Ki he Kau Talavoúfekauʻaki mo e Teití

Fai ʻe he Kau Palesitenisī Lahi ʻo e Kau Talavoú

Ko e Hā ʻa e Teiti?

Kau talavou, ko e teití ʻa e taimi ʻokú ke kole ai ki ha finemui ke ne kau mai pe te mo fengāueʻaki ai ʻi ha ʻekitivitī fakasōsiale naʻe palaniʻi.

Ko e Hā ʻOku Mahuʻinga ai ʻa e Teití?

ʻE lava ke hoko ʻa e teití ko ha meʻa fakaʻofoʻofa ke ke ako ai mo e kau finemui te mou teití. ʻE lava ke ke ako ai ha meʻa lahi kau kiate koe pē, pea te ke lava ʻo fakatupulaki ai ʻa e mahinó, fakaʻapaʻapá, mo e fakahoungaʻi ʻo e ngaahi ʻofefine makehe mo mahuʻinga ʻo e ʻOtuá.

Mahalo ʻe hā kei ngali mamaʻo ʻa e malí, ka ko e taha ia ʻo e ngaahi fili mahuʻinga taha ʻo hoʻo moʻuí. ʻOku ʻikai ko e taimi ke fai ai ʻa e fili ko iá ʻa hoʻo taʻu hongofulu tupú, ka ʻe tokoniʻi koe ʻe he teiti he founga totonú ke ke mateuteu ai ke fai e fili ko iá ʻi hono taimi totonú. Te ke maʻu ha ngaahi faingamālie ʻi he teití ke fakatupulaki ai e ngaahi ʻilo fakasōsiale ko ia ʻe tokoni atu ke ke falala mo hā fakaʻofoʻofa ki he kau finemui ʻokú ke teiti mo iá. ʻE mahino kiate koe peá ke saiʻia ai ʻiate kinautolu ʻoku nau maʻu e ngaahi ʻulungāanga lelei ʻe mahuʻinga kiate koe ʻi hao hoa taʻengata. ʻE tokoni atu foki e teiti he founga totonú ke ke moʻui taau mo mateuteu ke mali ʻi he temipalé mo e tokotaha totonú ʻi he taimi totonú ki he nofo taimí mo hono kotoa ʻo e nofo taʻengatá.

ʻE tokoni atu kotoa ʻeni ke ke fiefia ai ʻi he taha ʻo e ngaahi tāpuaki maʻongoʻonga taha ʻo e moʻuí: ko ha nofo-mali fiefia mo lavameʻa.

Ko e Hā ha Ngaahi Tuʻunga Moʻui Totonu ki he Teití?

Kuo ekinaki e kau palōfita ʻa e ʻEikí ke ʻoua naʻá ke teiti kae ʻoua kuó ke taʻu 16. ʻI hoʻo kamata teití, teiti pē mo kinautolu ʻoku māʻolunga ʻenau tuʻunga moʻuí pea te ke kei tauhi ki hoʻo ngaahi tuʻunga moʻuí ʻi hoʻo feohi mo kinautolú. Kau maʻu pē ʻi he ngaahi ʻekitivitī ʻoku fakatupulakí ke mo kei lava ai mo e taha ʻokú mo teití ʻo fakaʻapaʻapaʻi pē kimoua pea mo kei ofi ai ki he Laumālie ʻo e ʻEikí. ʻOku mātuʻaki mahuʻinga ke ke maʻu ha ngaahi fakakaukau mo ha ongo ʻoku maʻá. Fakaʻehiʻehi mei ha faʻahinga fetuʻutaki ʻe fai ai ha talanoa pe ʻulungāanga ʻoku fakasekisualé. Fakaʻehiʻehi mei he nofo toko ua pē mo e taha ʻokú mo teití pe ʻalu fuoloa he poʻulí. ʻOkú mo fakatou fatongia ʻaki ʻa e fetokoniʻaki ke kei tauhi ʻa e tuʻunga māʻoniʻoni ʻo e lakanga fakataulaʻeikí mo e tuʻunga fakaefefiné, pea ke mo femaluʻiʻaki ʻa homo ngeiá mo e angamaʻá. Angalelei mo anga fakaʻapaʻapa maʻu pē ki he kau finemuí ʻi he taimi ʻokú ke kole pe tali ai ha teiti pea ʻi hono kotoa pē ʻo e ngaahi taimi te ke teiti aí.

ʻI he kamata hoʻo teití, ʻalu mo ha toko ua kehe pe tokolahi ange ai. Fakaʻehiʻehi mei he toutou teiti mo e tokotaha tatau peé pe vave hono kamata ha feohi fakamātoato mo ha tokotaha peé.

Manatuʻi ke kei tauhi ke potupotutatau hoʻo moʻuí ʻi he taimi ʻokú ke teiti aí. ʻOku ʻikai totonu ke ke toutou teiti ʻo maumau ai hoʻo ngaahi fetuʻutaki fakafāmilí pe tupu ai ha ʻikai ke sai hoʻo akó pe ko hoʻo fakatupulaki hoʻo ngaahi poto fakangāué pe talēnití. Fakapapauʻi ʻoku feʻiloaki hoʻo mātuʻá mo e finemui ʻokú mo teití peá na ongoʻi fiemālie pē ki ai.

ʻOku mau poupouʻi koe ke ke kau ki ha ngaahi ʻekitivitī teiti kuo ʻosi palani fakalelei ʻa ia ʻoku faingofua pē, lelei, ʻikai ke fakamole, pea tokoni atu ke ke ʻiloʻi e kau finemui ʻokú ke teiti mo iá.