Manatua ʻo ha Ngaahi Moʻui Maʻongoʻonga
Palesiteni Sipenisā W. Kimipolo (1895–1985)
ʻI he tupu hake ʻa Sipenisā W. Kimipolo ʻi he feituʻu tuku ʻuta ʻo ʻAlesoná, naʻá ne ako ai ʻi heʻene kei siʻí ke ngāue mālohi. Ko e mokopuna ʻo e ʻAposetolo ko Hiipa C. Kimipolo (1801–68) pea ko e foha ʻo ha palesiteni fakasiteikí, naʻe fakatupulaki ai ʻia Sipenisā ha fakamoʻoni mālohi mo ha moʻui mateaki moʻoni ki he ongoongoleleí.
ʻI he kei tamasiʻí ʻa Sipenisaá, naʻá ne faʻa fatongia ʻaki e heka ʻi ʻolunga ʻi he funga saliote mohuku mōmoá ʻo lolomi hifo kae laku hake ia ʻe hono ngaahi taʻoketé ki he funga salioté. Ko e ngāue velahia, efua mo veveli, ka naʻá ne fai pē ia—tuku kehe pē ʻa e taimi naʻá ne fanongo ai ki he tā ʻa e fafangu ʻo e lotú ko e fakaʻilonga e kamata ʻa e Palaimelí, ʻa ia naʻe fakahoko ʻi he lolotonga ʻo e uiké ʻi he taimi ko iá. Naʻe haohaoa ʻene maʻu Palaimelí pea he ʻikai te ne liʻaki. Naʻe ʻi ai e fakakaukau kehe ia ʻa hano ngaahi taʻoketé pea kamata ke vave ange ʻenau laku hake ʻa e mohuku mōmoá. ʻI heʻenau fakatokangaʻi hake kuo fokotuʻuna ʻa e mohukú, kuo fuoloa ʻa e mei aʻu atu ia ʻa Sipenisā ia ki he Palaimelí.
Naʻe hoko atu ʻa Sipenisā W. Kimipolo ʻo ngāue faifekau taimi kakato, hoko ko e pīsope pea mo e palesiteni fakasiteiki kimuʻa pea toki ui ia ki he ngāue fakaʻaposetolo ʻi he 1943. Naʻe ʻiloa ʻa ʻene ngāue angatonú neongo naʻe mahamahaki, kau ai ʻa e mahaki mafu mo e kanisā hono mongá. Naʻá ne fakalotolahiʻi ʻa e kāingalotú ke toe lalahi ange ʻenau laká, pea ko ʻene kiʻi moto fakatāutahá naʻe mahinongofua ʻa ia ko e “Fai Leva ia.” Koeʻuhí ko ʻene mahamahakí, naʻe fakakaukau ʻa e tokolahi ʻe nounou pē taimi ʻe hoko ai ʻa Sipenisā W. Kimipolo ko e Palesiteni ʻo e Siasí. Ka naʻá ne tataki ʻa e Siasí ʻi ha taʻu ʻe 12, lolotonga e taimi ko iá naʻe liunga ua ai e lahi ʻo e ngaahi temipale naʻe ngāué, tupu peseti ʻe 50 ʻa e tokolahi ʻo e kau faifekau taimi kakató, pea foaki mo e lakanga fakataulaʻeikí ki he mēmipa tangata moʻui taau kotoa pē [ʻo e Siasí].
Naʻe tataki ʻa Sipenisā W. Kimipolo mei he kamataʻangá ʻi he anga fakatokilālo ʻi he feituʻu ʻuta ʻo ʻAlesoná ki he ngaahi tuʻunga tuʻukimuʻa ʻo e Siasí, ʻi heʻene faivelenga taʻeueʻia ki he ongoongoleleí mo ʻene ngāue mālohi ʻi he angatonú. Naʻe fakaʻilonga ʻaki e makamaile ʻo ʻene hoko ko e Palesiteni ʻo e Siasí ʻa e tupu lahi ʻi he langa temipalé mo e ngāue fakafaifekaú. Toʻohemá: Mo hono uaifí, Kamila (1894–1987).