa e kiʻi tohi ko ʻení mo honau fāmilí mo e ngaahi kaungāmeʻá ʻi he ngaahi tui fakalotu kehé. ʻE lava ke maʻu atu ha toe ngaahi tatau ʻo e kiʻi tohí mei he ngaahi fale tufakiʻanga nāunau ʻa e Siasí mo e LDScatalog.com.

ʻE lava ke fili ʻe he kau palesiteni fakasiteikí, pīsopé mo e kau faiako ʻo e kalasi teuteu ki he temipalé ke ngāue ʻaki ʻa e ngaahi nāunau ko ʻení ko ha fakalahi ki he maʻuʻanga tokoni ki he tohi lēsoní fakataha mo e Fakakoloaʻi Mei ʻOlungá mo e kiʻi tohi, Ko e Teuteu ke Hū ki he Temipale Māʻoniʻoní.

ʻO ka ʻaonga, ʻe lava ke ʻoange ʻe he kau taki lakanga fakataulaʻeikí ha kiʻi tohi ki he kāingalotu kuo ʻosi maʻu ʻenitaumení ke tokoniʻi kinautolu ke nau manatuʻi ʻa e ngaahi meʻa naʻa nau aʻusia ʻi he temipalé. ʻE lava foki ke toe ʻaonga ki hono tokoniʻi kinautolu ʻoku toe foki mai ki he Siasí ʻa ia ʻoku nau teuteu ke sila ʻi he temipalé.

Naʻe pehē ʻe ʻEletā Iosihiko Kikusi ʻo e Fitungofulú, “ ʻE lava ke hoko ʻa e kiʻi tohí ni ko ha maʻuʻanga tokoni fakaʻofoʻofa ki he kāingalotu kotoa pē. Ko ha tokoni ia ki hono manatuʻi ʻa e ngaahi meʻa toputapu naʻe aʻusia ʻi he temipalé, pea ʻoku fekauʻaki ia mo e ngaahi fuakava mo e ngaahi tāpuaki ʻoku fekauʻaki mo iá, pea mo e fatongia fakafoʻituitui ʻo e kāingalotú ke fakahoko ʻa e ngāue hisitōlia fakafāmilí ke ʻiloʻi ʻenau ngaahi kui kuo pekiá pea fakahoko maʻanautolu ʻa e ngaahi ouau mahuʻinga ʻo e temipalé ʻaki ʻa e kau atu ki he ngaahi ngāue fakatemipalé.”

ʻE maʻu ʻe he kau maʻu makasiní ʻi ʻOkatopa ʻa e pulusinga foʻou ʻo e kiʻi tohi temipalé.