Kae ʻOua Ke Tau Toe Feʻiloaki
Ngaahi Fonualoto Kuo Tāpuni Malu
Hangē he ʻikai hoko e ngaahi meʻa naʻe talamai ʻi ha kiʻi tohi tuʻuakí—pea toe meimei fakaolí—ka naʻa nau fakamanatu mai ha talaʻofa ʻoku fakapapauʻi mai ʻe aʻu ki he taʻengatá.
Naʻa mau ō mo ʻeku faʻeé, ngaahi tokouá mo hoku tuofefiné ki he fale maté he ʻaho hili e mālōlō ʻeku tangataʻeikí, ke aleaʻi e ngaahi meʻa ki he meʻafakaʻeikí. Naʻe kau he meʻa ke mau faí hono fili ʻo e puha maté mo ha fonualoto ke tuku ki ai ʻa e puhá.
ʻI heʻemau fakakaukauʻi e ngaahi meʻa ke faí, naʻá ku fakatokangaʻi atu ha kiʻi pepa naʻe tuʻuaki mai ai ha faʻahinga fonualoto makehe. Mavahe mei ha ngaahi meʻa kehe, naʻe tuʻuaki mai ai ʻoku silaʻi tāpuni pē ʻe he fonualotó ia, pea ʻoku fakapapauʻi mai ʻe silaʻi malu ia ʻi ha taʻu ʻe 75. Neongo ko ha taimi fakamamahi ʻeni ka naʻá ku oliʻia ʻi he meʻa naʻe fakapapauʻi maí.
Ne u fifili, “Ko hai te ne toe vakaiʻi e silaʻi malu ko ʻení ʻi ha taʻu ʻe 75? Pea kapau ʻe vakaiʻi ʻe ha taha pea naʻe ʻikai ngāue ʻeni, ko hai te ne maʻu e totongí? Naʻa ku fakakaukau, ko e hā hono moʻoni ʻo e ngaahi faingamālie ʻe kei silaʻi malu e fonualoto ko iá?”
ʻI he momeniti ko ʻeni ne u fifili aí, naʻe ʻalu ʻeku fakakaukaú ki ha fonualoto ʻe taha ʻa ia naʻe fakamatala ki ai ʻi he Mātiu 27. Ko e loki ko ʻení, ʻa ia ko ha fonualoto ʻi ha kuonga mo ha feituʻu ʻi he kuo hilí, pea naʻe ʻi ai ʻa e matapā ki ai naʻe tāpuniʻi ʻaki ha fuʻu maka lahi:
“Pea ʻi he pongipongi, ʻa ia naʻe feholoi mo e ʻaho teuteú, naʻe haʻu fakataha kia Pailato ʻa e kau taulaʻeiki lahí mo e kau Fālesí,
“ ʻO nau pehē, ʻEiki, ʻoku mau manatu naʻe lea ʻa e kākaá na ʻi heʻene kei moʻuí, Ka hili ʻa e ʻaho ʻe tolu te u toe tuʻu hake.
“Ko ia, ke ke fekau ke leʻohi maʻu ʻa e fonualotó, ʻo hoko ki hono ʻaho tolú, telia naʻa haʻu ʻene kau ākongá ʻi he poó ʻo kaihaʻasi ia, pea nau tala ki he kakaí, Kuo toe tuʻu ia mei he maté: pea ʻe kovi lahi ai ʻa e kākā kimui ní ʻi he ʻuluakí.
“Pea pehē ʻe Pailato kiate kinautolu, ʻOku ai hoʻomou kau leʻo: mou ō ʻo faʻiteliha ʻi hono ngaohi ke māú.
“Pea naʻa nau ʻalu, ʻo ngaohi ke maau ʻa e fonualotó, ʻo silaʻi ʻa e maká, pea fakanofo ʻa e leʻo” (Mātiu 27:62–66).
ʻI he ngaahi fekau kotoa kuo fai ʻi he hisitōlia ʻo e ngaahi tuʻi mo e kau seniale mo e kau pulé, mahalo ko e fekau taʻeʻaonga taha aí ʻa e fekau ʻa Pailato ke fakapapauʻi ʻoku malu e fonualotó.
Ko e hā ha faingamālie ʻe kei silaʻi malu ai ʻa e fonualoto ko ia? Ko hono moʻoní, naʻe ʻikai ha founga ia ke fai ʻaki ʻe he kau sōtia ʻa e tuʻutuʻuni ko ia he naʻe ʻikai ha founga ia ʻe taʻefakaava ai ʻa e fonualotó: “Pea ʻiloange, naʻe mofuike lahi: he naʻe ʻalu hifo ʻa e ʻāngelo ʻa e ʻEikí mei he langí, peá ne filifilihi ʻa e maká mei he matapaá” (Mātiu 28:2).
Koeʻuhí ko hono fakaava ʻo e fonualoto ko ia ʻe tahá, ʻe fakaava ʻa e ngaahi fonualotu mo e ngaahi faʻitoka kotoa pē naʻe silaʻi malu. ʻOku fakapapauʻi ʻe hoko ia.
Ko e Maka ʻo Hotau Fakamoʻuí ʻa hotau haʻofanga mei he maté mo helí. Ko Ia “ko e toetuʻu, mo e moʻui” (Sione 11:25). Koeʻuhí ko Ia “kuo pau ke tuku hake ʻe heli ʻa hono ngaahi laumālie pōpulá, pea kuo pau ke tuku hake ʻe he ngaahi faʻitoká ʻa hono ngaahi sino pōpulá, pea ʻe toe fakatahaʻi ʻa e sinó mo e laumālie ʻo e tangatá; pea ʻe hoko ia ʻi he mālohi ʻo e toetuʻu ʻa e Tokotaha Māʻoniʻoni ʻo ʻIsilelí” (2 Nīfai 9:12).
Ko e Fonualoto ʻi he Ngoué, tā ʻe Linda Curley Christensen, © 2000 IRI