Naʻá Nau Lea Kiate Kitautolu
Hoko ko ha Tokotaha Lelei he Taimí ni
Mei he “Be a Quality Person,” Ensign, Feb. 1993, 64–67; naʻe fakaleleiʻi e fakaʻilonga mālōloó.
Ko e fakaʻamu lahi taha ia ʻa e ʻOtuá maʻatautolú ke tau maʻu ha moʻui ʻoku leleí. Ke tau moʻui ʻi ha faʻahinga tūkunga pē te tau ʻi ai. ʻOku ʻikai totonu ke ʻi ai ha vahaʻataimi ko e fakatatali. …
Kuo pau ke tau moʻui ʻaki kotoa e ngaahi meʻa ʻoku fakamuʻomuʻa mo fakataumuʻa totonú. ʻOua ʻe fuʻu fefeka hoʻo fakafuofuaʻi pē koé. Ka ke fua ʻaki pē hoʻo moʻui ʻaki pe ʻikai moʻui ʻaki e ongoongolelei ʻo Sīsū Kalaisí.
ʻOku ou saiʻia ʻi he founga moʻui ko ia naʻe lea ʻaki ʻe hoku kaungāmeʻa ko Kalo Kalaké, … ʻi heʻene pehē ʻoku ʻikai ko e tukupā fakatāutahá ʻa e lavaʻi lelei ʻo e tatalí ka ke moʻui ʻi ha tuʻunga lelei ange, kakato mo fiefia. ʻOku ʻikai ko e taumuʻá ke fakatatali ki he tokotaha totonú ka ke hoko ko e tokotaha totonú.
“Ko e meʻa fakafiefia taha ʻo e moʻuí ko hono lavaʻi ʻo e ngaahi faingataʻá kae kei fiefia pē mo ʻamanaki ʻe iku lelei e meʻa hono kotoa. …ʻOku ou fakahā tauʻatāina kuo fakamoʻoniʻi ʻe heʻeku nofo taʻefakahoko ʻeku ngaahi fakaʻānauá ko ha ivi ia ʻokú ne fakamolū mo ʻomi ha loto fakatōkilalo koeʻuhí he naʻe faingataʻa. Ka ʻoku tau maʻu pē founga ke fakahoko ai ʻení, pea ʻi heʻene peheé, ʻe lava ke u fakalakalaka neongo ʻoku aʻu mai ki he ʻahó ni ʻoku teʻeki ai maʻu ha taha ke u ʻofa ai—ʻa e meʻa ko ia ʻe taha ʻoku ou fie maʻu taha ʻi heʻeku moʻuí tuku kehe pē a e anga māʻoniʻoní. …
“Ne u lāunga ki haku kaungāmeʻa naʻe ʻikai Siasi he faʻahitaʻu māfana kuo ʻosí ʻi heʻeku helaʻiá, ʻikai ke maʻu haʻaku fiefiá, mo ʻeku moʻui ʻo hangē pē ha fuʻu mīsini. Naʻá ne tali mai ʻo ʻikai haʻane fakaʻofaʻia ʻe taha ʻiate au, ‘He ʻokú ke pehē ko e hā ʻeni? Ko ha fakahā teu? ʻE Kalo, ko hoʻo moʻuí ʻeni. Hanga ʻo fakaleleiʻi.’ Ne u ʻamanakí te ne kiʻi tātaaʻi mai au mo fai mai ha kiʻi lea fakafiemālie. Ka naʻá ne tala hangatonu mai e moʻoní. Naʻá ne moʻoni ʻaupito pē ia. Naʻe ʻikai te u fakamahuʻingaʻi ʻeku moʻuí, ko ia ne ʻikai te u ongoʻi naʻe ʻi ai hano mahuʻinga. Naʻá ku ʻalu ki ʻapi, toe lau e talanoa fakatātā ʻo e tangata tūtuuʻí mo e ngaahi talēnití, pea liliu ʻeku moʻuí” (A Singular Life, ed. Carol L. Clark mo Blythe Darlyn Thatcher [1987], 35–36).
ʻE kāinga, liliu, kapau ko e meʻa ia ʻoku fie maʻú. ʻOua te ke toe tatali. Fakafonu hoʻo moʻuí ʻaki ʻa e ngāue tokoní, akó, fakatupulaki e ʻulungāangá, ʻofa ki he kakai kotoa pē, mo e ngaahi ʻulungāanga ʻoku ʻuhingamālie tatau mo iá. Moʻui ʻi he ʻaho takitaha mo haʻo taumuʻa. …
… ʻOku ou fokotuʻu atu ke ʻai ke ke ʻiloʻi hoʻo Tamai ʻi Hēvaní. ʻAi ke ke ʻofa ʻiate Ia. Manatuʻi maʻu pē ʻokú Ne ʻofa ʻiate koe pea te Ne tataki mo poupouʻi koe kapau te ke ʻoange kiate Ia ha faingamālie. Fakakau Ia ʻi hono fai hoʻo ngaahi filí. Fakakau Ia ʻi hoʻo ngaahi loto-mamahí. Fakakau Ia ʻi he taimi ʻokú ke fakafuofuaʻi ai ho mahuʻinga fakatāutahá. “He ko e moʻuí ni ko e taimi ia ki he tangatá ke teuteu ai ke feʻiloaki mo e ʻOtuá; ʻio, vakai ko e ʻaho ʻo e moʻuí ni ko e ʻaho ia ke fai ai ʻe he kakai [tangatá mo fefiné] ʻa ʻenau ngaahi ngāué” (ʻAlamā 34:32).
ʻI hoʻo feinga ko ia ke ke hoko ko ha tokotaha leleí, fetuʻutaki fakaʻaho mo hoʻo Tamai Hēvaní ʻa ia ʻokú Ne ʻafioʻi lelei taha koé. ʻOkú Ne ʻafioʻi ho ngaahi talēnití, ho ngaahi mālohingá, mo ho ngaahi vaivaiʻangá. ʻOkú ke ʻi he māmaní he kuongá ni ke fakatupulaki mo fakaleleiʻi e ngaahi ʻulungāanga ko ʻení. ʻOku ou palōmesi atu te Ne tokoniʻi koe. ʻOkú Ne ʻafioʻi hoʻo ngaahi fie maʻú. ◼
Faitaaʻi ʻe Craig Dimond